Nghee ovaengeli tava dulu oku ku kwafela

Ombiibeli otai ulike kutya opo ovaengeli va wanife po ehalo laKalunga, omafimbo amwe ova li ve na okwaamena ovalongelikalunga vashili. (Epsalme 34:7) Pashihopaenenwa:

• Eshi Jehova a li a hanauna po oilando ikolokoshi Sodom naGommora, ovaengeli ova li va kwafela omuyuki Lot novaneumbo laye va dje mo onhapo. — Genesis 19:1, 15-26.

• Eshi ovanyasha vatatu Ovaheberi va li va tokolwa va ekelwe mediko lomundilo muBabilon shonale, Kalunga okwa li a ‘tuma omweengeli waye ndele ta xupifa ovapiya vaye.’ — Daniel 3:19-28.

• Eshi omuyuki Daniel a lele mekololo leenghoshi, okwa li a hokolola kutya okwa xupa molwaashi ‘Kalunga okwa tuma omweengeli waye, ndele ta kwata omilungu deenghoshi.’ — Daniel 6:16, 22.

OVAENGELI OVA LI VA KWAFELA EONGALO LOPAKRSITE LOTETE

Omafimbo amwe, ovaengeli vaKalunga ova li hava i olunyala mokulonga kweongao lopaKriste lotete ngeenge sha li sha pumbiwa opo elalakano laJehova li wanifwe. Pashihopaenenwa:

• Omweengeli umwe okwa li a yeulula omivelo dodolongo ndele ta pitifa mo ovayapostoli ovo va li va idililwa opo va ye va ka twikile okuudifa kotembeli. — Oilonga 5:17-21.

• Omweengeli umwe okwa li a lombwela omuudifi wevaengeli Filippus a ye kondjila oyo ya enda kombuwa ya dja kuJerusalem ya yuka kuGasa noku ka udifile Omuetiopia oo a li a ka ilikana kuJerusalem. — Oilonga 8:26-33.

• Eshi efimbo laKalunga la li la fika opo ovanhu ovo vehe fi Ovajuda va ninge Ovakriste, omweengeli umwe okwa li a holokela memoniko omukulunhu wetangakwaita laRoma wedina Kornelius ndele te mu lombwele a ifane omuyapostoli Petrus keumbo laye. — Oilonga 10:3-5.

• Eshi omuyapostoli Petrus a li modolongo, okwa li a holokelwa komweengeli ndele te mu pitifa mo. — Oilonga 12:1-11.

NGHEE OVAENGELI TAVA DULU OKU KU KWAFELA

Kape na oumbangi oo tau ulike kutya Kalunga oha longifa ovaengeli kunena va kwafele oshiwana shaye pashikumwifilonga meenghedi odo da kundafanwa mOmbiibeli. Ashike, Jesus okwa popya shi na sha nefimbo letu a ti: “Evaengeli eli louhamba otali udifilwa ounyuni aushe li ningile oiwana aishe ondombwedi, opo nee taku uya exulilo.” (Mateus 24:14) Mbela ou shii ngoo kutya ovahongwa vaKristus otava longo oilonga oyo mepashukilo lovaengeli?

Embo lEhololo otali ulike kutya ovaengeli otava kwafele ovanhu nelitulemo mounyuni aushe ve lihonge kombinga yaJehova Kalunga nosho yo elalakano laye li na sha novanhu. Omuyapostoli Johannes okwa ti: “Nda mona omweengeli umwe a tuka pokati keulu ou e kwete evaengeli laalushe li nokuudifilwa kombada yedu novapaani aveshe nomapata aeshe nomalaka aeshe noiwana aishe. Nokwa popya nondaka yomokule: ‘Tileni Kalunga, nye mu mu fimaneke, osheshi efimbo letokolo laye ole uya; linyongameneni ou a shita eulu nedu nefuta needjo domeva.’” (Ehololo 14:6, 7) Oimoniwa ihapu yokunena otai yandje oumbangi kutya ovaengeli otava yambidida oilonga yokuudifa Ouhamba mounyuni aushe. Ngeenge omulunde umwe e lidilulula nokwaalukila kuJehova, ohamu kala “ehafo movaengeli.” — Lukas 15:10.

Oshike tashi ka ningwa po ngeenge oilonga yokuudifa oya pu? “Ovakwaita vomeulu” ile ovaengeli otava ka kwafela Jesus Kristus, Ohamba yeehamba, mokulwa “oita mefiku linene laKalunga omunamapangelo aeshe” puHarmagedon. (Ehololo 16:14-16; 19:14-16) Ovaengeli ovanaenghono otava ka wanifa po etokolo laKalunga eshi Omwene Jesus ta ka ‘handukila ava ihava dulika kevaengeli lOmwene wetu Jesus.’ — 2 Ovatessaloniki 1:7, 8.

Onghee hano, kala wa shilipalekwa kutya ovaengeli ove na ko nasha naave pauhandimwe. Ove na ko nasha neenghono nonghalonawa yaavo va hala okulongela Jehova, na Jehova ohe va longifa luhapu okupameka nokwaamena ovapiya vaye ovadiinini kombada yedu. — Ovaheberi 1:14.

Onghee hano, keshe umwe womufye okwa pumbwa okuninga etokolo la fimanenena. Ohatu ka pwilikina ngoo konghundana iwa oyo tai udifwa mounyuni aushe nokudulika kuyo? Eendombwedi daJehova moshitukulwa sheni otadi ka kala da hafa oku ku kwafela u mone ouwa mekwafo lopahole lovaengeli vaKalunga ovanaenghono.