“Ovanhu vahapu ova li ve tonde nge”

ONGHALAMWENYO YANGE YONALE:

Onda kulila moSantiago, oshilandopangelo shaChile. Poushiinda washo ovanhu ova shiivikila okulongifa oingangamifi nomu na eengudu dovalumenhu ovo hava longo ominyonena. Tate okwa dipawa eshi nda li ndi na omido nhano. Konima yaasho, meme okwa ka kala nomulumenhu oo a li omukwanyanya, nokwa li he tu denge alushe atushe nameme. Fiyo opaife ondi na ouyahame wopamaliudo okudja komido odo.

Eshi handi kulu, onda efa ndi nwefwe mo kenwefemo lii lelongifo leenghono. Onda li handi pwilikine keemusika odo hadi ningi omaweelelo neenghono, handi nu sha pitilila nomafimbo amwe onda li handi longifa oingangamifi. Onda li handi kufa ombinga momalwoodi oo haa luwa mepandavanda kovalandifi voingangamifi, ovo peemhito dimwe va kendabala okudipaa nge. Pomhito imwe, ongudu yovakondjifi vange oya li ya shiva omulumenhu umwe wepulangunga a dipae nge, ndele onda li nda dula okuya onhapo noshipute nda tuwa nombele. Pomhito ikwao, ongudu yovalandifi voingangamifi oya li ya ulika nge ondjebo momutwe ndele tai kendabala okumangeleka nge.

Mo 1996, onda li nda konga omukainhu wedina Carolina, nomo 1998, otwa li twa hombola. Konima eshi omonamati wetu woshiveli a dalwa, onda li handi lipula unene kutya molwaashi ondi na omahandu mai ngaashi tate ou e li nameme, itandi ka hepeka nande oukwaneumbo wange? Onda li nda konga ekwafo kendiki lexungomwenyo lomoshitukulwa nonda li nda pewa ekwafo lopaunamiti ndele inali kwafela nge sha. Onda li nda twikila okukala handi handuka nomoinima inini nokukanifa elipangelo. Onda li nda hala okweefa po okuyahameka oukwaneumbo wange, ashike okwa li nda hala oku shi ninga monghedi ya puka, yokulidipaa. Lao linene, kanda li nda pondola.

Molwaashi onda ninga omido dihapu inandi itavela muKalunga, onda li nda hala okwiitavela muYe. Onghee hano, onda ka kala handi i kongeleka yaELCN. Lwopokati opo, omukulukadi wange okwa ka konakona Ombibeli nEendombwedi daJehova. Onda li ndi tonde Eendombwedi, nomafimbo amwe onda li handi di tuku noku di ula omalaka mai. Ndele alushe oda li hadi popi naame nombili, osho nda li inandi teelela.

Efiku limwe, Carolina okwa pula nge ndi tale mOmbibeli yange mEpsalme 83:18 [NW]. Ovelishe oyo oya popya sha yela kutya edina laKalunga oJehova. Onda li nda kumwa eshi nda mona kutya melongelokalunga letu onde lihonga kombinga yakalunga, ndele hakombinga yaJehova. Pehovelo lomudo 2000, naame onda li nda hovela okukonakona Ombibeli nEendombwedi daJehova.

NGHEE OMBIBELI YA LUNDULULA ONGHALAMWENYO YANGE:

Eshi nda ninga exumokomesho, onda hekelekwa eshi nde lihonga kutya Jehova omunalukeno noha dimine po. Pashihopaenenwa, muExodus 34:6, 7, Ombibeli oya popya Jehova e li “Kalunga, omunefilonghenda, Kalunga omunanghenda, omunanheni, nomunene mouwanghenda nomoudiinini, nouwanghenda waye te u diinine kovanhu omayovi, ou ta dimi po omanyonauno nomatauluko nomatimba.”

Ndele nande ongaho, kasha li shipu okutula moilonga osho nda li handi lihongo. Onda li nda tomhwa kutya nghi na fiku ndi dule okupangela ehandu lange. Efimbo keshe nda li handi dopa okulipangela, Carolina okwa li ha tunge omukumo pahole nokudimbulukifa nge kutya Jehova oku wete eenghendabala dange. Molwaashi okwa li ha yambidida nge, okwa pameka nge opo ndi kendabale ndi twikile okuhafifa Jehova, nonande luhapu onda li handi kala ndi udite ndihe na eteelelo.

Efiku limwe, Alejandro, omumwatate oo a konakona naame Ombibeli, okwa li a lombwela nge ndi leshe Ovagalati 5:22. Ovelishe oyo oya tumbula oiimati yomhepo yaKalunga ngaashi ‘ohole, ehafo, ombili, onheni, oukaume, ouwa, oudiinini, engungumano nelididimiko.’ Alejandro okwa popya kutya itandi dulu okukulika omaukwatya oo keenghono dange, ndele ponhele yaasho, okekwafo lomhepo iyapuki yaKalunga. Oshili ya tya ngaho oya li ya lundulula filufilu etaleko lange.

Lwanima, onda ka kala poshoongalele sha kula shEendombwedi daJehova. Elandulafano, oukoshoki noukumwe oo nda mona owa li wa tomha nge ndi mone kutya onda mona elongelokalunga lashili. (Johannes 13:34, 35) Onda li nda ninginifwa muFebruali 2001.

OUWA OO NDA MONA:

Jehova okwa lundulula nge; nda li omulumenhu welongifo leenghono ndele ta ningi nge omunambili. Ondi wete kutya okwa shila nge mo monhopo omo nda li nda damena. Ovanhu vahapu ova li ve tonde nge, ndele itandi va pe oushima. Kakele kaasho, paife ohandi hafele okulongela Jehova nombili pamwe nomukulukadi wange novanamati vetu vavali.

Ovapambele vange nosho yo ookaume kange vonale ova kumwa eshi nda ninga omalunduluko e fike opo. Oshidjemo, vahapu vomuvo ova ulika ohokwe mokulihonga oshili yOmbibeli. Naame ondi na yo oufembanghenda wokukwafela vamwe va shiive Jehova. Kashi hafifa tuu okumona oshili yOmbibeli tai lundulula onghalamwenyo yavo!