Natu kaleni oupafi, opo tu kondjife omayeleko

1-2. (a) Elondwelo lilipi Jesus a li a pa ovahongwa vaye? (b) Omolwashike ovahongwa vaye va li ve mu fiya po? (Tala yo omafano.)

“OMHEPO oya halelela, ndele ombelela oi na ounghundi.”a (Mat. 26:41b) Okutala keendjovo odo, Jesus ota ulike kutya oku udite ko kutya otu li ovanhu inatu wanenena. Ashike eendjovo daye oda kwatela mo yo elondwelo, olo kutya: Inatu kala unene twe lineekela mufye vene. Konima yeevili donhumba, ofimbo Jesus ina popya eendjovo odo, ovahongwa vaye ova li va udaneka kutya kave na efiku ve mu fiye po. (Mat. 26:35) Ova li va hala okulonga osho sha yuka. Ashike kava li va didilika kutya otava dulu okumona shidjuu okulonga osho sha yuka, ngeenge ove lihange tava fininikwa. Nomolwaashi, Jesus e va londwela a ti: “Kaleni oupafi nokukala tamu ilikana opo muha ye momayeleko.” — Mat. 26:41.

² Shinyikifa oluhodi, ovahongwa vaye inava kala oupafi. Eshi Jesus a li a kwatwa po, mbela ovahongwa vaye ova kala naye, ile ova li va kwatwa koumbada noku mu faduka po? Molwaashi ovahongwa vaye kava li oupafi, ova li ve mu fiya po, nonande ova li va popya kutya itave ke shi ninga. — Mat. 26:56.

3. (a) Opo tu kale ovadiinini kuJehova, omolwashike twa pumbwa okuhenuka okulineekela mufye vene? (b) Oshike hatu ka kundafana moshitukulwa eshi?

³ Inatu kala twe lineekela mufye vene. Oshoshili kutya, otwa tokola toko tuha ninge sha osho tashi nyemateke Jehova. Ashike inatu wanenena, nohatu dulu okuyelekwa noupu tu longe osho shii. (Rom. 5:12; 7:​21-23) Omafimbo amwe, otashi dulika tu yelekwe ombadilila tu ninge oshinima osho sha puka, osho tashi monika shi li mondjila kufye. Opo tu kale ovadiinini kuJehova nosho yo kOmona waye, otwa pumbwa okushikula omayele aJesus e na sha nokukala oupafi, opo tuha yelekwe. Oshitukulwa eshi otashi ke tu kwafela tu ninge ngaho. Tete, ohatu ka kundafana eenghalo donhumba omo unene twa pumbwa okukala oupafi. Opo nee, ohatu ka kundafana nghee hatu dulu okukala oupafi, ngeenge hatu yelekwa. Xuuninwa, ohatu ka kundafana nghee hatu dulu okutwikila okukala oupafi.

OMEENGHALO DILIPI TWA PUMBWA OKUKALA OUPAFI?

4-5. Omolwashike sha fimana okukala oupafi, opo tuha nyone nokuli nomanyono oo manini?

⁴ Nokuli nomanyono oo manini otaa dulu okunyona po ekwatafano letu naJehova. Natango, otaa dulu oku tu ningifa tu nyone omanyono a kwata moiti.

⁵ Atushe ohatu dulu okuyelekwa tu ninge osho inashi yuka. Ashike keshe umwe womufye oku na ounghundi wonhumba, sha hala okutya, ota dulu okunyona enyono la kwata moiti, okukufa ombinga moinima yonhumba inai koshoka, ile okuwila momwiyo wokudiladila ngaashi ounyuni. Pashihopaenenwa, umwe otashi dulika ta kondjo neyeleko lokuya moluhaelo. Vamwe otashi dulika tava kondjo neamo lokuninga oinima inai koshoka, ngaashi okulidanena koilyo yoludalo, ile okutala omafano oipala. Natango vamwe otashi dulika tava kondjo noumbada wokutila ovanhu, ounhwa, hava handuka diva, ile imwe vali. Jakob okwa ti: “Omunhu keshe oha yelekwa komahalo aye mwene oo hae mu xwaxwameke noku mu hongaula.” — Jak. 1:14.

6. Oshike osho tuhe na okulipwililikila?

⁶ Mbela ou shii oinima oyo hai dulu oku ku yeleka noupu? Osha nyika oshiponga okulipwililikila okuhawanenena kwetu, ile tu diladile kutya otwa pama noitatu dulu okunyona. (1 Joh. 1:8) Omuyapostoli Paulus okwa ti, nokuli ‘nOvakriste va pyokoka’ otava dulu okuyelekwa, ngeenge kave li oupafi. (Gal. 6:1) Otwa pumbwa okudimina kutya otu na omaunghundi, nohatu dulu okupunduka noupu. — 2 Kor. 13:5.

7. Okushike otwa pumbwa okuyandja elitulemo le likalekelwa? Shi faneka.

⁷ Ngeenge otwa shiiva oinima oyo hai tu yeleke noupu, oshike tu na okuninga po? Otwa pumbwa okulonga noudiinini opo tu kondjife omayeleko oo. Natu shi faneke ngaha, pefimbo lOmbiibeli, omivelo doshilando odo unene da li hadi kala oshihakanwa. Nomolwaashi odo da li da pumbwa eameno neenghono. Sha faafana, nafye otwa pumbwa okuyandja elitulemo le likalekelwa komaunghundi etu, opo tu dule okukondjifa eyeleko. — 1 Kor. 9:27.

NGHEE HATU DULU OKUKALA OUPAFI

8-9. Ongahelipi omulumenhu omunyasha, oo a popiwa mOmayeletumbulo etukulwa 7, a li ta dulu okuhenuka enyono la kwata moiti? (Omayeletumbulo 7:​8, 9, 13, 14, 21)

⁸ Ongahelipi hatu dulu okukondjifa omayeleko, opo tuha nyone? Natu ka taleni osho hatu lihongo komulumenhu omunyasha, oo a popiwa mOmayeletumbulo etukulwa 7. Okwa li a ya moluhaelo nomukainhu omuholi woipala. Ovelise 22 oya popya kutya omulumenhu omunyasha okwe mu shikula “divadiva.” Ashike ngaashi sha ulikwa meevelise da tetekela, okwa katuka eenghatu donhumba, odo mokweendela ko kwefimbo de mu twala menyono.

⁹ Oshike sha li sha ningifa omulumenhu omunyasha a nyone? Tete, “okwa li ta ende popepi noxulo yepandavanda, omo hamu di omukainhu omuholi woipala” oufiku. Opo nee, okwa li a enda a yuka keumbo laye. (Lesha Omayeletumbulo 7:​8, 9.) Eshi a mona omukainhu, ka li e mu henuka. Ndele ponhele yaasho, okwa li e mu pitika e mu xupite nokupwilikina komukainhu oo eshi a li te mu lombwele kombinga yomapanduloyambo, oo a li a yandja, tashi dulika a li ta diladila kutya osho otashi ke mu ningifa a mone kutya oku li omunhu muwa. (Lesha Omayeletumbulo 7:​13, 14, 21.) Ngeno omulumenhu omunyasha okwa henukile oinima oyo, ngeno okwa dula okuhenuka omayeleko nokunyona.

10. Ongahelipi omunhu kunena tashi dulika a ninge epuko la faafana naalo lomulumenhu omunyasha, oo a popiwa mOmayeletumbulo?

¹⁰ Ehokololo laSalomo otali ulike osho omulongeli keshe waJehova ta dulu okuningilwa. Otashi dulika a nyone enyono la kwata moiti, nolwanima otashi dulika a kale e udite kutya oinima oya ningwa ashike “mepakumo leisho.” Ile otashi dulika a tye, “Kanda li nde shi teelela.” Ashike ngeenge okwa diladila kwaasho sha ningwa po, otashi dulika a ka didilike kutya okwa katuka eenghatu dihe li pandunge, odo de mu ningifa a nyone. Eenghatu odo otashi dulika da kwatela mo eendafano lii, omalihafifo inaa koshoka, ile okweendafana novanhu ovo ihava longele Jehova, kutya nee okomudidi, ile okointaneta. Otashi dulika a efa po okwiilikana, okulesha Ombiibeli, okuya kokwoongala, ile okukufa ombinga moukalele. Ngaashi omulumenhu omunyasha, oo a popiwa mOmayeletumbulo, otashi dulika a nyona omolwomatokolo ehe li pandunge oo a ninga.

11. Oshike twa pumbwa okuninga, opo tuha nyone?

¹¹ Oshike hatu lihongo? Inatu pumbwa ashike okuhenuka okunyona, ashike otwa pumbwa yo okuhenuka eenghatu odo tadi twala menyono. Salomo okwe shi yelifa nawa mehokololo lomulumenhu omunyasha nosho yo omukainhu omuholi woipala. Okwa popya kombinga yomukainhu a ti: “Inamu pukifwa mu ende momalila aye.” (Omayel. 7:25) Okwa popya yo vali a ti: “Kaleni kokule naye; inamu ehena popepi nomuvelo weumbo laye.” (Omayel. 5:​3, 8) Ohatu ka henuka okunyona mokulikaleka kokule noinima oyo tai tu ningifa tu nyone.b Osho otashi dulika sha kwatela mo oinima oyo inai puka muyo vene okuningwa kOvakriste, ashike otai dulu oku tu yeleka tu nyone. — Mat. 5:​29, 30.

12. Job okwa li a tokola toko okuninga shike, noshike sha li she mu kwafela aha ye meyeleko? (Job 31:1)

¹² Opo tu henuke oinima oyo tai tu twala menyono, otwa pumbwa okukala twa lungama. Naasho osho Job a li a ninga. Okwa li a “ninga ehangano nomesho” aye, aha tale ovakainhu vamwe nokahalu. (Lesha Job 31:1.) Molwaashi okwa li e li metwokumwe neano laye, osha li she mu amena koluhaelo. Nafye otwa pumbwa okukala twa tokola toko tu henuke keshe shimwe osho tashi dulu oku tu yeleka.

13. Omolwashike twa pumbwa okulungamena osho hatu diladila? (Tala yo omafano.)

¹³ Otwa pumbwa okulungamena osho hatu diladila. (Ex. 20:17) Vamwe ova itavela kutya inashi puka okudiladila kombinga yoinima inai koshoka, shimha ashike itave i ningi. Ashike okudiladila kwa tya ngaho okwa puka. Omunhu oo ha diladila kombinga yoinima inai koshoka, otashi ke mu ningifa a kale a hala oku i ninga. Nokungaho, ote lietele eyeleko, olo ita dulu okukondjifa. Oshoshili kutya, omafimbo amwe ohatu diladila oinima inai koshoka. Ngeenge osho osha ningwa, osha fimana okudiladila diva koinima oyo iwa. Ngeenge otwa ningi ngaho, ohatu ka henuka okunyona enyono la kwata moiti, molwaashi inatu efa omadiladilo a puka a mene omidi mufye. — Fil. 4:8; Kol. 3:2; Jak. 1:​13-15.

14. Oshike vali tashi dulu oku tu kwafela, opo tuha yelekwe?

¹⁴ Oshike vali tu na okuninga opo tuha yelekwe? Otwa pumbwa okukala twa tomhwa filufilu kutya okudulika alushe keemhango daJehova ohaku tu etele ouwa. Omafimbo amwe, ohashi kala shidjuu kufye okudiladila nokukala metwokumwe naasho Jehova a hokwa, ashike ngeenge otwa ningi ngaashi hatu dulu, ohatu ka kala twa hafa shili.

15. Ongahelipi okukala twa halelela okulonga osho sha yuka tashi dulu oku tu kwafela tuhe liyandje keyeleko?

¹⁵ Otwa pumbwa okukala twa halelela okulonga osho sha yuka. Ngeenge otwe lihongo “okutonda eshi shii nokuhola eshi shiwa,” ohatu ka kala twa tokola toko okulonga osho sha yuka nokuhenuka eenghalo, odo tadi tu ningifa tu nyone. (Amos 5:15) Okukala twa hala okulonga osho shi li mondjila otashi ke tu kwafela tu kale ovadiinini, ngeenge otwe lihange monghalo oyo tai tu yeleke inatu shi teelela.

16. Ongahelipi oinima oyo hai tu kwafele tu kale tu hole Jehova tai tu kwafele tu kale tu li oupafi? (Tala yo omafano.)

¹⁶ Oshike tashi dulu oku tu kwafela tu kale twa halelela okulonga osho sha yuka? Otwa pumbwa okukala twe lipyakidila noinima oyo tai tu kwafele tu kale tu hole Jehova. Ngeenge tu li pokwoongala, ile moukalele, ihatu yelekwa noupu tu longe osho shii. Ndele ponhele yaasho, ohashi tu kwafele tu kale twa halelela okuhafifa Jehova. (Mat. 28:​19, 20; Heb. 10:​24, 25) Ngeenge hatu lesha nokukonakona nokudilonga kEendjovo daKalunga, ohashi tu ningifa tu kale tu hole osho shiwa nokutonda osho shii. (Jos. 1:8; Eps. 1:​2, 3; 119:​97, 101) Dimbuluka kutya, Jesus okwa li a lombwela ovahongwa vaye a ti: “Kaleni tamu ilikana opo muha ye momayeleko.” (Mat. 26:41) Ngeenge hatu ilikana kuTate yetu womeulu, ohashi mu pe omhito, opo e tu kwafele, nohatu kala twa tokola toko oku mu hafifa. — Jak. 4:8.

TWIKILA OKUKALA OUPAFI

17. Petrus okwa li ta kondjo nounghundi ulipi?

¹⁷ Ohatu dulu filufilu okufinda omaunghundi etu amwe. Ashike otashi dulika tu twikile okukondjifa omaunghundi etu amwe efimbo lile. Natu ka taleni koshihopaenenwa shomuyapostoli Petrus. Molwaashi okwa li e na oumbada wokutila ovanhu, okwa li e lidimbika Jesus lwoikando itatu. (Mat. 26:​69-75) Petrus otashi dulika a li a finda oumbada wa tya ngaho, eshi a li a yandja oundombwedi nouladi komesho yOmhangu yoPombada yOvajuda. (Oil. 5:​27-29) Ashike konima yomido donhumba, okwa li a efa po okulya pamwe nOvakriste vomoiwana imwe, molwaashi “okwa li a tila ovo va pita etanda.” (Gal. 2:​11, 12) Petrus okwa li vali a kwatwa koumbada. Notashi dulika ka li a finda filufilu ounghundi wa tya ngaho.

18. Oshike tashi dulu oku tu ningilwa, ngeenge otwa li tu na eamo lokuninga oshinima shonhumba inashi yuka?

¹⁸ Otashi dulika nafye tu lihange monghalo ya faafana. Ngahelipi mbela? Ounghundi, oo tashi dulika tu diladile kutya otwe u efa po, otashi dulika u tu yeleke natango. Pashihopaenenwa, omumwatate umwe okwa ti: “Onda li nda efa po okutala omafano oipala oule womido omulongo, nonda li nda tomhwa kutya kandi na vali oupyakadi wa tya ngaho. Ashike peemhito dimwe, onda li nda yelekwa vali ndi a tale.” Oshi shii okupandulwa, eshi omumwatate a twikila okukondjifa ounghundi wa tya ngaho. Okwa li a didilika kutya okwa li e na okukondjifa ounghundi oo efiku keshe, tashi dulika nokuli onghalamwenyo yaye aishe, ofimbo e li monghalelo younyuni ou. Kekwafo lomukulukadi waye nosho yo lovakulunhuongalo vomeongalo lavo, okwa li a dula okufinda eamo lokutala omafano oipala.

19. Oshike tu na okuninga, ngeenge otu na ounghundi oo hatu kondjifa natango?

¹⁹ Ongahelipi hatu dulu okukondjifa ounghundi wonhumba oo tau twikile? Omokushikula omayele aJesus e na sha nokukondjifa eyeleko, taa ti: “Kaleni oupafi.” Nonande peemhito dimwe otu udite kutya otwa pama, natu twikile okuhenuka eenghalo odo tadi dulu oku tu nyonifa. (1 Kor. 10:12) Twikila okuninga oinima oyo ya li ye ku kwafela nale u finde ounghundi oo. Omayeletumbulo 28:14 ota ti: “Omunelao omunhu ou ta kala alushe a lungama.” — 2 Pet. 3:14.

OUWA OO HAU DI MOKUKALA OUPAFI

20-21. (a) Ohatu ka mona ouwa ulipi, eshi hatu twikile okukondjifa omayeleko? (b) Ngeenge otwa ningi ngaashi hatu dulu, Jehova ote ke tu ningila shike? (2 Ovakorinto 4:7)

²⁰ Otu na oushili kutya, ngeenge otwa kala oupafi otashi ke tu etela alushe ouwa. Ngeenge twa nyona, otashi dulika tu mone “ouwa woulunde wopakafimbo,” ashike ngeenge otwa kala metwokumwe nehalo laJehova ohatu ka kala twa hafa unene. (Heb. 11:25; Eps. 19:8) Otwa shitwa tu kale metwokumwe neendjila daye. (Gen. 1:27) Naasho otashi ke tu kwafela tu kale tu na eliudo la yela, notu kale mondjila oyo tai twala komwenyo waalushe. — 1 Tim. 6:12; 2 Tim. 1:3; Jud. 20, 21.

²¹ Oshoshili kutya, “ombelela oi na ounghundi.” Ashike osho inashi hala kutya itatu dulu okukondjifa omaunghundi etu. Jehova okwe lilongekida oku tu pa ekwafo olo twa pumbwa. (Lesha 2 Ovakorinto 4:7.) Ekwafo olo ola kwatela mo eenghono di dule dopaushitwe odo Kalunga ha yandje. Ashike tete otu na okuninga ngaashi hatu dulu kombinga yetu, opo tu kondjife eyeleko. Ngeenge otwa ningi ngaashi hatu dulu, ohatu ka kala tu na elineekelo kutya Jehova ota ka nyamukula omailikano etu e na sha noku tu pa eenghono odo twa pumbwa. (1 Kor. 10:13) Kekwafo laJehova, ohatu dulu okufinda eyeleko olo hatu shakeneke.