OSHIPALANYOLE SHOKOMBADA | KALUNGA OKU NA KO NGOO NASHA NAAVE?
Kalunga Oku Shii Kutya Owa Tya Ngahelipi
“Omwene, Ove to konakona nge, ndee to koneke nge.” — EPSALME 139:1.
“Omesho oye okwa li taa shipulula nge, fimbo nda li engwili.” — EPSALME 139:16
OMOLWASHIKE VAMWE VE LI MOMALIMBILILO: Ovanhu vamwe ohava diladila kutya Kalunga oha tale ko ashike ovanhu ve li ovalunde, inava koshoka noinava wana okupewa elitulemo. Kendra, oo a kala ta hepekwa kepolimano, okwa li e udite ondjo neenghono molwaashi ita dulu okukala metwokumwe noiteelelwa yaKalunga monghedi ya wanenena. Oshidjemo, okwa ti, “Onda efa po okwiilikana.”
OSHO EENDJOVO DAKALUNGA TADI HONGO: Jehova iha tale ashike kokuhawanenena kwoye ndele oku shii yo kutya ove omunhu a tya ngahelipi. Ombibeli oya ti: “Oye ta shiiva oshitwe yetu, nhumbi tu li; ota dimbulukwa, nokutya fye ondwi yedu.” Shimwe vali, ihe tu ningile “eshi sha yeleka omatimba etu,” ashike ohe tu dimine po pahole ngeenge twe livela ombedi. — Epsalme 103:10, 14.
Diladila koshihopaenenwa shaDavid, ohamba yaIsrael, oo a tumbulwa moshitukulwa shotete shoitukulwa ei ya pambafana. David okwa li a ilikana kuKalunga ta ti: “Omesho oye okwa li taa shipulula nge, fimbo nda li engwili inandi tongoka, nomembo loye omo omwa nyolelwa [oitukulwa yalo alishe, NW], . . . Kalunga, konakone nge, u koneke omutima wange!” (Epsalme 139:16, 23) David okwa li a tomhwa kutya nonande okwa nyona, omafimbo amwe a nyona nokuli sha kwata moiti, Jehova okwa li ta dulu okumona kutya okwe livela ombedi momutima waye.
Jehova oku ku shii nawa e dule omunhu keshe. Ombibeli oya ti: “Omunhu ta tale osho shokombada, ndelenee Omwene ta tale omutima.” (1 Samuel 16:7) Kalunga oku shii kutya omolwashike ho lihumbata monghedi omo ho lihumbata, nghee oufyuululwakwatya, onghedi omo wa tekulwa, omudingonoko omo wa kulila nomaukwatya oye aeshe e ku nwefa mo. Oku wete nokwa lenga eenghendabala doye dokuninga omunhu muxwepo, nokuli nonande oho ningi omapuko.
Ndele mbela Kalunga oha longifa ngahelipi eshiivo laye lokushiiva kutya ove omunhu naanaa a tya ngahelipi opo e ku hekeleke?