Oshike sha puka shi na sha noumhulile?

Okudja fimbo Barbaraa a li munini, okwa kala ha mono omamoniko, ha udu omawi nokwa li a tomhwa a itavele kutya oha kwatafana novapambele vaye ovo va fya. Ye nomushamane waye Joachim ova kala hava lesha omambo e na sha noumhulile nova kala hava tengeneke onakwiiwa yavamwe tava longifa oukalata voumhulile hava ifanwa tarot. Onghee hano, ova li va hovela okunyanekela nova li va likola oimaliwa ihapu. Efiku limwe, oukalata ova li ve va londwela kutya peumbo lavo otape ke uya ovanhu va nyika oshiponga nosho yo nghee ve na okuliamena.

NONANDE oumhulile otashi dulika u kale tau monika wa fa oshinima shonghuluyonale, ovanhu vahapu ove na ohokwe muo natango. Ovanhu vahapu ohava djala oiketi, ohava tale mokakola nohava i kovapopi neemhepo doonakufya opo va ka konge elao ile va amenwe kowii. Oshitukulwa shimwe sha li moshifokundaneki shaNdowishi shedina Focus, koshi yokapalanyole “Laptop and Lucifer,” osha ti: “Ointaneta otai ningifa ovanhu vahapu va kale ve na ohokwe inene moinima i na sha noumhulile.”

Mbela ou shii ngoo kutya Ombibeli oya popya shi na sha noumhulile? Osho ya popya shi na sha nao otashi dulika shi ku kumwife.

Osho Ombibeli ya popya shi na sha noumhulile

Kalunga okwa li a pa oshiwana shaye shonale shaIsrael omhango, a ti: “Mokati keni mu ha kale nande umwe, . . . ou ha diinine oundudu ile enyanekelo ile ta xunganeke omadidiliko ile ta pulike ile ta longifa oupule ile ta pula keemhepo dovafi ile komhepo yovashitukifi ile ta kongo omapukululo kovafi. Osheshi keshe ou ta longo oinima oyo, oye oixuna koshipala shOmwene.” (Deuteronomion 18:10-12) Mbela omolwashike Kalunga e li omhinge filufilu nelongifo loumhulile?

Ngaashi oshihopaenenwa osho sha hokololwa metetekelo, ovanhu vahapu ova itavela kutya ovanamwenyo otava dulu okukwatafana novafi nonokutya omauyelele oo haa yandjwa okupitila moumhulile ohaa di kovafi. Ova itavela oshinima sha tya ngaho molwaashi omalongelokalunga mahapu ohaa hongo ovanhu kutya oonakufya ohava ka twikila okukala nomwenyo monhele yoishitwa yopamhepo. Ashike Ombibeli itai yambidida ehongo olo nandenande, oya ti: ‘Oonakufya inava shiiva nande sha.’ (Omuudifi 9:5) Oya yelifa yo kutya oonakufya ove li ashike ngaashi ovanhu va kofa eemhofi doshitula, ovo vehe shii nandenande kutya oshike tashi ningwa pomudingonoko wavo.b (Mateus 9:18, 24; Johannes 11:11-14) Ndele ngeenge osho shi li ngaho shili, otashi dulika u pule to ti, Ovanhu ovo va pita meenghalo da tya ngaho ile hava longifa eenghono dihe fi dopaushitwe ohave di hange peni? Na oolyelye lela hava kwatafana novanhu va tya ngaho?

Omunhu ota dulu okupopya noishitwa yopamhepo

Omahokololo Omavangeli otaa ulike kutya eshi Jesus a li kombada yedu okwa li ha dulu okupopya noishitwa yopamhepo. Pashihopaenenwa, mEvangeli laMarkus 1:23, 24 omwa popiwa ‘omhepo ya nyata’ oyo ya li ya lombwela Jesus tai ti: “Ondi ku shii”! Onghee hano, kape na omalimbililo kutya naave odi ku shii. Ndele mbela ove ou di shii ngoo?

Nale fimbo Kalunga ina shita ovanhu, okwa li a shita ovana vaye vopamhepo, ile tu tye, ovaengeli. (Job 38:4-7) Ovanhu ove dulike kokule kovaengeli. (Ovaheberi 2:6, 7) Ovaengeli ove na eenghono dinene, ounghulungu muhapu nova shitwa opo va wanife po ehalo laKalunga. Omupsalme umwe okwa imba ta ti: “Ovaengeli vaye nye, hambeleleni Omwene, ovaladi ovanaenghono nye, oonakuwanifa vondaka yaye.” — Epsalme 103:20.

Ombibeli oya popya kutya mokweendela kwefimbo, vamwe vomovaengeli ova li va hovela okuninga omakwatafano novanhu monghedi oyo inai hokiwa kuKalunga. Mbela ova li ve shi ninga nelalakano lashike? Omweengeli umwe okwa li a longifa ekonda opo a heke ovanhu votete, Adam naEva, ve liteeke po Kalunga Omushiti wavo. Kungaho, okwe lininga ye mwene Satana Ondiaboli, omulundili nomupataneki waKalunga. — Genesis 3:1-6.

Konima yefimbo, ovaengeli vamwe vali ova li “va fiya po omitumba davo” meulu ndele tava djala omalutu opanhu nokunangala novakainhu vawa kombada yedu. (Judas 6; Genesis 6:1, 2) Ovaengeli ovo ovanashibofa novana vavo veehonde mbali ova li hava hepeke ovanhu neenghono, nedu ola li la “yada oukolokoshi.” Otashi dulika u shii nawa ehokololo lOmbibeli li na sha nanghee Kalunga a li a xulifa po epupi olo likolokoshi nEyelu pefimbo laNoa. — Genesis 6:3, 4, 11-13.

Omeva eyelu okwa li a fininika oishitwa yopamhepo i lidule omalutu opambelela ndele tai shuna monhele omo hamu kala oishitwa yopamhepo. Ashike Omushiti ka li ei pitika i shune ‘komitumba dayo vene.’ Ponhele yaasho, oya li ya undulilwa monhele oyo tai yelekanifwa “nomambulukwena omulaulu.” (2 Petrus 2:4, 5) Ombibeli oya popya kutya ovaengeli ovo ovanashibofa ove li “eendemoni.” (Jakob 2:19) Eendemoni odo odo tadi xumifa komesho oumhulile.

Osho eendemoni da lalakanena okuninga

Elalakano leemhepo dowii odo da li da kwatafana novanhu ola li oku va amuna ko kuKalunga kashili, Jehova. Eenghono odo eemhule dihapu hadi liti kutya odi na, otadi imbi ashike ovanhu va mone eshiivo lashili kombinga yaKalunga nokukala ve na ekwatafano naye.

Elalakano etivali leendemoni oli liwetikile monghedi omo omupangeli wado, Satana, a li a yeleka Jesus. Satana okwa li a hala okupa Jesus “omauhamba aeshe omounyuni nefimano lao.” Mbela Satana okwa li a hala Jesus e mu ningile shike opo e mu pe omauwa oo? Okwa li a pula Jesus e mu ‘twile eengolo noku mu linyongamene.’ Osho otashi ulike kutya Satana neendemoni daye ova hala shili okulongelwa. Ashike Jesus ka li a dimina okweefa po Kalunga nosho yo elongelokalunga lashili. — Mateus 4:8-10.

Kunena eemhepo dowii ihadi udanekele naanaa ovanhu oinima odikilila. Ponhele yaasho, ohadi kala da hala okuyula ovo inava lungama okupitila moinima oyo tai monika ya fa inai nyika oshiponga, ngaashi okutala momukonda, oiketi, okutala mokakola, okufatulula omifinda dopomake nokutengeneka osho to ka ningilwa monakwiiwa she likolelela pefimbo olo wa dalwa. Hano kala wa lungama uha yulwe keemwiyo da tya ngaho! Hado oupitilo wokuya monhele inai shiivika omo to ka pewa eenghono donhumba dihe fi dopaushitwe. Eemhepo dowii ohadi longifa oumhulile monghedi oyo tai nane nelalakano opo di yule ovanhu noku va amuna ko kuJehova. Ngeenge elalakano lado olo inali wanifwa, luhapu ohadi hepeke nokulongela oushada ovo va yulwa keluviluvi lado lopafaneko. Ndele ngeenge ode ku yula nale, mbela oshike to dulu okuninga po opo u manguluke ko kudo?

Oshike to dulu okuninga po opo u manguluke ko koumhulile?

Dimbuluka kutya eemhepo dowii odo hadi popi novanhu odi li ovatondi vaKalunga noda teelela ehanauno. (Judas 6) Odo ouyoka vomedu nodi na oipupulu; ohadi liningifa da fa oonakufya. Mbela oto ka kala u udite ngahelipi ngeenge owe shi mono mo kutya mboli kaume koye okayoka komedu nokwa hala ashike oku ku yula opo uha yandje elitulemo koinima oyo tai ku etele ouwa shili? Ile oto ke linyenga ngahelipi ngeenge owe shi mono mo kutya mboli omunhu ou wa panga naye oukaume okupitila mointaneta okwa hala ashike okuya naave momilele da nyata? Okuya momwiyo weendemoni osha nyika oshiponga neenghono shi dulife opo. Onghee hano, owa pumbwa okuninga eenghendabala da mana mo opo u manguluke ko kudo. Ngahelipi mbela?

Eshi ovakalimo vamwe vomuEfeso shonale va li ve lihonga mOmishangwa kutya oumhulile owa puka, ova li va hanauna po omambo avo oumhulile nonande okwa li a kosha oimaliwa ihapu. Ombibeli oya ti kutya ove a “xwika po moipafi yovanhu.” (Oilonga 19:19, 20) Kunena, ovanhu ihava longifa ashike oinima i na sha noumhulile ngaashi omambo, oiketi, okutala momukonda naikwao ihapu, ndele ohava longifa yo oinima yopaelektronika. Onghee hano, kala kokule nakeshe osho tashi dulu oku ku ningifa u kufe ombinga moumhulile.

Dimbuluka ovalihomboli ovo va tumbulwa pehovelo loshitukulwa eshi. Oukalata vavo ova li ve va ulikila kutya ope na ovanhu va nyika oshiponga va finda keumbo lavo nove va lombwela yo vaha pwilikine kuvo novaha tambule nande osha. Ndele nande ongaho, eshi Connie naGudrun vamwe vomEendombwedi daJehova va li ve uya peumbo lavo noku va lombwela kutya ove va etela onghundana iwa i na sha naKalunga, Joachim naBarbara ova li va tokola okupwilikina kuvo. Eenghundafana davo oda ka kwatela mo oumhulile, na Connie naGudrun ova li va yandja ouyelele washili u na sha naasho Omishangwa tadi ti kombinga youmhulile. Okudja opo, ova kala hava ningi eenghundafana navo dOmbibeli pandjikilile.

Diva konima yaasho, Joachim naBarbara ova li va tokola okuxulifa po ekwatafano keshe ve na neendemoni. Eendombwedi oda li de va londwela kutya eendemoni itadi ka hokwa oshinima sha tya ngaho. Shilishili, Joachim naBarbara ova ka hangwa komaudjuu nova kala tava ponokelwa nokuningilwa omatilifo keendemoni. Ova ka kala oule wefimbo tava piyaanekwa keendemoni oufiku keshe nova ka pepelelwa ashike kanini eshi va tembukila keumbo limwe. Nonande ovalihomboli ovo ova li moupyakadi, ova li va tula elineekelo lavo meendjovo dOvafilippi 4:14, odo tadi ti: “Aishe ohandi i dulu [omolwaau, NW] ta pameke nge.” Jehova okwa li a nangeka noupuna eenghendabala davo, nohauxuuninwa eendemoni oda efa po oku va hepeka. Paife Joachim naBarbara otava longele Kalunga kashili, Jehova, va hafa.

Omishangwa oda ladipika aveshe ovo tava ka nangekwa noupuna kuJehova tadi ti: ‘Dulikeni kuKalunga, kondjifeni Satana, ndele ye te mu i onhapo. Eheneni kuKalunga, opo nee Ye ta ehene kunye.’ (Jakob 4:7, 8) Ngeenge owa hala okumanguluka ko kenwefemo leendemoni, Jehova Kalunga ota dulu note ke ku kwafela. Shimha Joachim naBarbara tava diladila kunghee va li va kwafelwa va efe po oumhulile, ohava dimine filufilu eendjovo dEpsalme 121:2, odo tadi ti: “Ekwafo lange otali di kOmwene.”

[Omashangelo opedu]

[Ouyelele u li pepandja 21]

Oumhulile ohau imbi ovanhu va kale ve na ekwatafano liwa naKalunga

[Ouyelele u li pepandja 22]

“Eheneni kuKalunga, opo nee Ye ta ehene kunye.” — JAKOB 4:8.