Owe shi shiiva tuu?
Jesus okwa li ha ungaunga ngahelipi novanashilundu?
Ovajuda vopefimbo lOmbiibeli ova li hava kala va tila okukwatwa koshilundu. Omukifi oo wa nyika oshiponga ohau dulu okukwata omunhu pomashakeneno omifipa nokunyona po eholokepo laye, nokawa li hau pangwa. Ponhele yaasho, ovo va li ve na oshilundu ova li have likalekelwa nova li va teelelwa va kale hava londwele vamwe kombinga yomukifi wavo. — Leviticus 13:45, 46.
Ovawiliki vomalongelokalunga Oshijuda ova li va tota po eemhango di li omhinge nOmishangwa di na sha naavo ve na oshilundu, naasho osha li sha djuupaleka onghalo yovanashilundu. Pashihopaenenwa, eemhango odo oda li da kelela ovanashilundu va kale ve li kokule naavo vehe na oudu oo oule weemeta 2, nongeenge omhepo ya li tai pepe ova li ve na okukala kokule oule weemeta 45. Ovashangi vomhango yOshijuda ova li hava fatulula oshiteelelwa shopaMishangwa shi na sha nokulikalekelwa kwovanashilundu “kondje yonhanda,” kutya otashi ti, ovanashilundu ova li ve na okukala kondje yoshilando. Nomolwaasho omuhongi umwe ngeenge a li a mono omunashilundu e li meni loshilando okwa li he mu denge nomamanya noku mu lombwele ta ti: “Inda konhele yoye opo uha nyateke vamwe.”
Jesus okwa li ha ungaunga novanashilundu monghedi imwe i lili. Ponhele yoku va taataa, okwa li ha kala a halelela oku va kwata noku va velula. — Mateus 8:3.
Ovawiliki vomalongelokalunga Oshijuda ova li va pitika eteyohombo ngeenge opa holoka eenghalo dilipi?
Odjapo yeteyohombo yomo 71/72 O.P.
Mefelemudo lotete, ovawiliki vomalongelokalunga okwa li hava tu eemhata di na sha neteyohombo. Pomhito imwe, Ovafarisai vamwe ova li tava yeleke Jesus tava ti: “Osha wapala tuu omulumenhu ta henge po omukainhu waye omolwondjovo keshe?” — Mateus 19:3.
Omhango yaMoses oya li ya pitika omulumenhu a henge po omukainhu waye ngeenge ‘okwa mona sha muye shii.’ (Deuteronomion 24:1) Pefimbo laJesus, opa li eengudu mbali dovanhu odo da li hadi hongo omadiladilo Oshirabi oo a li taa kondjifafana nomhango oyo. Ongudu yaSammai oyo ya li hai konakona oinima noukeka, oya li ya yandja omatomheno e shii okuudiwa ko kutya ohombo oi na ashike okuteywa ngeenge umwe a ya momilele naumwe oo ehe fi kaume kaye kopahombo. Mepingafano naasho, ongudu yaHillel oya li ya popya kutya pamhango omulumenhu ota dulu okuhenga po omukulukadi waye ngeenge mohombo omwa holoka oupyakadi nonande inau kwata moiti. Ongudu oyo oya ti yo kutya omulumenhu ota dulu okuhenga po omukulukadi waye ngeenge okwa kala ina teleka nawa oikulya ile ngeenge omulumenhu okwa mono omukulukadi umwe muwa.
Ongahelipi Jesus a li a nyamukula epulo lOvafarisai? Okwa nyamukula a ti: “Ou ta henge po omukainhu waye oshinima shimwe shi he fi oluhaelo, ndele ta hombola umwe, oye ta haele.” — Mateus 19:6, 9.