Omolwashike Omuudi womailikano a efa okumona oixuna ku kale po?
NONANDE ovanhu vamwe otashi dulika hava ilikana, ova limbililwa ngeenge Kalunga oko ngoo e li shili. Mbela omolwashike va limbililwa? Otashi dulika omolwaashi ve wete mounyuni mu na okumona oixuna kuhapu neenghono. Mbela owe lipulile nale kutya omolwashike Kalunga a efa okumona oixuna ku kale po?
Mbela Kalunga okwa shita ovanhu inava wanenena ngaashi ve li paife nova kale tava mono oixuna? Nopehe na omalimbililo, kape na oo ta dulu okufimaneka kalunga oo a lalakanena ovanhu va mone oixuna. Ndele diladila kwaashi: Natu tye nee ngeno owa mona ohauto yonhumba ipe noihokwifa ndele to didilike kutya oya ndonyoka kombinga imwe, mbela oto ka tya omunduluki wayo oye e i ndonyona? Hasho nandenande! Otashi dulika u fike pexulifodiladilo kutya omunduluki wayo okwa li e i longa i li nawanawa nonokutya ope na umwe ile oshinima shonhumba osho she i ndonyona.
Sha faafana, ngeenge otwa hokwa onghedi omo eshito la shitwa nosho yo nghee la unganekwa nawa ndele hatu mono edundakano nenyonauko olo li li mokati kovanhu, mbela ohatu ka fika pexulifodiladilo lilipi? Ombibeli otai hongo kutya Kalunga okwa li a shita ovalihomboli votete va wanenena, ndele konima yefimbo ova li ve litwala menyonauko vo vene. (Deuteronomion 32:4, 5) Ashike otashi tu hekeleke okushiiva kutya Kalunga okwa udaneka kutya ota ka mangulula ovanhu ovaduliki menyonauko olo noku va alulila mewaneneno. Ndele omolwashike a teelela pa pite efimbo lile neenghono?
Omolwashike a teelela pa pite efimbo lile neenghono?
Enyamukulo lepulo olo ola kanghamena kepulo olo kutya olyelye e na okukala omupangeli wovanhu. Jehova i na lalakanena nandenande ovanhu va kale tave lipangele vo vene. Oye a li e na okukala Omupangeli wavo. Ombibeli oya ti: ‘Ondjila yomunhu ihai kala mepangelo laye mwene, ile mepangelo lomulumenhu, nhumbi ta ende, nhumbi ta yukifa eenghatu daye.’ (Jeremia 10:23) Shinyikifa oluhodi, ovanhu votete ova li va tukululila oshibofa ounamapangelo waKalunga. Okunyona omhango kwavo okwa li kwe va ningifa ovalunde. (1 Johannes 3:4) Oshidjemo, ova li va kanifa ewaneneno nove litwala menyonauko vo vene nosho yo oludalo lavo.
Jehova okwa efa ovanhu ve lipangele oule womido omayovi, nondjokonona otai ulike kutya ovanhu itava dulu okulipangela vo vene. Otai ulike kutya omapangelo aeshe opanhu okwa etifa okumona oixuna. Kape na epangelo la dula okuxulifa po oita, ekaulonyanga, okuhenouyuki nosho yo omikifi.
Kalunga ota ka xulifa po ngahelipi okumona oixuna?
Ombibeli oya udaneka kutya Kalunga ota ka eta mafiku ounyuni mupe wouyuki. (2 Petrus 3:13) Ovo va longifa nawa emanguluko lavo lokuninga omatokolo mokukala ve hole vakwao nosho yo Kalunga ovo aveke tava ka efuwa va kale mounyuni mupe.— Deuteronomion 30:15, 16, 19, 20.
Ombibeli oya ti yo kutya ‘mefiku letokolo’ olo li li poduka, Kalunga ota ka xulifa po okumona oixuna nosho yo ovo have ku etifa. (2 Petrus 3:7) Konima yaasho, Omupangeli Jesus Kristus, oo a nangekwa po kuKalunga ota ka pangela ovanhu ovo hava dulika. (Daniel 7:13, 14) Epangelo laJesus otali ka etifa shike? Ombibeli oya ti: “Ovananheni vo otava ka fyuulula edu, ndee tava ka hafela ombili inene.”— Epsalme 37:11.
E li Ohamba yomeulu, Jesus ota ka xulifa po okumona oixuna, ngaashi omikifi, oukulupe nosho yo efyo, oyo ya holoka po eshi ovanhu va tukululila oshibofa Jehova, oo e li ‘ofifiya yomwenyo.’ (Epsalme 36:10) Jesus ota ka velula ovanhu aveshe ovo va tambula ko epangelo laye lopahole. Omaudaneko Ombibeli aeshe oo otaa ka wanifwa po koshi yepangelo laye.
◼ ‘Onakukala mo nande umwe ta ti: Ame oshingone. Ovanhu ava tava ka kala mo, ova diminwa po omatimba avo.’— Jesaja 33:24.
◼ “[Kalunga] ota feta po omahodi momesho avo, nefyo itali kala po vali ile oluhodi ile okulila ile ouyahame itau kala po vali, osheshi eshi shotete osha xula po.”— Ehololo 21:4.
Itashi hekeleke tuu okushiiva kutya mafiku Kalunga ota ka wanifa po eudaneko laye li na sha nokuxulifa po okumona oixuna akushe! Ndele fimbo twa teelela, natu kale nelineekelo kutya oha pwilikine komailikano etu nonande okwa efa okumona oixuna ku kale po oule wokafimbo.
Kalunga oko e li, nota dulu okuuda omailikano oye, nokuli nonande owa nyika oluhodi. Okwa halelela oku ke ku mona to hafele onghalamwenyo pefimbo opo oinima aishe oyo ye ku limbililika nosho yo omauyahame a xulifwa po.