Oto dulu okufinda omayeleko

OVANHU vamwe momitima davo ova tala ko omayeleko e li oshinima shiwa. Ofimbo vamwe ve a tala ko e li omutondi oo va halelela okufinda. Ove oho a tale ko ngahelipi? Ngeenge wa taalela omayeleko, mbela ou na okuliyandja kuo ile ou na okwaa finda?

Oshoshili kutya hamayeleko aeshe taa dulu okweetifa omaupyakadi manene. Pashihopaenenwa, okulya oshikuki to shi livakele osho we likelela, itashi ku etele oupyakadi. Ndele okuliyandja komayeleko amwe, unene tuu oo taa twala moluhaelo, otaku dulu okweetifa oilanduliko ya nyika oshiponga. Ombibeli oya londwela ya ti: ‘Ou ta [nyono, NW] ohombo, ke neendunge. Ou a hala okunyona po okukalamwenyo kwaye mwene, osho na ninge.’ — Omayeletumbulo 6:32, 33.

Ngeenge owa yelekwa u ye moluhaelo, ou na okulinyenga ngahelipi? Ombibeli oya ti: “Ehalo laKalunga oleli: eliyapulo leni, mu yepe oluhaelo; keshe ou womokati keni a kale e shii kudiinina omukainhu waye omouyapuki nomokufimaneka.” (1 Ovatessaloniki 4:3, 4) Ongahelipi hatu dulu okukulika etokolotoko la tya ngaho? Natu ka konakoneni eenghatu nhatu odo tadi dulu oku tu kwafela.

Onghatu 1: Lungamena osho to tale

Okutala omafano oipala otaku pendula ashike mufye omahalo inaa yuka. Molwaashi Jesus oku shii ekwatafano olo li li pokati kokutala nomahalo etu, okwa londwela a ti: “Okeshe tuu ou ta tale omukainhu nokahalu, oye okwe mu haela momutima waye.” Mokulongifa enenepeko olo la twa, okwa ladipika a ti: “Eisho loye lokolulyo ngenge tali ku hongaula, li kolola mo, ove u li ekeleshi.” (Mateus 5:28, 29) Jesus ota kendabala oku tu honga shike? Opo tu finde omayeleko, otu na okukatuka pandunge nokatu na okutala omafano oo taa pendula omahalo omilele.

Oku shi faneka: Natu tye nee ou wete eehandje odo tadi di koshivela tashi xwikilwa. Mbela oto ka kala ashike we di dakamena mo omesho? Hasho nandenande! Oto ka alula ko omesho ile u li uvike opo u amene omesho oye. Sha faafana, ngeenge owa mono ombadilila omafano oo taa pendula omahalo omilele, membo, ko-TV, kokombiuta ile epenge lomunhu wonhumba, alula ko diva omesho oye. Amena omadiladilo oye aha nwefe mo. Juan oo a li a pikwa kokutala omafano oipala, okwa ti: “Luhapu ngeenge onda mono omukainhu oo e na eholokepo liwa, ohandi kala nda hala oku mu tala oule wefimbo. Onghee hano, ondi na okukondja lela opo ndi alule ko omesho ange kuye, nokulilombwela handi ti: ‘Ilikana kuJehova! Ou na okwiilikana paife!’ Konima ngeenge onda ilikana, ehalo la tya ngaho ohali kana po.” — Mateus 6:9, 13; 1 Ovakorinto 10:13.

Diladila yo komulumenhu omudiinini Job oo a ti: ‘Onda udafana nomesho ange: ndi tale ngahelipi kokakadona?’ (Job 31:1) Omolwashike naave ito kala wa tokola toko ngaashi ye?

Ninga ngaha: Ngeenge owa mono ombadilila omafano oipala, alula ko diva omesho oye. Hopaenena omushangi wOmbibeli umwe oo a ilikana ta ti: “Omesho ange a alula ko, a ha tale koinima yongaho, nyatipalife nge meendjila doye.” — Epsalme 119:37.

Onghatu 2: Amena omadiladilo oye

Molwaashi atusheni inatu wanenena, omafimbo amwe ohatu kala hatu kondjo nomahalo a puka. Ombibeli oya ti: “Keshe umwe ota hongaulwa kokahalu kaye mwene, oko hake mu shili notake mu heke; nokahalu ngenge ka fimbapala, otaka dala oulunde, noulunde eshi owa wanifwa, otau dala efyo.” (Jakob 1:14, 15) Ongahelipi to dulu okuhenuka onghalo oyo tai ende tai naipala noshidjuu neenghono oku i henuka?

Ngeenge mwoove omwe uya omahalo a puka, dimbuluka kutya ou na ehoololo kutya oto ke linyenga ngahelipi kuo. Kondjifa omahalo a tya ngaho. A kufa mo momadiladilo oye. Henuka okukala to diladila kombinga yao. Omulumenhu wedina Troy oo a li a pikwa kokutala omafano oipala kointaneta, okwa ti: “Onda kala handi kondjo opo omadiladilo a puka a dje mo mwaame mokuyandja elitulemo kwaao a yuka. Kasha li shipu, onda kala handi liyandje komayeleko luhapu. Ashike lwanima onde ke lihonga okupangela omadiladilo ange.” Fimbo omukainhu wedina Elsa a li e na omido omulongo nasha, okwa li ha kala ta yelekwa a ye moluhaelo. Okwa ti: “Mokukala nde lipyakidila nokwiilikana kuJehova, onda li nda dula okupangela omadiladilo a puka.”

Ninga ngaha: Ngeenge oho lihange wa wililwa po komadiladilo e na sha nomilele, efa diva osho wa li to longo nokwiilikana. Natu kondjifeni omadiladilo a puka mokuyadifa omadiladilo etu ‘naashishe osho shoshili, naasho sha fimana, naasho sha yuka, naasho sha koshoka, naasho shi holike, naasho shi netumbalo liwa, ongenge onghedi iwa ile epandulo.’ — Ovafilippi 4:8.

Onghatu 3: Lungamena eenghatu doye

Ngeenge omahalo nomayeleko okwe ku findi, oto dulu okuya moshiponga noupu. (Omayeletumbulo 7:6-23) Ongahelipi to dulu okuhenuka uha ninge oshihakanwa?

Ombibeli oye tu pa omayele opandunge ya ti: “Omunaendunge ota tale oshiponga ndee ta hondama, ndelenee ovashima tava ehene ko ndee tava hangika koshiponga.” (Omayeletumbulo 22:3) Onghee hano, lungamena eenghatu doye. Nongela eenghalo odo tadi dulu okweetifa omaupyakadi noku di henuka. (Omayeletumbulo 7: 25) Omulumenhu wedina Filipe oo a li a pikwa komafano oipala okwa ti: “Okombiuta youkwaneumbo onde i tula poluhaela nokutula mo oshinima osho tashi ku kelele uha ye komapandja amwe oo a nyika oshiponga. Ohandi longifa ashike ointaneta ngeenge ope na vamwe popepi naame.” Sha faafana, Troy, oo a tumbulwa metetekelo, okwa ti: “Ohandi henuka okutala eemuvi odo tadi pendula omahalo omilele nosho yo okweendafana novanhu ovo ve hole okupopya kombinga yomilele. Inandi hala okulitula moshiponga.”

Ninga ngaha: Likonakona paushili nokudidilika kutya omaunghundi oye oelipi nokuninga eemhangela komesho yefimbo opo u henuke eenghalo oto tadi ku twala momayeleko. — Mateus 6:13.

INO FYA OUNYE!

Ongahelipi nonande ou ninge eenghendabala da mana mo oho liyandje ashike komayeleko? Ino teka omukumo. Ombibeli oya ti: “Lu-7 omuyuki ta punduka ndee ta penduka vali, ndelenee ovahenakalunga tava ka wila momupya.” (Omayeletumbulo 24:16) Tate yetu womeulu ote tu ladipike tu ‘penduke po.’ Mbela oto ka tambula ko ngoo ekwafo laye lopahole? Ngeenge osho, ino loloka okupopya naye okupitila meilikano. Pameka eitavelo loye mokukala ho konakona Eendjovo daye. Pameka etokolotoko loye mokukala ho kala pokwoongala kwopaKriste. Kaleka alushe momadiladilo eudaneko laKalunga eli kutya: “Ohandi ku pameke ndee handi ku kwafa.” — Jesaja 41:10.

Cody oo a popiwa metetekelo okwa ti: “Osha pula nge shihapu okweefa po okutala omafano oipala. Onda kala handi wile luhapu monghalo ya tya ngaho, ndele kekwafo laKalunga, xuuninwa onda ka pondola.” Dylan oo naye a tumbulwa metetekelo okwa ti: “Okonyala ndi ye momilele nomunailonga mukwetu. Ashike onda li nda kufa ko eenghaku ndele handi lombwele omukainhu oo kutya ‘itandi shi ningi!’ Omunhu oho kala u udite nawa ngeenge ou na eliudo la koshoka. Komesho yaaishe, ondi shii kutya Jehova okuudite etumba molwange.”

Ngeenge owa kala wa pama nokufinda omayeleko, oto dulu okukala noushili kutya Kalunga ota ka kala yo e udite etumba omolwoye. — Omayeletumbulo 27:11.