Omapulo a dja kovaleshi
Oshike ndi na okuninga po ngeenge ndi na epulo kombinga yoshinima shonhumba osho nda lesha mOmbibeli ile ngeenge nda pumbwa okupewa omayele opaumwene omolwoupyakadi wange?
Omayeletumbulo 2:1-5 okwe tu ladipika atusheni tu kale hatu “shitilile” opo tu mone eendunge nomayele ngaashi omunhu ta kongo “omamona a holekwa.” Osho osha hala okutya otu na okukala hatu ningi eenghendabala tu konge omanyamukulo omapulo etu e na sha nOmishangwa nopo tu dule okukandula po omaupyakadi etu. Ndele mbela ongahelipi osho tashi dulu okuningwa?
Embo Mona ouwa mOfikola yOukalele woPauteokratika, epandja 33 fiyo 38, ola yelifa shi na sha ‘naNghee to dulu okukonga omauyelele’ to longifa eedjo domauyelele odo da nyanyangidwa ‘komupiya omudiinini nomunaendunge.’ (Mat. 24:45) Pepandja 36 opa yelifwa nghee hatu dulu okulongifa oshuuliki shoikundafanwa hashi ifanwa o-Watch Tower Publications Index omo mu na omisholondodo doitya nodomishangwa. Ngeenge to kongo ouyelele to longifa oshuuliki osho, ou na okukonga oshitya shonhumba osho sha tongomana moshikundafanwa shoye ile ovelishe yonhumba yOmbibeli, noto ka ulikilwa omusholondodo weedjo domauyelele omo to dulu oku ka tala. Ndele ngeenge to kongo enyamukulo ile omayele onhumba okondadalunde oo wa pumbwa, konga nelidiiniko molwaashi oto kongo “omamona a holekwa” nosha yela kutya otashi pula efimbo neenghendabala opo u a mone.
Ashike ope na natango oikundafanwa imwe nosho yo omishangwa donhumba odo inadi kundafanwa kondadalunde moishangomwa yetu. Ndele nokuli nopeemhito opo tashi dulika omushangwa wonhumba wa kundafanwa, otashi dulika ouyelele oo wa yandjwa inau nyamukula filufilu epulo loye. Shimwe vali, otashi dulika pa holoke omapulo e na sha nomahokololo onhumba Ombibeli, molwaashi Omishangwa inadi yandja ouyelele we lixwapo kombinga yomahokololo oo. Onghee hano, inatu teelela tu ka mone omanyamukulo okondadalunde omapulo aeshe oo tu na. Ndele peemhito da tya ngaho, otu na okuhenuka okukala hatu fekele oinima oyo tu shii kutya kape na omanyamukulo ayo, molwaashi osho otashi ka etifa “ashike eemhata, itadi pameke eleloleumbo laKalunga olo lomeitavelo.” (1 Tim. 1:4; 2 Tim. 2:23; Tit. 3:9) Oitaimbelewa ile ombelewa ya kula yEendombwedi daJehova itai dulu okukonakona nokunyamukula omapulo aeshe oo inaa kundafanwa moishangomwa yetu. Otu na okukala twa wanenwa kouyelele wa henena oo u li mOmbibeli oo tau dulu oku tu kwafela mokukalamwenyo kwetu, ashike omauyelele amwe kae mo mOmbibeli opo shi tu kwafele tu kale tu na eitavelo la kola muKalunga oo e li Omushangi wayo. — Tala embo Ehena popepi naJehova, epandja 185 fiyo 187.
Ndele mbela ongahelipi ngeenge owa kala to kongo ouyelele u na sha noshinima shonhumba osho she ku kuma pauhandimwe ndele ino mona enyamukulo olo wa pumbwa? Oto dulu oku ka konga ekwafo komwiitaveli mukweni oo a pyokoka pamhepo, tashi dulika nande omukulunhuongalo womeongalo leni. Ovakriste va tya ngaho ove na eshiivo lihapu li na sha nOmbibeli nove na oimoniwa ihapu. Otava dulu oku ku pa omayele oo wa pumbwa e na sha noupyakadi woye ile netokolo olo wa hala okuninga, molwaashi ove ku shii nawa, oto dulu oku va mona noupu nove shii onghalo yoye. Ino dimbwa yo okwiilikana kuJehova shi na sha noupyakadi woye noku mu pula a vyule omadiladilo oye okupitila momhepo yaye iyapuki, ‘osheshi Omwene oha yandje ounongo neendunge.’ — Omayel. 2:6; Luk. 11:13.