Natu hopaeneneni ovaengeli ovadiinini

1-2. (a) Otwa yooloka ko ngahelipi kovaengeli? (b) Omeenghedi dilipi twa fa ovaengeli?

TU LI oshiwana shaJehova, otu li oshitukulwa shoukwaneumbo unahole oo hau mu longele. Oukwaneumbo oo owa kwatela mo ovamwatate novamwameme mounyuni aushe nosho yo ovaengeli ovadiinini omamiliyona. (Dan. 7:​9, 10) Ngeenge hatu diladila kombinga yovaengeli, otashi dulika tu diladile kunghee va yooloka ko kufye. Pashihopaenenwa, ova shitwa tete, ofimbo inatu shitwa. (Job 38:​4, 7) Ove na eenghono dinene ve tu dule. Ovayapuki novayuki ve tu dule, molwaashi inatu wanenena. — Luk. 9:26.

² Ashike nonande otwa yooloka ko kovaengeli, otwe va fa meenghedi dihapu. Pashihopaenenwa, ohatu dulu okuhopaenena omaukwatya aJehova, ngaashi ovaengeli. Ngaashi ovaengeli, nafye otu na emanguluko lokuninga omatokolo. Otu na omadina, omaukwatya nosho yo oinakuwanifwa ya yoolokafana ngaashi vo. Ngaashi ovaengeli, nafye otwa pumbwa okulongela Omushiti wetu. — 1 Pet. 1:12.

3. Oshike hatu dulu okulihonga kovaengeli ovadiinini?

³ Molwaashi otwa faafana novaengeli moinima ihapu, oihopaenenwa yavo iwa otai dulu oku tu twa omukumo. Ohatu dulu okulihonga oihopaenenwa ihapu iwa kuvo. Moshitukulwa eshi, ohatu ka kundafana nghee hatu dulu okuhopaenena elininipiko lavo, ohole yavo yokuhola ovanhu, elididimiko lavo nosho yo eenghendabala davo dokukaleka eongalo la koshoka.

OVAENGELI OVALININIPIKI

4. (a) Ovaengeli ohava ulike ngahelipi elininipiko? (b) Omolwashike ovaengeli ve li ovalininipiki? (Epsalme 89:7)

⁴ Ovaengeli ovadiinini ove li ovalininipiki. Nonande ove na owino muhapu, ovanaenghono novanaendunge ohava dulika kuJehova. (Eps. 103:20) Eshi tava wanifa po oinakuwanifwa yavo, ihave i litangele, ile va yandje elitulemo kuvo vene. Ohava kala va hafa ngeenge tava longo keshe osho Kalunga ta pula va ninge, nonande kave shiivike komadina avo.a (Gen. 32:​24, 29; 2 Eeh. 19:35) Ohava anye okupewa efimano, olo la wana ashike okupewa Jehova. Omolwashike ovaengeli ve li ovalininipiki neenghono? Omolwaashi ove hole Jehova nove mu fimaneka neenghono. — Lesha Epsalme 89:7.

5. Ongahelipi omweengeli umwe a li a ulika elininipiko, eshi a li ta pukulula omuyapostoli Johannes? (Tala yo efano.)

⁵ Natu ka taleni koshiningwanima shimwe, osho tashi ulike kutya ovaengeli ovalininipiki. Mo 96 O.P., omweengeli umwe, oo edina laye inali tumbulwa, okwa li a ulikila omuyapostoli Johannes emoniko likumwifi. (Eh. 1:1) Johannes okwa li e linyenga ngahelipi kemoniko olo? Okwa li te linyongamene omweengeli oo. Ashike oshishitwa osho shopamhepo oshe mu kangheka, ndele tashi ti: “Oto ningi ngahelipi? Ino linyongamena nge. Linyongamena Kalunga! Ame naame omupiya ngaashi ove.” (Eh. 19:10) Omweengeli oo ka li tuu omulininipiki! Ka li a hala okupewa efimano. Diva okwa li a lombwela Johannes e linyongamene Jehova Kalunga. Omweengeli ka li a dina Johannes. Nonande omweengeli oo okwa longela Jehova efimbo lile noku na eenghono e dule Johannes, okwa li a tala ko omuyapostoli e li omupiya mukwao. Nokuli nonande omweengeli okwa li a pukulula Johannes, ka li e shi ninga nonyanya. Ndele ponhele yaasho, okwa li a popya naye nonghenda. Okwa li a didilika kutya Johannes okwa kuminwa emoniko olo.

6. Ongahelipi hatu dulu okuhopaenena elininipiko lovaengeli?

⁶ Ongahelipi hatu dulu okuhopaenena elininipiko lovaengeli? Ngaashi ovaengeli, nafye otwa pumbwa okulonga noudiinini moilonga yaJehova, nopehe na okulitangela osho twa pondola. (1 Kor. 4:7) Shikwao vali, inatu pumbwa okukala tu udite kutya otu dule vamwe, ngeenge otwa longela Jehova oule wefimbo, ile ngeenge otu na oinakuwanifwa yonhumba. Oshoshili kutya, ngeenge otwa kala tu na oinakuwanifwa ihapu, otwa pumbwa okulitala ko tu vanini. (Luk. 9:48) Ngaashi ovaengeli, otwa pumbwa okukwafela vamwe. Inatu hala tu ningife vamwe va diladile kutya otwa fimana tu va dule.

7. Ongahelipi hatu dulu okuulika elininipiko, ngeenge hatu pukulula umwe, ile hatu yandje omayele?

⁷ Ohatu dulu yo okuulika elininipiko, ngeenge hatu pukulula umwe, ile hatu yandje omayele komwiitaveli mukwetu, ile kokaana ketu. Omafimbo amwe, ngeenge hatu yandje omayele, otwa pumbwa oku shi ninga nopehe na okulila okafima koluko. Ashike ngaashi omweengeli oo a li a pukulula Johannes nonghenda, nafye ohatu dulu okuyandja omayele mokuhaningifa omunhu a kale a teka omukumo. Ngeenge ihatu diladila kutya otu li xwepo tu dule vamwe, otashi ke tu kwafela tu yandje omayele a kanghamena kOmbiibeli, hatu shi ningi monghedi yefimaneko nosho yo nonghenda. — Kol. 4:6.

OVAENGELI OVE HOLE OVANHU

8. (a) She likolelela kuLukas 15:​10, ongahelipi ovaengeli hava ulike kutya ove hole ovanhu? (b) Onghandangala ilipi ovaengeli tava dana moilonga yokuudifa? (Tala yo efano yoshifo.)

⁸ Ovaengeli ove na ko nasha naasho tashi ningilwa ovanhu; ihava diladila kutya fye ovanhu vongaho. Ponhele yaasho, ove hole ovanhu. Ohava kala va hafa, ngeenge omulunde e lidilulula nokwaalukila kuJehova, ile ngeenge umwe a lundulula onghedi yaye yokukalamwenyo nokwe uya moshili. (Lesha Lukas 15:10.) Ovaengeli ohava kufa yo ombinga moilonga yokuudifa Ouhamba. (Eh. 14:6) Nonande ihave shi ningi odikilila, otashi dulika va wilike omuudifi a ye kuumwe, oo a hala okulihonga kombinga yaJehova. Itatu dulu okupopya filufilu kutya ovaengeli ove tu wilika tu ye komunhu wonhumba. Kakele kaasho, Jehova oha longifa omhepo yaye iyapuki, opo a kwafele ovanhu, ile a wilike ovapiya vaye. (Oil. 16:​6, 7) Ashike natango, oha longifa ovaengeli, opo ve tu kwafele, eshi hatu udifa. Onghee eshi hatu kufa ombinga moilonga yokuudifa, ohatu dulu okukala tu na elineekelo kutya ovaengeli otave tu yambidida. Tala oshimhungu “Omailikano avo okwa li a nyamukulwa.”b

9. Ongahelipi hatu dulu okuhopaenena ovaengeli mokukala tu hole ovanhu?

⁹ Ongahelipi hatu dulu okuhopaenena ovaengeli mokukala tu hole ovanhu? Ngeenge otwa udu eshiivifo kutya umwe okwaalukila kuJehova, otwa pumbwa okukala twa hafa ngaashi ovaengeli. Otwa pumbwa oku mu shilipaleka kutya otu mu hole notwa hafa, eshi a hovela vali okulongela Jehova. (Luk. 15:​4-7; 2 Kor. 2:​6-8) Ohatu dulu yo okuhopaenena ovaengeli mokuninga ngaashi hatu dulu moilonga yokuudifa. (Omuud. 11:6) Ngaashi ashike ovaengeli have tu yambidida, ngeenge hatu kufa ombinga mokuudifa onghundana iwa, nafye ohatu dulu okukonga eemhito, opo tu yambidide ovamwatate novamwameme moukalele. Pashihopaenenwa, mbela itatu dulu okuninga omalongekido, opo tu longe pamwe nomuudifi mupe? Mbela itatu dulu okuyambidida ovamwatate novamwameme ovanamido, ile ovo vehe na oukolele, opo va kufe ombinga moukalele?

10. Oshike hatu lihongo moshimoniwa shaSara?

¹⁰ Oshike hatu dulu okuninga, ngeenge onghalo yetu itai tu pitike tu ninge ngaashi hatu dulu moilonga yaJehova? Otwa pumbwa okulundulula eenghedi detu dokuudifa, opo tu dule okulonga pamwe novaengeli. Natu ka taleni koshimoniwa shaSara,c omumwameme wokoIndia. Konima eshi a kala nokukokola ondjila oule womido 20, okwa li a kwatwa koudu noka li ha dulu okudja mo mombete. Okwa li a polimana neenghono. Ashike mokweendela ko kwefimbo, okwa dula vali okukala a hafa omolwekwafo olo ha pewa kovamwatate novamwameme vomeongalo lavo nosho yo eshi a kala ha lesha Ombiibeli pandjikilile. Okwa li e na okulundulula onghedi yaye yokuudifa. Molwaashi ka li ta dulu okushanga eenhumwafo, okwa li ha yandje oundombwedi okupitila mongodi. Okwa li ha dengele omalishuneko aye, nokwa li hae mu lombwele kutya ope na vali vamwe va hala okukonakona Ombiibeli. Oshidjemo? Moule ashike weemwedi donhumba, Sara okwa ka kala e na ovakonakonimbiibeli 70, noka li ta dulu okukonakona navo aveshe. Onghee vamwe okwe va yandja po kuvamwe meongalo. Vahapu vomuvo paife ohava kala pokwoongala. Ovaengeli ihava kala tuu va hafa okulonga pamwe novamwatate novamwameme, ovo hava longo ngaashi tava dulu moilonga yokuudifa, ngaashi Sara!

OVAENGELI OVA ULIKA ELIDIDIMIKO

11. Ongahelipi ovaengeli ovadiinini va ulika elididimiko?

¹¹ Ovaengeli ovadiinini ova tula po oshihopaenenwa shiwa shi na sha nelididimiko. Ova kala nokulididimikila okuhenouyuki nosho yo oukolokoshi oule womido omayovi. Ova mona Satana nosho yo oishitwa ihapu imwe yopamhepo, oyo ya li hai longele Jehova pamwe navo, nghee ya tukululila Jehova oshibofa. (Gen. 3:1; 6:​1, 2; Jud. 6) Ombiibeli oya popya kombinga yomweengeli umwe omudiinini, oo a li a kondja nondemoni inaenghono. (Dan. 10:13) Shikwao vali, mondjokonona aishe yovanhu, ovaengeli ova mona ashike ovanhu vanini, ovo va hoolola okulongela Jehova. Ndele nonande ongaho, ovaengeli ovo ovadiinini ova twikila okulongela Jehova nehafo nosho yo nouladi. Ove shii kutya pefimbo la wapala, Kalunga ota ka xulifa po okuhenouyuki.

12. Oshike tashi dulu oku tu kwafela tu lididimike?

¹² Ongahelipi hatu dulu okuhopaenena elididimiko lovaengeli? Ngaashi ovaengeli, nafye otashi dulika twa ningilwa okuhenouyuki. Ashike ngaashi vo, otwa tomhwa kutya Kalunga ota ka xulifa po oukolokoshi pefimbo la wapala. Onghee ngaashi ovaengeli ovadiinini, “inatu lolokeni okulonga ouwa.” (Gal. 6:9) Kalunga okwa udaneka oku tu kwafela tu lididimike. (1 Kor. 10:13) Ohatu dulu okwiilikana kuJehova, opo e tu pe omhepo yaye, oyo tai dulu oku tu kwafela tu lididimike nokukala twa hafa. (Gal. 5:22; Kol. 1:11) Ongahelipi ngeenge owa taalela omapataneko? Lineekela filufilu muJehova, noino pumbwa okukala wa tila. Jehova ote ku yambidida alushe noku ku pameka. — Heb. 13:6.

OVAENGELI OHAVA KWAFELE EONGALO LI KALE LA KOSHOKA

13. Oshinakuwanifwa shilipi ovaengeli ve na momafiku aa axuuninwa? (Mateus 13:​47-49)

¹³ Momafiku aa axuuninwa, Jehova okwa pa ovaengeli oshinakuwanifwa she likalekelwa. (Lesha Mateus 13:​47-49.) Oilonga yokuudifa ohai kwafele ovanhu vomaludi aeshe ve uye moshili. Vamwe ohava ningi eenghendabala va lundulule onghedi yavo yokukalamwenyo, opo va kale metwokumwe nomifikamhango daJehova. Ovaengeli ova pewa oshinakuwanifwa ‘shokuyoolola mo ovakolokoshi mokati kovayuki.’ Ohava kwafele eongalo li kale la koshoka. Osho inashi hala kutya keshe umwe, oo a efa po okweendafana nafye, kashi na nee mbudi kutya onetomheno lashike, ke na efiku vali a alukile kuJehova; noinashi hala yo kutya meongalo kamu na efiku mu holoke omaupyakadi. Ashike ohatu dulu okukala noushili kutya, ovaengeli ohava longo noudiinini, opo ve tu kwafele tu kaleke omaongalo etu a koshoka.

14-15. Ongahelipi hatu dulu okuhopaenena ovaengeli mokukaleka eongalo la koshoka pamhepo nosho yo paenghedi? (Tala yo omafano.)

¹⁴ Ongahelipi hatu dulu okuhopaenena ovaengeli mokukaleka eongalo la koshoka? Omokuninga ngaashi hatu dulu tu kaleke eongalo la koshoka paenghedi nosho yo pamhepo. Otwa pumbwa okukendabala okwaamena omitima detu mokuhoolola ookaume pandunge nokukala kokule noinima oyo tai nyono po ekwatafano letu naJehova. (Eps. 101:3) Ohatu dulu yo okukwafela ovaitaveli vakwetu va kale ovadiinini kuJehova. Pashihopaenenwa, oshike tu na okuninga po, ngeenge otwa didilika kutya omwiitaveli mukwetu okwa nyona enyono la kwata moiti? Omolwohole yoku mu hola, otwa pumbwa okuladipika omwiitaveli mukwetu a ka popye novakulunhuongalo. Ngeenge okwa dopa oku shi ninga, otwa pumbwa okulombwela ovakulunhuongalo shi na sha nenyono laye. Otwa hala omwiitaveli mukwetu, oo a nghundipala pamhepo, a kwafelwe diva. — Jak. 5:​14, 15.

¹⁵ Shinyikifa oluhodi, vamwe ovo va nyona omanyono a kwata moiti ova kufwa mo meongalo. Monghalo ya tya ngaho, ohatu ‘efa po okweendafana’ navo.d (1 Kor. 5:​9-13) Elongekido olo ohali kwafele eongalo li kale la koshoka. Shikwao vali, ngeenge otwa kala ihatu endafana novanhu, ovo va kufwa mo meongalo, ohatu ulike kutya otu va hole. Ngeenge hatu dulika kuJehova mokuhaendafana navo, otashi dulika shi va kwafele va didilike kutya ova pumbwa okwaalukila kuJehova. Ngeenge ova ningi ngaho, ohatu ka kala twa hafa pamwe naJehova nosho yo novaengeli vaye. — Luk. 15:7.

16. Omeenghedi dilipi hatu dulu okuhopaenena ovaengeli?

¹⁶ Kashi fi tuu oufembanghenda munene, eshi Jehova e tu pitika tu lihonge kombinga yovaengeli nokulonga pamwe navo! Onghee hano, natu hopaeneneni omaukwatya avo mawa, ngaashi: elininipiko, ohole yokuhola ovanhu, elididimiko lavo nosho yo okukaleka eongalo la koshoka paenghedi nopamhepo. Ngeenge otwa hopaenene ovaengeli ovadiinini, nafye ohatu dulu okukala oshitukulwa shoukwaneumbo waJehova noku mu longela fiyo alushe.