Ova shanga tava ‘wilikwa komhepo Iyapuki’

“Inapa etwa nande ouprofeti kehalo lomunhu, ndelenee ovanhu ovayapuki ova popya odo ve di pewa kuKalunga nokuwilikwa kOmhepo Iyapuki.” — 2 PET. 1:21.

OITWA YOKUDILONGA

Kalunga okwa li a taambekida ngahelipi etumwalaka laye kovashangi vOmbibeli okupitila momhepo iyapuki?

Omaumbangi elipi taa ulike kutya Ombibeli oya nwefwa mo kuKalunga?

Oshike to dulu okuninga keshe efiku opo u kale u na olupandu lEendjovo daKalunga?

1. Omolwashike twa pumbwa Eendjovo daKalunga da nwefwa mo?

OTWA dja naanaa peni? Omolwashike tu li kombada yedu? Oshike tashi ke tu ningilwa monakwiiwa? Omolwashike ounyuni u li ngaha? Oshike hashi tu ningilwa ngeenge otwa fi? Ovanhu mounyuni aushe ohave lipula omapulo a tya ngaho. Ndele mbela ngeno openi twa hanga omanyamukulo omapulo oo nosho yo makwao vali amwe a fimana ngeno katwa li tu na Eendjovo daKalunga da nwefwa mo? Ngeno katwa li tu na Omishangwa Diyapuki, ngeno ohatu lihongo ashike oinima okupitila moimoniwa yetu vene. Ndele ngeno inatu dula okufika pexulifodiladilo la faafana naalo lomupsalme umwe oo a popya shi na sha ‘nomhango yOmwene.’ — Lesha Epsalme 19:8.

2. Oshike tashi ke tu kwafela tu kulike ohokwe yetu yOmbibeli oyo i li oshali i na ondilo ya dja kuKalunga?

² Shinyikifa oluhodi, vamwe ova efa ohole yavo yokuhola oshili yOmbibeli i talale. (Yelekanifa nEhololo 2:4.) Kave na vali onghedi yokukalamwenyo oyo tai hafifa Jehova. (Jes. 30:21) Fye inatu efa nande tu ningilwe oshinima sha tya ngaho! Otu na okuninga eenghendabala tu kulike ohokwe yetu yOmbibeli nosho yo omahongo ayo. Ombibeli oyo oshali i na ondilo oyo twa pewa kOmushiti wetu omunahole. (Jak. 1:17) Ndele mbela oshike tashi ke tu kwafela tu kulike olupandu letu lomoule li na sha ‘nOndjovo yaKalunga’? Shimwe osho sha fimanenena okuninga osho okudilonga kunghee ovashangi vOmbibeli va li va wilikwa opo ve i shange. Osho osha kwatela mo okukala hatu dilonga kombinga yomaumbangi mahapu oo taa koleke kutya Ombibeli oya nwefwa mo. Ngeenge otwa ningi ngaho, otashi ke tu linyengifa tu kale hatu lesha Eendjovo daKalunga efiku keshe nokutula moilonga omayele ado. — Heb. 4:12.

ONGAHELIPI OVASHANGI VOMBIBELI VA LI VA ‘WILIKWA KOMHEPO IYAPUKI’?

3. Ongahelipi ovaprofeti novashangi vOmbibeli va li va ‘wilikwa komhepo iyapuki’?

³ Ombibeli oya shangwa kovalumenhu 40 lwaapo momukokomoko womido da konda pe 1 610, okudja mo 1513 K.O.P. fiyo omo 98 O.P. Ovashangi vayo vamwe ova li ovaprofeti nova li va ‘wilikwa komhepo iyapuki.’ (Lesha 2 Petrus 1:20, 21.) Outumbulilo wOshigreka oo wa tolokwa “nokuwilikwa” otau yandje ediladilo lokuhumbata oshinima okudja konhele yonhumba tashi i kuikwao,” notau “dulu okutolokwa meenghedi da yoolokafana, ngaashi okulinyengifwa, okutelaanifwa ile okuliufa kewiliko lonhumba.”a Outumbulilo oo owa longifwa yo mOilonga 27:15 tau ulike kokutelaanifwa ile okutwalwaatwalwa kwombautu komakufikufi ya yukifwa konhele yonhumba. Ovaprofeti novashangi vOmbibeli ova li va ‘wilikwa komhepo iyapuki’ meityo olo kutya Kalunga oye a li a popya navo, e va twa omukumo noku va wilika okupitila momhepo yaye. Hano, inava shanga omadiladilo avo vene, ndele omadiladilo aKalunga. Fimbo limwe ovaprofeti novashangi vOmbibeli va nwefwa mo kava li nokuli ve shii eityo laasho tava xunganeke ile tava shange. (Dan. 12:8, 9) Onghee hano, ‘Omishangwa adishe oda yandjwa keenghono domhepo yaKalunga’ nokadi fi omadiladilo opanhu. — 2 Tim. 3:16.

4-6. Omeenghedi dilipi Jehova a li a taambekida etumwalaka laye kovashangi vOmbibeli? Yandja oshihopaenenwa.

⁴ Kalunga okwa li a taambekida ngahelipi etumwalaka laye kovashangi vOmbibeli okupitila momhepo iyapuki? Mbela okwa li e va lombwela oitya yokondadalunde ile omadiladilo ashike vo tave a shange noitya yavo vene? Diladila konghedi omo omunangeshefa ha dulu okushanga eenhumwafo. Ngeenge omunangeshefa oku wete sha pumbiwa, oha shange onhumwafo yaye kuye mwene ile a lombwele hamushanga osho e na okushanga ta tumbula oitya yokondadalunde. Hamushanga oha shange ashike osho a lombwelwa, ye omunangeshefa ta shaina. Peemhito dimwe, omunangeshefa oha yandje enenediladilo, ye hamushanga ta shange onhumwafo ta longifa oitya nomushangelo waye mwene. Okudja opo, omunangeshefa otashi dulika a leshulule mo nokulombwela hamushanga a ninge mo omalunduluko onhumba apa sha pumbiwa. Hauxuuninwa, onhumwafo ohe i shaina nongeenge omuleshi okwe i yakula, oha kala e i tala ko kutya oya dja komunangeshefa mwene.

⁵ Sha faafana, oitukulwa imwe yOmbibeli oya shangwa “nomunwe waKalunga.” (Ex. 31:18) Jehova okwa li yo ha lombwele ovashangi oitya yokondadalunde apa e wete sha pumbiwa. Pashihopaenenwa, Exodus 34:27 okwa ti: ‘Omwene okwa lombwela vali Moses ndee ta ti: Eendjovo edi di shangela mo, osheshi paendjovo edi Ame nda ninga ehangano nanye nOvaisrael.’ Natango, Jehova okwa li a lombwela omuprofeti Jeremia a ti: ‘Eendjovo adishe odo nde di ku lombwela di shangela membo.’ — Jer. 30:2.

⁶ Ndele peemhito dihapu, Jehova okwa li ha hololele ovashangi omadiladilo aye pashikumwifilonga nove na oku a shanga tava longifa oitya yavo vene, ponhele yoku va lombwela oitya yokondadalunde. Pashihopaenenwa, Omuudifi 12:10 okwa ti: “[Omuudifi] okwa hetekela okumona eendjovo da wapala, da shangwa da yuka, eendjovo doshili.” Omushangi wEvangeli Lukas naye okwa li a “konakona shili aishe ngaashi ya shikulafana kehovelo.” (Luk. 1:3) Omhepo yaKalunga oyo ya li tai wilike ovanhu ovo inava wanenena opo vaha lundulule etumwalaka laye.

7. Ounongo waJehova ou liwetikile ngahelipi monghedi omo a longifa ovanhu va shange Ombibeli?

⁷ Ounongo munene waKalunga ou liwetikile monghedi omo a li a longifa ovanhu va shange Ombibeli. Inai tu kwafela ashike tu ude ko etumwalaka olo li li mo, ndele otai tu hololele yo omaliudo ovashangi. Mbela omolwashike Jehova ina longifa ovaengeli okushanga Ombibeli? Mbela ngeno ove i shanga ngoo monghedi oyo tai kumu omaliudo ovanhu, ngaashi ngeenge tava holola outile, oluhodi ile enyemato? Kalunga okwa efa ovanhu inava wanenena va longife oitya yavo vene opo va shange etumwalaka laye monghedi yopahole notai kumu omutima.

OUMBANGI OO TAU ULIKE KUTYA OMBIBELI OYA NWEFWA MO

8. Omolwashike taku dulu okutiwa kutya Ombibeli oya yooloka ko komambo makwao opalongelokalunga?

⁸ Ope na oumbangi muhapu oo tau ulike kutya Ombibeli Eendjovo daKalunga da nwefwa mo. Mepingafano nomambo makwao opalongelokalunga, Ombibeli otai tu kwafele tu shiive nawa Kalunga. Pashihopaenenwa, omambo eitavelo lOshihindu otaa popi ashike kombinga yoinima ngaashi oivilo yavo yopalongelokalunga, oufilosofi, eengano nosho yo omifikamhango dopaenghedi. Omambo eitavelo lOshibuddha otaa yelifa eenghedi odo ovalumenhu novakainhu ovalikaleli omolwelongelokalunga ve na okudulika kudo. Ohaa yelifile yo ovanhu eitavelo lOshibuddha nosho yo omahongo aBuddha. Buddha ye mwene ine litya kutya oye kalunga noina popya shihapu kombinga yaKalunga. Omambo eitavelo laConfucius ohaa hongo ashike ovanhu ondjokonona, eenghedimhango, oumhulile nosho yo omaimbilo. Ope na yo embo limwe lOvamoslema olo tali hongo ovanhu kutya oku na Kalunga umwe oo e shii okanima keshe kombinga yonakwiiwa, ndele membo olo inamu tumbulwa nokuli edina laKalunga, Jehova, olo la holoka mOmbibeli lwoikando omayovi momalaka opehovelo.

9, 10. Ombibeli otai tu kwafele tu lihonge shike kombinga yaKalunga?

⁹ Nonande omambo mahapu opalongelokalunga ihaa tumbula shihapu kombinga yaKalunga, Ombibeli otai tu kwafele tu shiive nawa Jehova Kalunga nosho yo oilonga yaye. Otai tu kwafele yo tu shiive omaukwatya aye mahapu. Pashihopaenenwa, otai tu hololele kutya Kalunga omunaenghono adishe, omunongo, omuyuki nomunahole. (Lesha Johannes 3:16; 1 Johannes 4:19.) Kakele kaasho, Ombibeli otai tu lombwele tai ti: “Kalunga iha tale omunhu kombada. Ndele moshiwana keshe, keshe ou he mu tila ndee ta diinine ouyuki, ote mu wapalele.” (Oil. 10:34, 35) Pashihopaenenwa, okwaandjakanekwa kwOmbibeli otaku koleke oushili weendjovo odo. Ovashiivinawa vomalaka otava popi kutya kombada yedu kunena oku na omalaka 6 700 lwaapo, neepersenda 90 dovakwadu ohadi udu omalaka 100 lwaapo. Fiyo opapa, Ombibeli oya tolokwa ye lixwa po ile oitukulwa yayo, momalaka e dulife 2 400. Konyala keshe umwe mounyuni ota dulu oku i limonena.

¹⁰ Jesus okwa ti: “Tate ta longo fiyo paife, naame yo handi longo.” (Joh. 5:17) Diladila ashike kwaashishe osho Jehova Kalunga a longa, molwaashi Ombibeli oya ti kutya okwa kala “po alushe fiyo alushe.” (Eps. 90:2) Ombibeli oyo aike tai tu kwafele tu shiive nawa oilonga yaKalunga, kutya nee oyomonakudiwa ile oyopaife ile oyoyo ta ka wanifa po monakwiiwa. Omishangwa otadi tu hongo yo kutya Kalunga oku hole shike noku tonde shike nosho yo kutya ongahelipi hatu dulu okweehena popepi naye. (Jak. 4:8) Onghee hano, inatu pitika nande omahalo ile oisho yetu i tu efife po Jehova.

11. Ounongo muhapu nou shii okulineekelwa ulipi tau hangwa mOmbibeli?

¹¹ Ounongo muhapu nou shii okulineekelwa oo tau hangwa mEendjovo daKalunga otau ulike kutya Ombibeli oya dja kOdjo inenenene i dule dopanhu. Omuyapostoli Paulus okwa pula ta ti: “Olyelye a shiiva omadiladilo Omwene, e mu longe eendunge?” (1 Kor. 2:16) Ovelishe oyo oye likolelela kepulo lomuprofeti Jesaja oo a li a pula ovanhu vopefimbo laye ta ti: “Olyelye a pukulula Omhepo yOmwene, nokwe lininga omupukululi waye woku mu longa?” (Jes. 40:13) Nopehe na omalimbililo, kape na nande oumwe. Onghee hano, itashi kumwifa eshi okutula moilonga omayele Ombibeli haku etifa oidjemo iwa ngaashi oo e na sha neehombo, ounona, omalihafifo, eendafano, okulonga noudiinini, ounashili nosho yo eenghedi. Ombibeli ihai yandje omayele mai nandenande! Ndele omayele oo ovanhu hava yandje haalushe haa kala opandunge noihaa kwafa alushe. (Jer. 10:23) Omayele avo ohaa talululwa alushe nokupepalekwa shimha va didilike kutya kemawa. Ombibeli oya ti: ‘Omadiladilo ovanhu oo okaulapepo kongaho.’ — Eps. 94:11.

12. Eenghendabala dokuxulifa po Ombibeli dilipi da kala tadi ningwa oule womafelemido?

¹² Eenghendabala odo ovanhu va kala tava ningi monakudiwa nelalakano lokuxulifa po Ombibeli nado otadi koleke oushili oo kutya Omushangi wOmbibeli oKalunga kashili. Pashihopaenenwa, momudo 168 K.O.P. (paife pa pita omido 2180), ohamba yaAssiria yedina Antiochus IV oya li ya lombwela ovanhu va ongele omambo mayapuki Omhango noku a xwika po. Omupangeli waRoma umwe wedina Diocletian naye okwa li a yandja elombwelo lokuhanaunifa po eenhele dokwoongalela Ovakriste nokuxwika po Omishangwa davo mo 303 O.P. (paife pa pita omido 1709). Oshikonga osho osha li sha kwata oule womido omilongo. Omido 1000 nasha da pita, ovapapa ova li va ninga eenghendabala dokuya moshipala okutolokwa kwOmbibeli momalaka e lili noku lili molwaashi kava li va hala ovanhu ve lihonge Ombibeli. Nonande Satana novanhu vaye ova kala tava ningi eenghendabala da tya ngaho, inava dula okuxulifa po Ombibeli. Jehova ina efa nande oumwe a hanaune po oshali oyo a pa ovanhu.

OUMBANGI OO WA TOMHA VAHAPU

13. Oumbangi ulipi tau ulike kutya Ombibeli oya nwefwa mo?

¹³ Ope na vali omaumbangi amwe oo taa ulike kutya Ombibeli oya nwefwa mo kuKalunga, ngaashi okutwa kumwe kwayo, oshili moinima yopaunongononi, okuwanifwa kwomaxunganeko, ounashili wovashangi vayo, eenghono dayo dokulundulula oikala yovanhu, okutwa kumwe nondjokonona nokuyandja omanyamukulo taa mbilipaleke komapulo ngaashi oo a tumbulwa mokatendo kotete. Paife natu ka taleni koinima yonhumba oyo ya tomha oohandimwe va itavele kutya Ombibeli oya dja shili kuKalunga.

14-16. (a) Oshike sha kwafela Omumoslema, Omuhindu naao a li ina itavela muKalunga va kale va tomhwa kutya Ombibeli oya dja kuKalunga? (b) Oumbangi oo tau koleke kutya Ombibeli oya nwefwa ulipi u hole okulongifa ngeenge u li moukalele?

¹⁴ Anwarb okwa putukila melongelokalunga lOshimoslema moshilongo shimwe shokOushilo woPokati. Ndele efiku limwe fimbo a li e uya okutalela po muAmerika lokOlundume, peumbo lavo opa li pa kongholwa kEendombwedi daJehova. Anwar okwa ti: “Pefimbo opo, onda li ndi tonde Oukriste omolwomadipao oo va li va kufa ombinga muo nomolweemhangu donale dongeleka yaKatoolika dokuhandukila ovo va puka mo meitavelo lOshikatolika. Ndele nande ongaho, onda li nda dimina okukonakona Ombibeli omolwokatalekonawa.” Konima yokafimbo kaxupi, Anwar okwa ka shuna koshilongo shavo noina ka kala vali ha talelwa po kEendombwedi. Konima yomido donhumba, okwa ka tembukila kuEuropa nokwa li a tamekulula vali ekonakonombibeli laye. Xuuninwa okwa ka tya: “Ewanifo lomaxunganeko Ombibeli, etwokumwe lOmishangwa Diyapuki, okuhakondjifafana kwOmbibeli nohole yovalongeli vaJehova oyo ya tomha nge kutya Ombibeli Eendjovo daKalunga shili.” Anwar okwa ninginifwa mo 1998.

¹⁵ Okakadona kedina Asha komido 16 oka li ka putukila moukwaneumbo wovalongelikalunga ovaladi meitavelo lOshihindu. Oka ti: “Onda li handi ilikana ashike ngeenge twa ya kotembeli ile ngeenge oinima itai endele nge nawa, ndele kanda li handi dimbuluka Kalunga nandenande ngeenge onghalamwenyo tai ende nawa.” Asha okwa twikila ko a ti: “Ndele onghalamwenyo yange oya ka lunduluka filufilu okudja eshi Eendombwedi daJehova da li de uya oku tu talela po meumbo letu.” Okwa li a hovela okukonakona Ombibeli nokwa ka shiiva nawa Kalunga e li Kaume kaye. Oshike mbela sha li sha tomha Asha a itavele kutya Ombibeli oya nwefwa kuKalunga? Okwa ti: “Ombibeli oya li ya nyamukula omapulo ange aeshe. Oya li ya kwafela nge ndi kale nda itavela muKalunga nonande kandi mu wete nomesho okomutwe, sha hala okutya, nopehe na okuya kotembeli ndi ke linyongamene koshihongwafano.”

¹⁶ Paula okwa li a putukila mongeleka yaKatolika, ndele eshi a kula, okwa li a kwatwa komalimbililo e na sha nongeenge Kalunga oko ngoo e li shili. Ndele opa ka ningwa oshinima shimwe. Okwa ti: “Efiku limwe onda li nda shakeneka kaume kange oo twa kala inatu shakena naye oule weemwedi donhumba. Pefimbo opo, ovanhu vahapu okwa li ve hole eexwiki diledile nohava longifa oingangamifi. Ndele kaume kange oo okwa li ta monika shimwe shi lili, a kululwa nawa nokwa hafa. Opo nee, onde mu pula handi ti: ‘Omolwashike to monika shimwe shi lili, nowa ninga omafiku peni?’ Okwa li a lombwela nge kutya okwa kala ta konakona Ombibeli nEendombwedi daJehova nokwa hovela okupa nge oundombwedi.” Eshi Paula a mona nghee oshili yOmbibeli ya lundulula kaume kaye, naye okwa li a kulika ohokwe metumwalaka lOmbibeli nokwa ka kala a itavela vali muKalunga.

“ONDJOVO YOYE OYO OLAMBA YEEMHADI DANGE”

17. Okulesha Eendjovo daKalunga efiku keshe nokudilonga kudo otaku ke ku kwafela u ninge shike?

¹⁷ Ombibeli oshali ihokwifa oyo Jehova a pa ovanhu okupitila momhepo yaye iyapuki. Kala ho nyakukilwa oku i lesha alushe, opo nee ohokwe yoye yOmbibeli nosho yo yOmushangi wayo otai ka kula. (Eps. 1:1, 2) Kala ho ilikana alushe fimbo ino hovela okulesha, to indile Kalunga e ku wilike okupitila momhepo yaye. (Luk. 11:13) Molwaashi omadiladilo aa e li mOmbibeli oaKalunga, omadiladilo oye nao otaa ka kala metwokumwe nomadiladilo aKalunga eshi to dilonga kwaasho wa lesha.

18. Omolwashike u na okutwikila okulihonga Ombibeli?

¹⁸ Eshi to twikile okuhapupalifa eshiivo lashili lOmbibeli, kala metwokumwe naasho to lihongo. (Lesha Epsalme 119:105.) Kala ho likonakona to longifa Eendjovo daKalunga ngaashi omunhu he litalele moshitengelelo. Ngeenge owa didilike kutya owa pumbwa okuninga elunduluko lonhumba, ino ongaonga oku shi ninga. (Jak. 1:23-25) Kala ho popile eitavelo loye to longifa Eendjovo daKalunga nokukwafela ovalininipiki va efe po omahongo oipupulu. (Ef. 6:17) Ngeenge to longifa Ombibeli, kala u udite etumba eshi ovaprofeti novalumenhu ovo ve i shanga va ‘wilikwa komhepo iyapuki.’

[Omashangelo opedu]

[Ouyelele u li pepandja 29]

Kala ho lesha Ombibeli keshe efiku, opo nee ohokwe yoye yOmbibeli noyOmushangi wayo otai ka kula

[Efano pepandja 26]

Onhumwafo ohai talika ko kutya oya dja kwaao e i shaina