Oipupulu oyo ya ningifa ovanhu va diladile kutya Kalunga omukwanyanya

OSHO VAHAPU VA ITAVELA Okatikisa kongeleka yaKatolika oka ti: “Diva konima yefyo, eemwenyo odo da fya da nyona ohadi i moheli, omo hadi ka hepekwa nokutokolelwa ‘omundilo waalushe.’” Ovawiliki vomalongelokalunga vamwe ova popya kutya ovo ve li moheli ova topoka ko filufilu kuKalunga.

OSHILI OKUDJA MOMBIIBELI ‘Omwenyo ou tau nyono u nokufya.’ (Hesekiel 18:4) ‘Oonakufya inava shiiva nande osha.’ (Omuudifi 9:5) Ngeenge omwenyo ohau fi noihau kala u na eshiivo lasha, ongahelipi tau dulu okumona oixuna ‘momundilo waalushe,’ ile u kale u udite ouyahame eshi wa tukuka ko kuKalunga?

MOmbiibeli, oshitya shOshiheberi noshOshigreka osho sha tolokwa “oheli” osha yukifwa kombila omo hamu i ovanhu aveshe. Pashihopaenenwa, eshi Job a li ta mono oixuna kouvela, okwa li a ilikana a ti: “Akutu, ngeno u holeke nge moshovafi [“moheli”].” (Job 14:13) Job okwa li a hala okufuda po, ndele hamonhele yokuhepekwa, ile a tukuka ko kuKalunga, ndele okwa li ta popi ombila.

OMOLWASHIKE SHA FIMANA? Onyanya ihai tu ningifa tu ehene popepi naKalunga, ndele ohai tu ehenifa kokule naye. Rocío wokoMexico okwa ti: “Okudja kounona onda kala handi hongwa ehongo lomundilo woheli. Onda li handi kala nda tila neenghono, nonda li handi diladila kutya Kalunga ke na omaukwatya mawa. Onda li handi diladila kutya omuhandunhu noke na ko na sha nomunhu.”

Ombiibeli oya popya sha yela shi na sha netokolo laKalunga nosho yo onghalo yoonakufya, naasho osha lundulula etaleko laRocío li na sha naKalunga. Okwa ti: “Onda li ndi udite nda manguluka nonda kufwa omutengi mudjuu wopamaliudo. Onda hovela okukala nde lineekela kutya Kalunga okwe tu halela osho sha denga mbada, noku tu hole nonokutya ohandi dulu yo okukala ndi mu hole. Okwa fa xe oo ha kwata omake ovana vaye nokwe va halela osho sha denga mbada.” — Jesaja 41:13

Ovanhu vahapu ova kendabala okukala ovakwangeleka omolwoumbada womundilo woheli, ashike Kalunga ina hala ovanhu ve mu longele omolwoumbada woku mu tila. Ponhele yaasho, Jesus okwa ti: “Hola Jehova Kalunga koye.” (Markus 12:29, 30) Shikwao vali, ngeenge otwa didilike kutya Kalunga iha katuka shihe li pauyuki kunena, ohatu dulu yo okulineekela etokolo laye monakwiiwa. Ngaashi kaume kaJob Elihu, nafye ohatu dulu okukala twa tomhwa kutya: “Kalunga oku li kokule nouhenakalunga, nOmunaenghono adishe oku li kokule nowii.” — Job 34:10.