Jehu okwa li ha yambidida elongelokalunga la koshoka
JEHU okwa li ha yambidida nouladi elongelokalunga la koshoka. Okwa li ha wanifa po oinakuwanifwa yaye nondjungu, neulumo, nouladi nosho yo nomukumo. Otashi ka kala shiwa ngeenge nafye otwa kulike omaukwatya a fa aJehu. Ndele ope na oinima imwe oyo a li a ninga oyo tu na okuhenuka. Natu ka taleni kutya omolwashike.
Jehu okwa li a pewa oshinakuwanifwa kuJehova eshi oshiwana shaIsrael sha li sha duka okulonga owii. Pefimbo opo, Ovaisrael ova li va nwefwa mo nai komufiyekadi waAhab, Isabel, ina yohamba Joram oyo ya li tai pangele. Isabel okwa li a ladipika ovanhu va longele Baal ponhele yokulongela Jehova, a li a dipaifa ovaprofeti vaKalunga, a li a nwefa mo ovanhu ‘nokuhaelwa’ kwaye nosho yo ‘noundudu’ waye. (2 Eeh. 9:22; 1 Eeh. 18:4, 13) Jehova okwa li a lombwela Jehu a ka hanaune po oukwaneumbo waAhab aushe, mwa kwatelwa Joram naIsabel.
Pomhito opo Jehu a popiwa oshikando shotete mOmishangwa okwa li ta kundafana novakulunhu vomatanga ovakwaita eshi Ovaisrael va li tava lwifa Ovaassiria puRamot shomuGilead. Jehu okwa li e na ondodo ya fimana metangakwaita laIsrael, tashi dulika oye a li ondjai. Omuprofeti Elisa okwa li a tuma umwe womovana vovaprofeti a ka vaeke Jehu monanguwi a ninge ohamba noku mu lombwela a ka dipae ovalumenhu aveshe ovashunimonima vomepata laAhab. — 2 Eeh. 8:28; 9:1-10.
Ovakwaita vakwao ova li va pula Jehu kutya omulumenhu oo okwa li a ila shike, ashike ka li a hala oku va lombwela. Ndele eshi va kala tave mu kondjifa, okwa li e va lombwela oshili. Opo nee, Jehu novalumenhu ovo ova li va pangela omhangela yomeholeko va ka lwife Joram. (2 Eeh. 9:11-14) Otashi dulika pa li ovakwaita vamwe ovo va li omhinge nohamba Joram noitava yambidida enwefemo lii laIsabel nonande kava li ve shi holola. Ndele kashi na nee mbudi kutya osho sha li ngaho ile hasho, Jehu okwa li a diladila moule kutya ote ke shi enda ngahelipi opo a wanife po oshinakuwanifwa shaye nomupondo.
Fimbo Jehu ina vaekwa a ninge ohamba, ohamba Joram oya hangwa ya yahamekelwa moita noya li ya ya onhapo kuJisreel, tai diladila kutya otai ka veluka. Onghee hano, Jehu okwa li e shii kutya opo a wanife po oshinakuwanifwa shaye nomupondo, ovanhu vokuJisreel kava li ve na okushiiva eemhangela daye. Jehu okwa ti: “Inamu efa nande umwe ta i onhapo, ta di moshilando, e he shi shiivifile muJisreel.” (2 Eeh. 9:14, 15) Otashi dulika a li a didilika kutya ope na ovakwaita vamwe ovo tava yambidida Joram notashi dulika ve ke mu kondjife. Nomolwaasho, okwa li a hala okushilipaleka kutya ovakwaita ovo itava ka mona omhito yoku mu kondjifa.
ETEMBA LAJEHU TALI SHINGWA ONHAPO YOSHIDUDU!
Molwaashi Jehu okwa li a hala okuponokela oukwaneumbo waAhab ombadilila, etemba laye okwa li tali shingwa onhapo yoshidudu oshinano sheekilometa 72 okudja muRamot shomuGilead fiyo okuJisreel. Eshi Jehu a li popepi, omunangeli oo a li ofika moshungongulu muJisreel okwa li a mona “ongudu yaJehu tai uya.” (2 Eeh. 9:17) Otashi dulika Jehu a li a ya pamwe netangakwaita linene opo a wanife po elalakano laye nomupondo.
Eshi omunangeli oo a mona kutya omulumenhu omuladi, Jehu, okwa li mulimwe lomomatemba oita, okwa ingida ta ti: ‘Ota tondokifa onghambe ngaashi omunananghwengu.’ (2 Eeh. 9:20) Otashi dulika Jehu a li ha shingilile noshito, ndele pomhito oyo okwa li ta shingilile neenghono nomolwaasho taku tiwa okwa fa omunananghwengu.
Eshi Jehu a li a anya okukundafana novatumwa vavali ovo va li va tumwa kuye, okwa li a shakenekwa kohamba Joram nokukaume kayo Ahasia, ohamba yaJuda, ve li momatemba avo oita. Joram okwa li a pula a ti: “Ombili tuu Jehu?” ndele Jehu okwe mu nyamukula a ti: “Oshike? Ombili yashike, fimbo okuhaelwa kwanyoko Isebel [noundudu] waye u li po uhapu?” Joram okwa li a halukifwa keendjovo daJehu nokwa tanauka a faduke po ngeno. Jehu okwa li a kufa outa meendelelo ndele ta yashe Joram noshikuti pomutima nokwa fila metemba laye. Nonande Ahasia okwa li a mona omhito yokuya onhapo, Jehu okwa li e mu shikula ndele naye te mu dipaa. — 2 Eeh. 9:22-24, 27.
Okudja opo, Jehu okwa li e na oku ka dipaa ohambanghainhu Isabel oyo nayo ya li oshilyo shoukwaneumbo waAhab. Jehu okwa li a ula Isabel sha yuka eshi a ti kutya “omutulwa omutima.” Eshi Jehu a li ta shingi etemba laye muJisreel, okwa li a mona Isabel te mu talele mekende lombala. Opo nee, Jehu okwa lombwela ovakwaita vomombala sha yela nawa a ti kutya nava umbile Isabel pondje okupitila mekende nokwa lyataula omupukifi wOvaisrael oo neenghambe. Konima yaasho, Jehu okwa ya a ka dipae oilyo vali ikwao youkwaneumbo wohamba ikolokoshi Ahab. — 2 Eeh. 9:30-34; 10:1-14.
Nonande elongifo leenghono kali fi oshinima shiwa, otu na okudimbuluka kutya Jehova okwa li ha longifa ovapiya vaye vopefimbo lonale va wanife po omatokolo aye. Ombibeli oya ti: “Enyonauko laAhasia la dja kuKalunga, onghee hano okwa li e nokuuya kuJoram. Eshi a fika ko, okwa ya pamwe naJoram okushakeneka Jehu yaNimsi, ou a vaekwa kOmwene, a hanaune po epata laAhab.” (2 Omaf. 22:7) Eshi Jehu a li a umbila oshimhu shaJoram mondjila yomepya laNabot, okwa li a mona kutya osho osha li naanaa ewanifo lexunganeko laJehova olo kutya ota ka handukila Ahab eshi a dipaifa Nabot. Kakele kaasho, Jehu okwa li yo a lombwelwa a ‘handukile Isabel omolwohonde yovapiya vaKalunga.’ — 2 Eeh. 9:7, 25, 26; 1 Eeh. 21:17-19.
Kunena ovapiya vaJehova ihava lwifa ovapataneki velongelokalunga la koshoka, molwaashi Jehova okwa ti: “Ehandu olange.” (Heb. 10:30) Ndele efimbo limwe ovakulunhuongalo Ovakriste ove na okukatuka eenghatu nouladi ngaashi Jehu a li a ninga, opo va amene eongalo liha nyatekwe kenwefemo lii. (1 Kor. 5:9-13) Kakele kaasho, oilyo aishe yeongalo oi na okukala ya tokola toko iha endafane novanhu ovo va kondwa mo meongalo. — 2 Joh. 9-11.
JEHU KA LI E LIDIDIMIKILA OVO TAVA SHEKIFA EDINA LAJEHOVA
Osho sha li she linyengifa Jehu a wanife po oshinakuwanifwa shaye oshi liwetikile mwaasho a li a lombwela omulumenhu omudiinini Jonadab, eshi a ti: “Ila, tu yeni, u tale nohokwe ouladi wange omolwOmwene.” Jonadab okwa li a tambula ko eshivo olo nokwa li a londa metemba laJehu ndele tava i kuSamaria. Eshi va fika kuSamaria, Jehu okwa ninga oshinima shonhumba “nekengelelo, opo a dule okudipaa ovapiya vaBaal.” — 2 Eeh. 10:15-17, 19.
Jehu okwa li a shiivifila ovanhu kutya okwa hala ‘okuyambela Baal eyambo linene.’ (2 Eeh. 10:18, 19) Omuhongwanhu umwe okwa ti: “Jehu okwa li a longifa nekoto outumbulilo oo u na omaityo opavali.” Nonande outumbulilo oo Jehu a li a longifa luhapu ohau ulike “‘kokuyamba’ omayambo oo venevene, ohau longifwa yo okuulika ‘kokudipaa’ ovashunimonima.” Jehu okwa li a ongaleka ovalongeli vaBaal aveshe mongulu yaBaal nokwa li e va lombwela va djale omidjalo da faafana molwaashi ka li a hala va pitililwe po koshiningwanima osho. “Eshi a mana elongekido lexwikiloyambo,” okwa li a lombwela ovakwaita 80 va dipae ovalongeli vaBaal. Opo nee, okwa li a hanaunifa po otembeli yaBaal noya li ya ningwa okandjuwo nokaya li vali tai dulu okukala onhele yelongelokalunga. — 2 Eeh. 10:20-27.
Jehu okwa li a tilashi shili ohonde ihapu, ndele nande ongaho, okwa popiwa mOmishangwa kutya okwa li omulumenhu omuladi oo a li a mangulula Ovaisrael moupika waIsabel noukwaneumbo wavo. Nonande ngeno Jehu haye a li a ninga oshinima osho, Israel okwa li ashike e na okumangululwa komuwiliki omuladi nomukwanyati. Emboitya limwe lOmbibeli ola ti: “Osho osha li oshilonga shidjuu nosha li sha longwa nopehe na okwoongaonga. Ngeno kapa li pa ningwa eenghendabala da kwata moiti, otashi dulika ngeno elongelokalunga laBaal inali xulifwa po muIsrael.”
Nopehe na omalimbililo, otashi dulika wa mona kutya eenghalo odo hadi shakenekwa kOvakriste kunena otadi va pula va ulike omaukwatya onhumba a fa oo a li e niwe kuJehu. Pashihopaenenwa, otu na okulinyenga ngahelipi ngeenge hatu yelekwa tu ninge oinima oyo Jehova a tokola? Otu na okukala hatu ningi omatokolo meendelelo nonouladi tuha ninge oinima ya tya ngaho. Etilokalunga oli na alushe oku tu linyengifa tuhe lididimikile keshe osho tashi shekifa Jehova.
KALA HO WILIKWA KEEMHANGO DAJEHOVA
Osho sha hokololwa pexulilo lehokololo eli oshi li elondwelo kufye. Ombibeli oya ti kutya Jehu “ine liteeka keenhana doingoldo da li muBetel nomuDan.” (2 Eeh. 10:29) Ndele mbela osha enda ngahelipi opo omulumenhu oo a li e na ouladi welongelokalunga la koshoka a ka ninge omulongeli woikalunga?
Jehu otashi dulika a li ta diladila kutya opo ouhamba waIsrael u kale wa manguluka ko kwaau waJuda, ou na okukala melongelokalunga la yooloka ko kwaali louhamba waJuda. Onghee hano, okwa li a ningifa ovanhu va longele onhana ngaashi eehamba dikwao daIsrael da li da ninga. Ndele osho otashi ulike kutya ka li e na eitavelo la kola muJehova oo a li e mu ninga ohamba.
Jehova okwa li a pandula Jehu molwaashi ‘a li a ninga eshi sha yuka momesho aye.’ Ndele nande ongaho, Jehu “ina diinina nokweenda nomutima aushe momhango yOmwene Kalunga kaIsrael.” (2 Eeh. 10:30, 31) Ngeenge owa diladila kwaashishe osho Jehu a ninga metetekelo, otashi dulika osho a ka ninga lwanima shi ku kumwife noku ku nyikifa oluhodi. Ndele osho a ninga oshi li elondwelo kufye. Katu na nande okukwata okahetengi ekwatafano letu naJehova! Otwa pumbwa okukulika oudiinini kuTate yetu womeulu efiku keshe mokukala hatu konakona eendjovo daye, hatu dilonga kudo nokwiilikana tashi di komutima. Onghee hano, natu kendabaleni okukala hatu wilikwa keemhango daJehova nomutima aushe. — 1 Kor. 10:12.
[Oshimhungu pepandja 4]
Ehokololo laJehu moishangomwa yomounyuni yopandjokonona
Luhapu ovakembauli ohava pula ngeenge ovanhu ovo va popiwa mOmishangwa oko ngoo va li shili. Kakele kOmbibeli, mbela ope na ngoo eedjo dimwe domauyelele odo tadi kokele ehokololo li na sha naJehu?
Ope na oishangomwa itatu lwaapo yaAssiria shonale oyo ya tumbula kedina ohamba oyo yaIsrael. Mushimwe shomoishangomwa oyo vati omu na efano laJehu ile tashi dulika laumwe womovatumwa vaye, ta twile eengolo ohamba yaAssiria yedina Salmaneser III nota yandje eeshali. Eshangelo olo li li pefano olo otali ti: “Eeshali odo nda pewa kuJehu [Ia-ú-a] omona waOmri (Hu-um-ri); oda li oshisilveri, oshingoldo, okayaxa koshingoli kosaplu, oshikwatelwa sheengala shoshingoli sha honga koshitako, omakopi oshingoli, omavela oshingoli, ondooxa, onhaili yohamba [nosho yo oshinima shonhumba sha hongwa moshiti hashi ifanwa] puruhtu.” Jehu ka li lelalela “omona waOmri” ndele outumbulilo oo owa li ashike hau longifwa okuulika keshikulafano leehamba daIsrael, tashi dulika molwaashi Omri a li a fimana nosho yo eshi a li a tunga oshilandopangelo shaIsrael, Samaria.
Kape na vali oumbangi umwe oo tau ulike kutya Jehu okwa li a pa shili ohamba yaAssiria oinima oyo. Ndele nande ongaho, ohamba oyo oya tumbula Jehu lwoikando itatu, ngaashi moshishangomwa shonhumba, koshihongwafano shaSalmaneser nosho yo membo londjokonona youhamba waAssiria. Eedjo odo domauyelele oda koleka oushili kutya Jehu oo a popiwa mOmbibeli oko a li shili.