Vamwe ohava ti Harmagedon oshike?

“Odo de di ongaleka ponhele hai ifanwa mOshiheberi Harmagedon.”— EHOLOLO 16:16.

OHO diladila shike ngeenge wa udu oshitya “Harmagedon”? Otashi dulika u diladile koshiponga shinenenene. Nonande oshitya osho osha holoka mo ashike lumwe mOmbibeli, ohashi longifwa luhapu moikundaneki nosho yo kovawiliki vomalongelokalunga.

Oinima oyo hai popiwa apeshe shi na sha naHarmagedon otai tu ngoo kumwe naasho Ombibeli tai hongo? Osha fimanenena okushiiva enyamukulo lepulo olo. Omolwashike mbela? Omolwaashi okushiiva oshili kombinga yaHarmagedon otaku dulu oku ku kwafela uha kale wa tila inashi pumbiwa. Otaku ku kwafele yo u kale u na etimaumbwile la twa li na sha nonakwiiwa notaku ka nwefa mo etaleko loye li na sha naKalunga.

Natu ka tale komapulo atatu taa landula apa, nokutala ngeenge oinima oyo hai popiwa apeshe shi na sha naHarmagedon otai tu ngoo kumwe naasho Ombibeli tai hongo shili.

1. MBELA HARMAGEDON OSHIPONGA SHA ETIFWA KOVANHU?

Ovatoolinghundana novaningi vomakonakono ohava longifa luhapu oshitya “Harmagedon” ngeenge tava hokolola oiponga oyo hai etifwa kovanhu. Pashihopaenenwa, Oita yotete nOita Itivali yOunyuni oya kala haku tiwa kutya oyo Harmagedon. Konima yoita oyo, ovanhu ova li tave lipula kutya Oilongo ya Hangana nosho yo Soviet Union otai ka lwifafana noilwifo yopalute. Oikundaneki oya li tai ti kutya onghalo ya tya ngaho oyo ya li tai dulu okuholoka po oyo “Harmagedon a etifwa koilwifo yopalute.” Kunena, ovakonakoni ovo va tila kutya enyateko otali ka etifa omalunduluko manene onghalo yomhepo kombada yedu, otava londwele kutya otape ke uya “Harmagedon ta etifwa konghalo yomhepo.”

Omapopyo oo okwa hala okutya shike?: Ovanhu otava dulu okuufa filufilu onakwiiwa yedu nosho yo yoinima aishe i na omwenyo oyo i li ko. Ngeenge omapangelo okwa kala inaa katuka pandunge, edu otali ka nyonauka fiyo alushe.

Ombibeli otai hongo shike?: Kalunga ita ka efa ovanhu va hanaune po edu. Ombibeli otai tu shilipaleke kutya Jehovaa ina shita edu “li kale ombuwa,” ndele okwe li shita “li kalwe.” (Jesaja 45:18) Ponhele yokweefa edu li hanaunwe po filufilu kovanhu, Kalunga ota ka ‘nyona po ava hava nyono edu.’— Ehololo 11:18.

2. MBELA HARMAGEDON OSHIPONGA SHOPAUSHITWE?

Ovatoolinghundana omafimbo amwe ohava longifa oshitya “Harmagedon” okuyukifa koiponga inene yopaushitwe. Pashihopaenenwa, mo 2010, umwe okwa li a kundaneka kombinga “‘yaHarmagedon’ moHaiti.” Kungaho, okwa li ta hokolola okumona oixuna, ehanauno nosho yo ovanhu ovo va kanifa eemwenyo davo mekakamo ledu linene olo la li la denga oshilongo osho. Ovatoolinghundana novadani veefilima ihava longifa ashike oshitya osho ngeenge tava popi oinima oyo ya ningwa nale, ndele ohave shi yukifa yo kwaayo tava diladila kutya oi na oupu okuningwa. Pashihopaenenwa, ohava longifa oshitya “Harmagedon” tava popi koidjemo oyo tava diladila kutya otai dulu okweetifwa konyofi oyo tai dulu okuwila kedu.

Omapopyo oo okwa hala okutya shike?: Harmagedon oshiningwanima osho tashi dulu okuholoka ombadilila keshe pamwe nohashi twaalele eemwenyo dovanhu ovo vehe na ondjo. Ito dulu lela okuninga po sha opo u liamene.

Ombibeli otai hongo shike?: Harmagedon ke fi oshiningwanima osho hashi dipaa ovanhu keshe pamwe. Ponhele yaasho, pefimbo laHarmagedon, ovakolokoshi ovo ashike tava ka hanaunwa po. Ombibeli otai udaneke kutya mafiku “omuhenakalunga ita kala po vali, nonganga to talaatala onhele yaye, ke po vali nande.”— Epsalme 37:10.

3. MBELA KALUNGA OTA KA HANAUNA PO EDU PUHARMAGEDON?

Ovanhu vahapu ovo ve li momalongelokalunga ova itavela kutya ovayuki novakolokoshi otava ka lwifafana ndele tashi etifa exulilo ledu. Omakonakono oo a ningwa kOilongo ya Hangana kehangano ledina Princeton Survey Research Associates otaa ulike kutya eepersenda 40 dovakulunhu ovo va pulwapulwa oda itavela kutya ounyuni otau ka xula po “poita yaHarmagedon.”

Omapopyo oo okwa hala okutya shike?: Ovanhu inava shitwa va kale kombada yedu fiyo alushe nedu inali shitwa li kale fiyo alushe. Kalunga okwa shita ovanhu nelalakano opo xuuninwa aveshe va fye.

Ombibeli otai hongo shike?: Ombibeli oya popya sha yela kutya Kalunga “edu owe li shitila keengudi dalo, lo li ha tengauke nande fiyo alushe.” (Epsalme 104:5) Shi na sha nokukaliwa kwedu, Ombibeli oya ti: “Ovayuki, vo otava ka fyuulula [edu, NW], ndee tava kala mo alushe.”— Epsalme 37:29.

Osha yela kutya oinima oyo hai popiwa apeshe shi na sha naHarmagedon itai tu kumwe naasho Ombibeli tai ti. Ndele mbela oshili kombinga yaHarmagedon oilipi naanaa?

[Eshangelo lopedu]