Natu ‘hekelekeni aveshe ovo va polimana’

‘Omwene okwa vaeka nge ndi hekeleke aveshe ovo va polimana.’ — JES. 61:1, 2.

1. Jesus okwa li ha ningile shike ovo va polimana, nomolwashike?

JESUS KRISTUS okwa ti: “Oikulya yange ei, Ame ndi longe ehalo laau a tuma nge nondi wanife oshilonga shaye.” (Joh. 4:34) Eshi Jesus a li ta wanifa po oshilonga osho a pewa kuXe, okwa li a ulika omaukwatya aXe a tongomana. Umwe womomaukwatya oo Jesus a li a ulika oo ohole inene yokuhola ovanhu. (1 Joh. 4:7-10) Omuyapostoli Paulus okwa popya shi na sha nonghedi imwe omo Jehova ha ulike ohole eshi a ti kutya oku li ‘Kalunga kehekeleko alishe.’ (2 Kor. 1:3) Jesus naye okwa li a ulika oukwatya wa tya ngaho eshi a wanifa po exunganeko laJesaja. (Lesha Jesaja 61:1, 2.) Pomhito imwe, eshi Jesus a li moshinagoga muNasaret, okwa li a lesha exunganeko olo nokuyelifa kutya otali popi kombinga yaye. (Luk. 4:16-21) Pefimbo loukalele waye, okwa li ha hekeleke ovo va polimana noku va twa omukumo opo va mone epepelelo.

2, 3. Omolwashike ovashikuli vaKristus navo va pumbwa okuhekeleka vamwe?

² Ovashikuli vaJesus aveshe ova pumbwa oku mu hopaenena mokukala hava hekeleke ovo va polimana. (1 Kor. 11:1) Paulus okwa ti: “Hekelekafaneni nye mu tungafane keshe umwe nomukwao.” (1 Tes. 5:11) Ovanhu ova pumbwa ehekeleko shi dulife nale, molwaashi otu li ‘momafimbo madjuu.’ (2 Tim. 3:1) Ovanamitimadiwa vahapu ova lulilwa omolwelihumbato noikala ii yovanhu ovo ve va dingilila.

³ Ngaashi Ombibeli ya xunganeka, ovanhu vahapu momafiku aa axuuninwa onghalelo ei youkolokoshi “[ove lihole] vo vene, ovanalwisho voimaliwa, ovalitangi, novalinenepeki novasheki, ve he neduliko kovakulunhu, ve he shii kupandula, ve he neitavelo, ve he nohole, ve he nombili, ovalundili, ovahenalidiliko, ovakwanyanya, ovatondi vouwa, ovakengeleledi, ovahayavala, ovafulalali, ohole yavo yokuhola ouhalu mwii i dule ei yokuhola Kalunga.” Oikala oyo oya lunda pombada shi dulife nale, molwaashi ‘ovanhu vai novakengeleledi otava ehene komesho mowii.’ — 2 Tim. 3:2-4, 13.

4. Oshike tashi ningwa po pefimbo letu shi na sha neenghalo dounyuni?

⁴ Oinima aishe oyo itai tu kumwifa molwaashi Ombibeli oya ti kutya ‘ounyuni aushe ou li mepangelo lomunawii.’ (1 Joh. 5:19) ‘Ounyuni aushe’ owa kwatela mo omahangano opapolitika, opangeshefa, omalongelokalunga oipupulu nosho yo oupitilo keshe oo Satana ha longifa opo a tandavelife omitotolombo daye. Osha yeleka lela eshi Satana Ondiaboli taku tiwa kutya oye “omupangeli wounyuni” ‘nakalunga kefimbo lounyuni ou.’ (Joh. 14:30; 2 Kor. 4:4) Eenghalo mounyuni otadi twikile okunaipala molwaashi Satana okwa handuka neenghono eshi e shii kutya oku na ko ashike okafimbo kaxupi. (Eh. 12:12) Itashi hekeleke tuu okushiiva kutya Jehova mafiku ota ka katukila onghatu Satana nonghalelo yaye youkolokoshi nokuxulifa po omhata i na sha nounamapangelo! — Gen., etuk. 3; Job, etuk. 2.

Onghundana iwa otai udifwa mounyuni aushe

5. Exunganeko li na sha noilonga yokuudifa otali wanifwa ngahelipi momafiku aa axuuninwa?

⁵ Osho Jesus a li a xunganeka otashi wanifwa pefimbo eli lidjuu mondjokonona younyuni. Jesus okwa tile: “Evangeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” (Mat. 24:14) Ngaashi Jesus a li a xunganeka, oshiwana shaJehova otashi udifa onghundana iwa yOuhamba waKalunga moilongo ihapu shi dulife nale. Kunena ope na Eendombwedi daJehova di dulife po 7 500 000, momaongalo e dulife po 107 000, odo tadi udifa onghundana iwa yOuhamba nokuhonga ovanhu, ngaashi ashike Jesus a li ha ningi. (Mat. 4:17) Ovanhu vahapu ohava hekelekwa shili ngeenge tava udifilwa onghundana iwa. Nomolwaasho opa li pa ninginifwa ovanhu 570 601, ovo va ninga Eendombwedi daJehova momido ashike mbali da pita.

6. Oilonga yetu yokuudifa oya tamunuka mo shi fike peni?

⁶ Okutamunuka mo neenghono kwoilonga yokuudifa oku liwetikile eshi Eendombwedi daJehova tadi toloka noku andjakaneka oileshomwa yopaMbibeli momalaka e dulife po 500, osho inashi monika nande onale mondjokonona younyuni. Okukala po kwoshitukulwa shokombada yedu shehangano laJehova, oilonga yasho nosho yo okukula kwasho oku li oshinima shikumwifi shili. Ngeno okwa li hamhepo iyapuki yaKalunga oyo i na eenghono, ngeno oilonga ya tya ngaho inai dula okulongwa mounyuni ou tau pangelwa kuSatana. Omolwoilonga yokuudifa onghundana iwa mounyuni aushe, ovanhu ovo va tambula ko etumwalaka lOuhamba navo ova mona ehekeleko ngaashi ashike oshiwana shaJehova.

Natu hekelekeni ovaitaveli vakwetu

7. (a) Omolwashike tuhe na okuteelela Jehova a kufe po oinima aishe oyo hai nyono po ombili yetu paife? (b) Otu shi shii ngahelipi kutya ohatu dulu okulididimikila omahepeko nomaudjuu?

⁷ Molwaashi otu li mounyuni ou u yadi oukolokoshi, oshi na oupu lela tu lihange meenghalo didjuu. Inatu teelela Kalunga a kufe po oinima aishe oyo hai nyono po ombili yetu paife, molwaashi osho otashi ka ningwa eshi ta ka hanauna po onghalelo ei yoinima. Onghee hano, ofimbo twa teelela ehanauno olo, oudiinini wetu kounamapangelo waJehova otau ka kala tau yelekwa eshi hatu shakeneke omahepeko oo a xunganekwa. (2 Tim. 3:12) Ndele molwaashi Tate yetu womeulu ohe tu kwafele noku tu hekeleka, ohatu dulu okupondola ngaashi Ovakriste ovavaekwa vomuTessalonika, ovo va li va pondola momahepeko nomomaudjuu omolwokukala ve na elididimiko neitavelo. — Lesha 2 Ovatessaloniki 1:3-5.

8. Omishangwa otadi ulike ngahelipi kutya Jehova oha hekeleke ovapiya vaye?

⁸ Jehova oha hekeleke alushe ovapiya vaye ngeenge ve li momaudjuu. Pashihopaenenwa, okwa li a hekeleka omuprofeti Elia eshi a li a tila neenghono ndele ta i onhapo ohambanghainhu Isabel oyo ya li ya hala oku mu dipaa. Elia okwa li nokuli ta ti okwa hala okufya. Ndele ponhele yokukembaula Elia, Jehova okwa li e mu ladipika opo a twikile noshilonga shaye e li omuprofeti. (1 Eeh. 19:1-21) Jehova okwa ulika yo kutya oha hekeleke ovapiya vaye eshi a li a kwafela eongalo lopaKriste lomefelemudo lotete. Pashihopaenenwa, Ombibeli otai ti kutya “eongalo alishe lomuJudea ashishe nolomuGalilea nolomuSamaria ola li li nombili, [nola li] tali litungu.” Kakele kaasho, ‘omolwokweenda metilo lOmwene nomokupopilwa komhepo iyapuki, eongalo ola li la hapupala,’ sha hala kutya, la tamunuka mo. (Oil. 9:31) Inatu pandula tuu eshi Jehova he tu kwafele noku tu hekeleka yo okupitila momhepo yaye iyapuki!

9. Okulihonga kombinga yaJesus ohaku tu hekeleke ngahelipi?

⁹ Tu li Ovakriste otwa hekelekwa eshi twa shiiva Jesus Kristus nokushikula oshikoti shaye. Jesus okwa ti: “Ileni kuame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kuame, osheshi Aame omunambili momutima onde lininipika; ndee tamu limonene eemwenyo deni etulumuko. Osheshi ondjoko yange [oiwa] nomutengi wange omupu.” (Mat. 11:28-30) Ohatu mono epepelelo eshi hatu lihongo kombinga yanghee Jesus a li ha ungaunga novanhu naashi hatu shikula oshihopaenenwa shaye shiwa.

10, 11. Oolyelye tava dulu okuhekeleka ovo va wililwa po komaudjuu meongalo?

¹⁰ Ohatu dulu yo okuhekelekwa kOvakriste vakwetu. Pashihopaenenwa, diladila kunghee ovakulunhuongalo hava kwafele ovo va nghundipala pamhepo. Jakob okwa shanga a ti: “Ope na tuu umwe mokati keni ta vele [pamhepo]? Oye na ifane ovakulunhu veongalo, ndele vo nave mu ilikanene.” Osho ohashi kwafele ngahelipi Omukriste oo a nghundipala pamhepo? Jakob okwa twikila ko ta ti: “[Eilikano] leitavelo otali xupifa omunaudu, Omwene note mu yambukifa po, ndele ngenge okwa hangika a tula etimba, otae mu kufilwa po.” (Jak. 5:14, 15) Ovakwaneongalo navo otava dulu yo okuhekeleka omunhu a tya ngaho.

¹¹ Ovakainhu ohava mono shipu unene okupopya novakainhu vakwao kombinga yomaupyakadi avo. Onghee hano, ovamwameme ovanamido otava dulu okupa ovamwameme ovanyasha omayele mawa molwaashi ove na owino notashi dulika va pita meenghalo da faafana naado tadi shakenekwa kovamwameme ovanyasha. Ovamwameme ovanamido otava dulu okukwafela ovakainhu ovanyasha moku va udila oukwao wananghali nomolwomaukwatya avo mawa amwe vali. (Lesha Titus 2:3-5.) Ashike ovakulunhuongalo nosho yo vamwe meongalo navo ove na okukala hava ‘popi nehekeleko neemwenyo da polimana.’ (1 Tes. 5:14, 15) Oshiwa okukaleka momadiladilo kutya Kalunga ohe “tu hekeleke moudjuu wetu aushe, opo tu shiive yo okuhekeleka ava ve li moudjuu keshe.” — 2 Kor. 1:4.

12. Omolwashike sha fimanenena okukala pokwoongala kwopaKriste?

¹² Osha fimanenena okukala pokwoongala opo tu mone ehekeleko lopamishangwa okupitila moipopiwa. Ombibeli otai ti kutya Judas naSilas ova li va ‘kumaida ovamwatate neendjovo dihapu [ile tu tye, “noipopiwa ihapu,” NW], nove va twa ouladi.’ (Oil. 15:32) Pokwoongala ohapa kala yo alushe eenghundafana tadi tungu komesho nosho yo konima yako. Nonande otashi dulika tu kale twa wililwa po komaudjuu, inatu litukula ko nande keongalo, molwaashi osho otashi ka naipika ashike onghalo. (Omayel. 18:1) Ponhele yaasho, otwa pumbwa okutula moilonga ekumaido lomuyapostoli Paulus la nwefwa mo, olo tali ti: “Tu filafaneni oshisho fye tu twafane omukumo mohole nomoilonga iwa. [Inatu efa po okwoongala pamwe, OB-1986] ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.” — Heb. 10:24, 25.

Mona ehekeleko okudja mEendjovo daKalunga

13, 14. Yelifa nghee Omishangwa tadi dulu oku tu hekeleka.

¹³ Atusheni ohatu dulu okumona ehekeleko lashili okudja mEendjovo daKalunga kutya nee otwa ninginifwa ile opo twa hovele okulihonga kombinga yaKalunga nomalalakano aye. Paulus okwa shanga a ti: “Keshe eshi sha shangwa nale, osha shangelwa elongo letu, opo tu kale tu neteelelo hali di melididimiko nomehekeleko lomomishangwa.” (Rom. 15:4) Omishangwa otadi dulu shili oku tu hekeleka noku tu kwafela tu ‘kale twa wana notwa wanenena oshilonga keshe shiwa.’ (2 Tim. 3:16, 17) Okulihonga kombinga yomalalakano aKalunga mokulesha nokukonakona Ombibeli nosho yo oileshomwa ye likolelela kOmbibeli otashi ke tu kwafela tu kale tu na eteelelo lashili, naasho otashi ke tu hekeleka notashi ke tu etela yo omauwa amwe vali.

¹⁴ Jesus okwe tu tulila po oshihopaenenwa shiwa shokukala hatu hongo nokuhekeleka vamwe hatu longifa Omishangwa. Pashihopaenenwa, pomhito imwe eshi a li e lihololela ovahongwa vaye vavali konima yokunyumuka kwaye, okwa li e va “fatululila omishangwa.” Oshidjemo, ova li va tunhukwa neenghono. (Luk. 24:32) Omuyapostoli Paulus naye okwa li ha hopaenene Jesus, molwaashi okwa li ha ‘kundafana novanhu okudja momishangwa.’ Eshi Paulus a li muBerea, ovanhu ovo a li ta tomhafana navo ova li va “tambula nohokwe eendjovo daKalunga, ndee tava konakona momishangwa omafiku aeshe.” (Oil. 17:2, 10, 11) Hano, osha fimanenena okulesha Ombibeli efiku keshe nokukala hatu konakona oileshomwa oyo ya kanghamena kOmbibeli opo tu mone ehekeleko notu kale tu na eteelelo nonande otu li pefimbo la piyaana.

Eenghedi dimwe vali omo hatu dulu okuhekeleka vamwe

15, 16. Oinima ilipi hatu dulu okuninga opo tu hekeleke nokukwafela Ovakriste vakwetu?

¹⁵ Ope na eenghedi dihapu omo hatu dulu okukwafela nokuhekeleka Ovakriste vakwetu. Pashihopaenenwa, natu tye nee ngeno Omukriste omunamido ile oo ta vele okwa pumbwa sha keefitola; ohatu dulu oku ka landa ko koipumbiwa yaye. Ohatu dulu yo okuulika kutya otu na ko nasha navo moku va longela oilonga yolune, ngaashi okukosha ko koikutu, okuwapaleka meumbo nosho tuu. (Fil. 2:4) Natango, ohatu dulu okupandula ovaitaveli vakwetu omolwomaukwatya avo mawa, ngaashi ohole yavo, ounghulungu nouladi wavo nomolweitavelo lavo.

¹⁶ Onghedi imwe omo hatu dulu okuhekeleka ovanamido oyo oku va talela po nokukala hatu pwilikine nawa ngeenge tave tu lombwele shi na sha noimoniwa yavo yomonakudiwa nosho yo omanangeko noupuna oo va mona eshi va kala tava longele Jehova, naasho otashi ke tu ladipika yo noku tu hekeleka. Ohatu dulu yo okulesha pamwe navo Ombibeli ile oileshomwa ya kanghamena kOmbibeli. Ohatu dulu okulilongekida pamwe navo oshitukulwa shOshungonangelo osho tashi ka konakonwa oshivike osho ile ouyelele oo tau ka kundafanwa pEkonakonombibeli lEongalo. Ohatu dulu yo okutala pamwe navo ou-DVD vehangano ile oku va leshela ile oku va hokololela oimoniwa tai tungu oyo twa lesha moishangomwa yetu.

17, 18. Tu li ovapiya vaJehova ovadiinini, omolwashike hatu dulu okukala noushili kutya Jehova ote ke tu kwafela noku tu hekeleka?

¹⁷ Ngeenge otwa didilike kutya omulongelikalunga mukwetu okwa pumbwa ehekeleko, ohatu dulu oku mu kwatela momailikano etu opaumwene. (Rom. 15:30; Kol. 4:12) Eshi hatu lididimikile omaupyakadi naashi hatu kendabala okuhekeleka vamwe, ohatu dulu okukala tu na elineekelo ngaashi olo la li li niwe komupsalme oo a imba a ti: “Omutengi woye u undulila kOmwene, Ye ote ku kalele noshisho. Oye ita efa nande omuyuki a kale alushe nokutengauka.” (Eps. 55:23) Jehova ote ke tu hekeleka alushe noku tu kwafela tu li ovapiya vaye ovadiinini.

¹⁸ Jehova okwa li a lombwela oshiwana shaye shonale a ti: “Ame, heeno, Ame mwene handi mu hekeleke.” (Jes. 51:12) Ngeenge ohatu hekeleke ovo va polimana, Jehova naye ote ke tu hekeleka noku tu nangeka noupuna omolwoilonga yetu iwa. Kutya nee otu na eteelelo lokuya meulu ile oloku ka kala kombada yedu, ohatu dulu okuhekelekwa keendjovo daPaulus odo a li a shangela Ovakriste vakwao ovavaekwa, tadi ti: “[Omwene] wetu Jesus Kristus Oye mwene naKalunga Tate yetu ou a kala e tu hole nokwe tu pa monghenda ehekeleko laalushe neteelelo liwa, Oye na hekeleke omitima deni, Ye ne mu pamekele meendjovo adishe diwa nomoilonga aishe iwa.” — 2 Tes. 2:16, 17.

Oto dimbuluka?

• Oilonga yetu yokuudifa oyo hai hekeleke vamwe oya tamunuka mo shi fike peni?

• Oinima ilipi hatu dulu okuninga opo tu hekeleke vamwe?

• Omishangwa otadi ulike ngahelipi kutya Jehova oha hekeleke ovapiya vaye?

[Efano pepandja 28]

Mbela oho hekeleke ngoo ovo va polimana?

[Efano pepandja 30]

Keshe umwe womufye, kutya nee omunyasha ile omukulunhu, ota dulu okuladipika vamwe