Omapulo Opambibeli A Nyamukulwa
Ongahelipi efyo laJesus le tu etela ouwa?
Eshi Kalunga a shita ovanhu, okwa li a hala va kale kombada yedu fiyo alushe nopehe na okumona oixuna komikifi ile kefyo. Ashike omulumenhu wotete, Adam, kali a dulika kOmushiti nokwa li e likanifila etimaumbwile lokukala nomwenyo fiyo alushe. Tu li oludalo laAdam, otwa fyuulula efyo kuye. (Ovaroma 5:8, 12; 6:23) Kalunga kashili, Jehova, okwa tuma Omona, Jesus, kombada yedu opo a fye nokufutile po osho sha kanifwa kuAdam. — Lesha Johannes 3:16.
Jesus okwa fya opo ovanhu va dule oku ka mona omwenyo waalushe. Oshike hashi uya momadiladilo oye ngeenge to diladila omwenyo uhe na exulilo kombada yedu?
Efyo laJesus ole shi ningifa tashi shiiva opo tu diminwe po omatimba notu ka mone omwenyo uhe na exulilo. Ombibeli oye tu kwafela tu shiive kutya onghalamwenyo kombada yedu otai ka kala ya tya ngahelipi eshi itaku ka kala vali oukulupe, omikifi nefyo. — Lesha Jesaja 25:8; 33:24; Ehololo 21:4, 5.
Otu na okudimbuluka ngahelipi efyo laJesus?
Onguloshi oyo ya tetekela efyo laye, Jesus okwa li a lombwela ovashikuli vaye va kale hava dimbuluka efyo laye okupitila moshivilo shanafangwa. Okudimbuluka efyo laJesus omudo keshe monghedi ya tya ngaho ohaku tu pe omhito yokudilonga kunghee Jesus naJehova ve hole ovanhu. — Lesha Lukas 22:19, 20; 1 Johannes 4:9, 10.
Neudo, Edimbuluko lefyo laJesus otali ka kala ko mOmaandaxa, 14 Aprili, konima yeningino letango. Oto shivwa uye u ongale pamwe nEendombwedi daJehova domoshitukulwa sheni. — Lesha Ovaroma 1:11, 12.