Ehena popepi naKalunga

‘Omwene, ove to koneke nge’

“OSHI LI omutengi mudjuu neenghono okukala u wete kutya kape na oo e na ko nasha naave ile e udite ko omaliudo oye.”a Mbela naave owa li u udite ngaho efimbo limwe? Mbela owa li efimbo limwe u udite kutya kape na oo e na ko nasha naave ile e udite ko onghalo yoye ile nokuli kutya ou udite ngahelipi? Ngeenge osho ngaho, otashi dulika u hekelekwe kwaashi kutya: Jehova oku na ko nasha neenghono novalongeli vaye nonokutya oha kala e wete ashishe osho tashi va ningilwa monghalamwenyo yavo yakeshe efiku. Eendjovo daDavid odo di li mEpsalme 139 otadi koleke oushili waasho.

David okwa li e na elineekelo kutya Kalunga oku na ko nasha naye eshi a ti: “Omwene, Ove to konakona nge, ndee to koneke nge.” (Ovelishe 1) David okwa longifa efaneko liwa movelishe oyo. Oshityalonga shOshiheberi osho sha tolokwa “konakona” otashi dulu okutya okufa oshivela shonhumba (Job 28:3), okushiika oshilongo (Ovatokolipangeli 18:2), ile okukonakona omauyelele e na sha noshinima shopaveta (Deuteronomion 13:14). Jehova oku tu shii nawanawa onga a konakona oshinima keshe nosho yo oshitukulwa keshe shonghalamwenyo yetu. David ote tu hongo kutya Kalunga oku na ko nasha novapiya vaye pauhandimwe. Ohe va konakona nawanawa noku va shiiva pauhandimwe.

David okwa popya vali shi na sha nokukonakona nawanawa ovanhu kwaKalunga, a ti: “Nande ndi li omutumba, ile handi fikama owe shi shiiva; omadiladilo ange ou a uditile kokule.” (Ovelishe 2) Ashike Jehova oku li “kokule” molwaashi oha kala meulu. Ndele nande ongaho, oku shii ngeenge tu li omutumba, tashi dulika pexulilo lefiku omo twa li twe lipyakidila noku shii ngeenge hatu penduka ongula naashi hatu ke lipyakidila nomalipyakidilo etu efiku. Oku shii yo omadiladilo, omahalo nosho yo omalalakano etu. Mbela David okwa li e wete e li moshiponga eshi Jehova a li te mu konakona nawanawa? Hasho nandenande, okwa li a hafa eshi ta konakonwa nawanawa. (Ovelishe 23, 24) Mbela omolwashike a li a hafa?

David okwa li e shii kutya Jehova oha konakona nawa ovalongeli vaYe nelinyengotomheno liwa. David okwa ulika etomheno olo eshi a ti: “Nande ohandi ende, ile handi nangala, ou shi wete; neendjila dange adishe ou di shii.” (Ovelishe 3) Jehova oha kala e wete ‘eendjila detu adishe’ efiku keshe, omapuko etu nosho yo oilonga yetu iwa. Mbela oha yandje elitulemo komapuko etu ile okoilonga yetu iwa? Outumbulilo wOshiheberi oo wa tolokwa “wete” otau dulu okutya “okufifa” ile “okuyela,” ngaashi ashike omunepya ha yele oilya opo olungu li dje mo. Outumbulilo ‘oku shii’ otau toloka oshitya shOshiheberi osho tashi dulu okutya “okulenga.” Ngeenge Jehova ta konakona oinima oyo ovalongeli vaye hava popi nohava ningi efiku keshe, oha kala a hokwa ouwa oo hava ningi. Omolwashike mbela? Omolwaashi okwa lenga eenghendabala davo doku mu hafifa.

Epsalme 139 otali tu hongo kutya Jehova oku na ko nasha neenghono novalongeli vaye. Ohe va konakona nawa nohe va pashukile eshi ve lipyakidila nomalipyakidilo avo efiku keshe. Oku shii omaupyakadi oo hava shakeneke noku shii ouyahame wopamadiladilo nowokomutima oo tashi dulika wa etifwa komaupyakadi oo. Mbela osho itashi ku linyengifa u longele Kalunga oo e na ko nasha? Ngeenge osho, kala u na oushili ou kutya: Jehova ke na efiku ‘a dimbwe oilonga yoye nohole yoye mokufimanekifa edina laye.’ — Ovaheberi 6:10.

[Eshangelo lopedu]