Ohambanghainhu ikolokoshi ya handukilwa

Ohamba Ahab oya li hai kala i wetele mekende lombala yayo muJisreel oshikunino shomandjebele shomulumenhu wedina Nabot. Ahab okwa li a hala oshikunino shomandjebele osho, nokwa kendabala oku shi landa ko kuNabot. Ashike Nabot okwa li a anya oku shi landifa po molwaashi ngeenge omunhu okwa landifa po edu olo la fyuululwa, okwa li ta nyono Omhango yaJehova. Mbela Ahab okwa li ngoo a fimaneka Nabot eshi a ninga oshinima shi li mondjila? Ahowe, Ahab okwa li a handuka neenghono, ndele ta kala ashike a nangala noka li a hala okulya.

Omukulukadi waAhab omukolokoshi, ohambanghainhu Isebel, okwe mu lombwela a ti: ‘Ove ohamba yaIsrael. Oto dulu okumona keshe osho wa hala. Ohandi unganeke ashike oinima opo u mone edu olo.’ Opo nee Isebel okwa shangela ovakulunhu vomoshilando omo ndele te va lombwele va lundile Nabot kutya okwa sheka Kalunga ndele tave mu dipaa nomamanya. Ovakulunhu ova li va ninga naanaa ngaashi va lombwelwa. Opo nee Isebel okwa li a lombwela Ahab ta ti: ‘Nabot okwa fya, oshikunino shomandjebele oshoye.’

Kakele kuNabot, Isebel okwa li a dipaa ovanhu vahapu vehe na etimba. Okwa li yo a dipaa ovanhu vahapu ovo ve hole Jehova. Isebel okwa li ha longele oikalunga nokuninga oinima imwe vali ii. Jehova okwa li e wete oinima aishe ii oyo Isebel a li ta ningi. Jehova okwa li ta ka ninga po shike shi na sha naye?

Konima eshi ohamba Ahab ya fya, omonamati wayo Joram okwa li a ninga ohamba. Jehova okwa li a tuma omulumenhu wedina Jehu a ka katukile Isebel noukwaneumbo wavo onghatu.

Jehu okwa li a ya netemba laye fiyo okuJisreel, oko haku di Isebel. Joram okwa li e mu shakeneka netemba ndele te mu pula ta ti: ‘Ope na ngoo ombili pokati ketu naave?’ Jehu okwa nyamukula ta ti: ‘Itapa kala ombili molwaashi meme woye Isebel ota ningi oinima ii.’ Joram okwa tanauna etemba laye opo ngeno a ye, ndele Jehu okwa yasha Joram noshikuti ndele ta fi.

Opo nee Jehu okwa ya kombala yaIsebel. Eshi Isebel a li a uda kutya Jehu oku li mondjila, okwa li e lifeweka moshipala, ta ningi nawa eexwiki daye ndele ta teelele pekende laye lopombada. Eshi Jehu a fika, Isebel okwe mu popifa nodino. Jehu okwa ingida ovapiya vaIsebel ovo va li ofika popepi naye ta ti: ‘Mu ekeleni pedu!’ Ova undulila Isebel mekende, ndele ta wile pedu nokufya.

Konima yaasho, Jehu okwa ka dipaa ovanamati 70 vaAhab nokuwapeka onhele oyo kwa li hai longelwa Baal. Mbela ku wete kutya Jehova oku shii keshe shimwe, nonokutya pefimbo laye la wapala ota ka hanauna po aveshe ovo hava longo owii?