Ovaleshi tava pula . . . 

Olyelye a li a tuma “onyofi”?

▪ Mbela owa mona nale oshinyandwa shedalo laJesus ile sheehamba 3 ile ovalumenhu ovanaendunge tava talele po ohanana Jesus ya nangekwa metemba lokulila oimuna? Ehokololo otali ti kutya Kalunga okwa longifa onyofi oku va ulikila ondjila ya finda koshiunda shi li muBetlehem. Moilongo imwe, ounona ohava hongwa nokuli okukala ve shii momutwe omadina eehamba odo 3, Melchior, Caspar naBaltazar. Mbela ehokololo olo la shiivika kuvahapu otali tu ngoo kumwe naasho Ombibeli tai hongo lela? Hasho, molwaashi meembinga dihapu kali li paushili.

Shotete, mbela ovalumenhu ovo ova li oolyelye? Melaka lopehovelo lOshigreka, Ombibeli inai va popya ve li eehamba ile ovanaendunge. Ova li eemhule, ovapaani ovanyanekeli veenyofi. Ombibeli inai tumbula omadina ile omuvalu wovatalelipo ovo.

Oshitivali, ovalumenhu ovo ova li va talela po naini? Hapefimbo Jesus a li ohanana ya nangekwa metemba lokulila oimuna. Otu shi shii ngahelipi? Omushangi wEvangeli Mateus okwa ti: ‘Ova ya meumbo ndee tava mono mo okaana naina yako, Maria.’ (Mateus 2:11) Didilika kutya Jesus ka li vali ohanana, ndele “okaana.” Maria naJosef kava li vali hava nangala moshiunda, ndele ponhele yaasho, ova li hava di meumbo.

Oshititatu, olyelye a li a tuma “onyofi” oyo ya li ya kwatela komesho ovanyanekeli veenyofi? Ovawiliki vomalongelokalunga okunena ohava hongo kutya Kalunga oye a li a tuma “onyofi.” Mbela oye ngoo shili a li e i tuma? Dimbuluka kutya “onyofi” ka ya li ya twala tete ovanyanekeli veenyofi ovo kuBetlehem. Ndele oya li ye va twala kohamba Herodes kuJerusalem. Ova li va holola okukala po kwaJesus kohamba oyo inandubo, inaenghono noidipai nove i pa nokuli etomhelo la kola lokutonda okaana eshi va popya kutya oka li taka ka ninga “ohamba yOvajuda.” (Mateus 2:2) Herodes okwa li e va lombwela nekoto va alukile kuye ve uye ve mu lombwele kondadalunde kutya okaana oko otaka hangika peni, a ti kutya naye okwa hala oku ke ka fimaneka. Opo nee “onyofi” oye va kwatela komesho fiyo okooJosef naMaria. Osho ovanyanekeli veenyofi va li tava ningi osha li ngeno tashi ka dipaifa okaana, ngeno Kalunga ka li a ya mo olunyala. Ashike Kalunga okwa li a ya mo olunyala. Molwaashi ovanyanekeli veenyofi inava alukila ko kuHerodes, okwa li a handuka neenghono ndele ta tumu kuBetlehem nokomikunda dasho adishe ku dipawe ounona aveshe voumati vomido 2 okuyuka pedu. — Mateus 2:16.

Jehova okwa li a popya lwanima shi na sha naJesus a ti: “Ou Omona wange omuholike, onde mu hokwa.” (Mateus 3:17) Diladila kwaashi: Mbela Xe omunahole nomuyuki ota hoolola ngoo ovapaani ovanyanekeli veenyofi, ovo hava longifa oumhulile oo wa tokolwa mOmhango yaye, va kale ovatumwa vaye? (Deuteronomion 18:10) Mbela ota longifa ngoo onyofi opo i va twale komunhu a nyika oshiponga, omunaenghono nomudipai moshilongo, va twale etumwalaka olo e shii kutya otali ka xwaxwameka outondwe nondubo yaHerodes? Mbela Kalunga ota ka longifa ngoo onyofi oyo nosho yo ovanyanekeli veenyofi a holole onhele opo pe na omona oo ita dulu okuliamena?

Oku shi faneka: Natu tye nee ngeno ondjai yetangakwaita oya tuma omukwaita wayo oo e na owino wokulwa koshitukulwa shomutondi sha nyika oshiponga. Mbela ota ka hololela omutondi kutya omukwaita oo oku li peni? Hasho nandenande! Sha faafana, Jehova okwa li a tuma Omona mounyuni ou wa nyika oshiponga. Mbela ota ka hololela ngoo ohamba ikolokoshi Herodes apa pe na Omona oo a li okaana itaka dulu okuliamena? Hasho nandenande!

Ndele mbela olyelye a li a tuma “onyofi” ile oshinima osho sha li sha fa onyofi? Olyelye mbela a li e na ohokwe inene mokudipaifa okaana Jesus, te ka imbi ka kule noka wanife po oshilonga shako kombada yedu? Olyelye a hala okupukifa ovanhu, ta xumifa komesho oipupulu, elongifo leenghono nosho yo omadipao? Jesus okwa popya kutya ‘omunaipupulu naxe yayo nomudipai nghee a dja,’ oSatana Ondiaboli. — Johannes 8:44.