‘Jehova ohe mu dimine po’

“Ou iha dimine po vakwao ota teya po onhopa oko e na okweenda.” Eendjovo domunandjokonona omuBritania wedina Edward Herbert oo a li ko konima yomido 400 lwaapo oda divilika etomheno limwe kutya omolwashike tu na okudimina po vakwetu: Otashi dulika nafye hatu ka pula vamwe ve tu dimine po efiku olo tuu olo ile fiku limwe. (Mateus 7:12) Ndele ope na vali etomheno la fimanenena kutya omolwashike tu na okudimina po vakwetu. Omuyapostoli Paulus okwa nwefwa mo a shange ta ti: “Lididimikilafaneni, diminafaneni po omanyono, ngenge mwa ningafana nomukweni, ngaashi [‘Jehova,’ NW] e mu dimina po, osho nanye yo mu ninge.” — Ovakolossi 3:13.

Molwaashi atusheni inatu wanenena, omafimbo amwe otashi dulika tu handukife vamwe, ndele navo otashi dulika ve tu handukife. (Ovaroma 3:23) Ongahelipi hatu dulu okukaleka po ombili novanhu vakwetu inava wanenena? Kalunga okwa nwefa mo omuyapostoli Paulus e tu pe omayele oo tae tu ladipike tu lididimikilafane nokudimina po vakwetu. Omayele oo otaa longo nokunena ngaashi naanaa a li eshi opo a shangwa konima yomido 2 000 lwaapo da pita. Natu ka yandjeni elitulemo keendjovo daPaulus.

“Lididimikilafaneni.” Embo lomauyelele limwe ola yelifa la ti: Ovakriste ove na okuulika oukwatya oo “mokulidiinikila omapuko avamwe nehalo liwa ile omaukwatya mai oo hae va udifa nai.” Outumbulilo ‘namukweni’ otau tu lombwele kutya okulididimika kwa tya ngaho otaku ningwa kovanhu vavali. Ngeenge otwa didilike kutya otu na omaukwatya oo haa handukifa vamwe, itatu ka efa oinima oyo tashi dulika tuhe hole i nyone po ombili yetu navakwetu. Ongahelipi ngeenge vamwe ova nyono kufye?

“Diminafaneni po.” Omuhongwanhu umwe okwa ti oshitya shopehovelo shOshigreka osho sha tolokwa “diminafaneni po” mOmbibeli yOshikwanyama ‘otashi divilike oukwatya wokudimina po nonghenda.’ Odjo imwe oya ti kutya oshitya osho osha hala kutya “okuyandja oshinima shihafifa, shiwa notashi eta ouwa.” Ohatu ulikilafana onghenda eshi hatu dimine po nehalo liwa nokuli nongeenge twa ‘ningafana navakwetu.’ Omolwashike tu na okudimina po nehalo liwa? Omolwaashi otashi dulika nafye twa hala oo e tu udifa nai e ke tu dimine po.

“Ngaashi [Jehova, NW] e mu dimina po, osho nanye yo mu ninge.” Olo olo etomheno la fimanenena kutya omolwashike tu na okudimina po vakwetu: Molwaashi Jehova Kalunga ohe tu dimine po nehalo liwa. (Mika 7:18) Diladila oule wokafimbo shi na sha nouwa munene oo Jehova ha ningile ovanyoni ovo ve livela ombedi. Mepingafano novanhu, Jehova iha nyono. Kakele kaasho, oha dimine po filufilu nonehalo liwa ovanyoni ovo ve livela ombedi nonande oku shii kutya ita ka pumbwa okudiminwa po kovanyoni ovo. Jehova okwa tula po oshihopaenenwa sha denga mbada shi na sha nokudimina po ovanyoni ovo ve livela ombedi.

Ouwanghenda waJehova ohau tu nanene popepi naye nohau tu linyengifa tu kale twa halelela oku mu hopaenena. (Ovaefeso 4:32–5:1) Oshiwa okulipula kutya, ‘Ngeenge Jehova oha dimine nge po pafilonghenda, ongahelipi handi dulu okuhadimina po ovanhu vakwetu inava wanenena ovo ve livela ombedi shili eshi va nyona kwaame? — Lukas 17:3, 4.