Etukulwa 7

Jesus novanongo veenyofi

OVALUMENHU vonhumba ovo va li va dja koshilongo shokOushilo ova li ve uya okutalela po Jesus. Ovalumenhu ovo ova li hava ifanwa ovanongo veenyofi, ovanhu ovo have liti kutya ohava fatulula omaityo eenyofi. Fimbo va li ve li koshilongo shavo kOushilo, ova li va mona onyofi ipe nova li ve i landula va enda eekilometa omafele fiyo okuJerusalem.

Eshi ovanongo veenyofi ovo va li va fika muJerusalem, ova li va pula va ti: “Ohamba yOvajuda, ya dalwa paife, oi li peni? Osheshi onyofi yayo otwe i mona koushilo, notwe uya okulinyongamena kuyo.”

Eshi ohamba Herodes yomuJerusalem ye shi uda, oya li ya handuka neenghono. Onghee hano, oya li ya ifana ovapristeri ovakulunhu ndele tai va pula kutya Kristus ota dalelwa peni. Ovapristeri ovo ova li va nyamukula she likolelela kOmishangwa va ti: “OmuBetlehem.” Eshi Herodes a uda eendjovo odo, okwa li a ifana ovanongo veenyofi ve uye kuye nokwa li e va lombwela a ti: “Indeni ko hano nye mu ka konge shili okaana; ndele ngenge mwe ka mona, lombweleni nge, naame yo ndi uye ndi linyongamene kuko.” Ndele paushili wovene, Herodes okwa li a hala okumona okaana oko opo e ka dipae.

Eshi ovanongo veenyofi va ya, opa li pa ningwa oshinima shikumwifi. Onyofi oyo va li va mona eshi va li kOushilo oya li natango i va kwetele komesho. Osha yela kutya onyofi oyo kaya li ngaashi eenyofi dikwao, ndele oya li ya longekidwa onomenawina opo i va wilike. Ovanongo veenyofi ova kala tava shikula onyofi oyo fiyo ya kanghama kombada yeumbo omo Josef naMaria va li hava di.

Eshi ovanongo veenyofi va ya meumbo omo, ova hanga mo Maria e li nokaana kaye, Jesus. Ovanongo veenyofi ovo ova li ve linyongamena Jesus nova li yo ve mu pa eeshali doshingoli, oidimba iwa nomirha. Eshi va li ve li pokushuna, opo ngeno va ka lombwele Herodes kutya okaana oke li peni, Kalunga okwa li e va londwela mondjodi kutya inava shuna kuHerodes. Onghee hano, ova li va ya nondjila imwe i lili eshi va shuna koshilongo shambulavo.

Mbela oto diladila kutya olyelye a li a longekida onyofi oyo ya kala tai ende mewangadjo tai wilike ovanongo veenyofi? Dimbuluka kutya onyofi oyo kaya li ye va wilika odikilila fiyo okuJesus muBetlehem, ndele oya li ye va wilika fiyo okuJerusalem oko va ka shakena nohamba Herodes, oo a li a hala okudipaa Jesus. Ngeno Kalunga ka katukile onghatu shi na sha naasho, ndele ta londwele ovanongo veenyofi vaha lombwele Herodes kutya Jesus oku li peni, ngeno Herodes okwa dipaa Jesus. Onghee hano, Satana Ondiaboli, oo e li omutondi waKalunga, oye a li a hala okudipaa Jesus, nokwa li a longifa onyofi oyo opo ngeno a wanife po elalakano laye. Mateus 2:1-12; Mika 5:1.

▪ Oshike tashi ulike kutya onyofi oyo ovanongo veenyofi va li va mona kaya li ya fa eenyofi dikwao?

▪ Jesus okwa li hadi peni eshi ovanongo veenyofi va li ve uya oku mu talela po?

▪ Otu shi shii ngahelipi kutya Satana oye a li a longekida onyofi oyo ya li ya wilika ovanongo veenyofi?