Eitavelo — Oukwatya oo tau dulu oku tu kwafela tu kale twa pama

EITAVELO ohali tu pameke neenghono. Pashihopaenenwa, nonande Satana okwa hala oku tu nghundipaleka pamhepo, eitavelo ohali tu kwafele tu dule ‘okudima po oikuti yomunawii ya xwama omundilo.’ (Ef. 6:16) Ngeenge otu na eitavelo, ohatu dulu okulididimikila omaupyakadi oo taa yelekanifwa neemhunda dinene. Jesus okwa lombwela ovahongwa vaye ta ti: “Ngeno okwa li mu neitavelo li fike pombuto yoshinapi, ngeno otamu dulu okulombwela omhunda ei: ‘Lilundulula po apa, ove u lundulukile kwinya,’ ngeno tai lilundulula po.” (Mat. 17:20) Molwaashi otu shii kutya eitavelo otali dulu okupameka ekwatafano letu naJehova, oshiwa okulipula omapulo ngaashi: Eitavelo oshike? Omitima detu otadi dulu ngahelipi okunwefa mo eitavelo letu? Ongahelipi hatu dulu okupameka eitavelo letu? Olyelye tu na okwiitavela? — Rom. 4:3.

EITAVELO OSHIKE?

Eitavelo kali fi ashike okwiitavela ile okushiiva oshili molwaashi ‘eendemoni yo oda i itavela kutya oku na Kalunga ndele hadi kakama.’ (Jak. 2:19) Eitavelo oshike naanaa?

Ombiibeli oya yelifa kutya eitavelo ola kwatela mo oinima yopavali. Shotete, “eitavelo olo elineekelo la pama okulineekela osho tashi teelelwa.” (Heb. 11:1a) Ngeenge ou na eitavelo, owa itavela filufilu kutya keshe osho Jehova a popya oshoshili notashi ka wanifwa po. Pashihopaenenwa, Jehova okwa li a lombwela Ovaisrael ta ti: “Ngeenge tamu dulu okuteya po ehangano lange nomutenya nehangano lange noufiku, paha kale vali ngeno omutenya noufiku pomafimbo avo, opo nee ehangano lange naDavid, omupiya wange yo, tali ka teywa po.” (Jer. 33:20, 21) Mbela ope na efiku wa li wa tila kutya pamwe etango itali piti ile li ningine moilemo, ndele tapa kala pehe na vali oufiku nomutenya? Ngeenge iho kala wa limbililwa eemhango dopaushitwe odo hadi endifa edu nosho yo etango, mbela ou na okulimbililwa kutya Omutoti wado ota dulu okuwanifa po omaudaneko aye? Hasho nandenande! — Jes. 55:10, 11; Mat. 5:18.

Oshitivali, eitavelo olo ‘okuliyukifa painima ihe wetike.’ Eitavelo ola popiwa kutya ‘okuliyukifa painima’ ile ‘koumbangi wa yela,’ woinima ihe wetike nomesho okomutwe, ndele oyoshili. (Heb. 11:1b) Omonghedi ilipi mbela? Natu tye nee ngeno owa pulwa kokaana kutya, ‘Ou shi shii ngahelipi kutya oku na omhepo?’ Nonande omhepo ino i mona nande onale nomesho okomutwe, otashi dulika u ka kwafele ka tomhafane nomaumbangi a kola ngaashi okufuda, oilonga yomhepo nosho tuu. Ngeenge okaana oka tomhwa komaumbangi oo, otaka ka tambula ko oushili woinima oyo kehe wete. Sha faafana, eitavelo ola kanghamena koumbangi wa kola. — Rom. 1:20.

OTWA PUMBWA OMUTIMA WA YUKA

Opo omunhu a kale e na eitavelo okwa pumbwa okukala e na ‘eshiivo loshili,’ molwaashi eitavelo ola kanghamena koumbangi. (1 Tim. 2:4) Ndele eshiivo olo halo ashike la pumbiwa. Omuyapostoli Paulus okwa shanga a ti kutya, omunhu oha ‘itavele nomutima.’ (Rom. 10:10) Omunhu ke na ashike okwiitavela oshili, ndele oku na yo okukala e i lenga. Kungaho opo ashike tashi ke mu linyengifa a ulike eitavelo, sha hala okutya, a katuke metwokumwe noshili. (Jak. 2:20) Omunhu oo ehe na lela olupandu li na sha noshili, ota dulu okwaanya nokuli noumbangi oo wa yela molwaashi ina hala okweefa po osho a itavela ile omahalo aye opambelela. (2 Pet. 3:3, 4; Jud. 18) Nomolwaasho pefimbo lOmbiibeli, haaveshe ovo va li va mona oikumwifilonga va li ve na eitavelo. (Num. 14:11; Joh. 12:37) Omhepo iyapuki yaKalunga ohai kulike ashike eitavelo movanhu ovo ve tonde oipupulu momitima davo. — Gal. 5:22; 2 Tes. 2:10, 11.

NGHEE DAVID A KULIKA EITAVELO LA KOLA

Ohamba David oyo imwe yomwaavo va li ve na eitavelo la kola. (Heb. 11:32, 33) Ashike haaveshe moukwaneumbo wooDavid va li ve na eitavelo la tya ngaho. Pashihopaenenwa, pomhito imwe Eliab, omukulu waDavid, ka li a ulika eitavelo eshi a hanyena David eshi a li ehe uditile nawa eenghatu daGoliat. (1 Sam. 17:26-28) Kape na oo a dalwa neitavelo, ile e li fyuulula kovadali vaye. Onghee eitavelo laDavid ola li la kanghamena kekwatafano laye naKalunga.

David okwa popya mEpsalme 27 osho she mu kwafela a kale e na eitavelo la kola. (Ovelishe 1) David okwa li ha dilonga koimoniwa yaye yomonakudiwa nokunghee Jehova a li ha ungaunga novatondi vaye. (Ovelishe 2, 3) Okwa li e na olupandu linene li na sha notembeli yaJehova. (Ovelishe 4) David okwa li ha longele Kalunga motembeli pamwe novaitaveli vakwao. (Ovelishe 6) Okwa li ha ilikana kuJehova a mana mo. (Ovelishe 7, 8) David okwa li yo a halelela okuhongwa eendjila daKalunga. (Ovelishe 11) Onghee, eitavelo ola li la fimana kuDavid nomolwaasho e lipula ta ti: “Ohandi kala nda tya ngahelipi ngeenge nghi na eitavelo?” — Ovelishe 13, NW.

NGHEE TO DULU OKUPAMEKA EITAVELO LOYE

Ngaashi David, naave oto dulu okukala u na eitavelo ngeenge owa hopaenene oikala yopamadiladilo neenghedi odo da popiwa mEpsalme 27. Molwaashi eitavelo ola kanghamena keshiivo lashili, ngeenge owa kala ho lesha Eendjovo daKalunga noishangomwa yopaMbiibeli, otashi ka kala shipu elela kwoove okwiimika oiimati yomhepo yaKalunga. (Eps. 1:2, 3) Kala ho dilonga ngeenge to konakona. Okudilonga oko haku kwafele omunhu a kulike olupandu. Ngeenge owa kulike olupandu loye li na sha naJehova, otashi ke ku linyengifa u ulike eitavelo mokulongela Kalunga meongalo nomokuhepaululila vamwe eteelelo loye. (Heb. 10:23-25) Ohatu ka ulika yo eitavelo ngeenge otwa kala hatu ‘ilikana nopehe na okuloloka.’ (Luk. 18:1-8) Onghee hano, “ilikaneni muhe nedimbuko” kuJehova, mu na elineekelo kutya “oye te mu file oshisho.” (1 Tes. 5:17; 1 Pet. 5:7) Eitavelo ohali tu linyengifa tu katuke eenghatu, neenghatu ohadi pameke eitavelo letu. — Jak. 2:22.

KALA U NA EITAVELO MUJESUS

Jesus okwa li a lombwela ovahongwa vaye moufiku oo wa tetekela efyo laye a ti: “Itaveleni Kalunga nye mu itavele nge yo.” (Joh. 14:1) Onghee katu na ashike okwiitavela Jehova oye aeke, ndele naJesus yo. Ongahelipi to dulu okukala neitavelo muJesus? Natu ka kundafaneni eenghedi nhatu.

Yotete, tala ko ekuliloyambo li li oshali oyo wa pewa kuKalunga. Omuyapostoli Paulus okwa ti: “Ondi nomwenyo mokwiitavela Omona waKalunga, ou e hole nge nokwe liyandja ponhele yange.” (Gal. 2:20) Ngeenge owa kala u na eitavelo muJesus, oto ka dimina filufilu kutya ekuliloyambo otali dulu oku ku kwafela, tali shi ningifa tashi shiiva u diminwe po, tali ku pe eteelelo lomwenyo waalushe notali ka koleka filufilu kutya Kalunga oku ku hole. (Rom. 8:32, 38, 39; Ef. 1:7) Osho otashi ke ku pameka u efe po omadiladilo mai nokukala u udite u na ondjo. — 2 Tes. 2:16, 17.

Onhivali, ehena popepi naJehova okupitila meilikano pakanghameno lekuliloyambo laJesus. Omolwekuliloyambo, ohatu dulu okwiilikana kuJehova tu “neyombamo [emanguluko lokupopya], tu talwe nonghenda fye tu mone efilonghenda loku tu kwafa pefimbo liwa.” (Heb. 4:15, 16; 10:19-22) Eilikano ohali tu pameke tu kale twa tokola toko okukondjifa omayeleko oo tae tu twala menyono. — Luk. 22:40.

Onhinhatu, dulika kuJesus. Omuyapostoli Johannes okwa ti: “Ou ta itavele Omona, oye e nomwenyo waalushe; ndelenee ou iha dulika kOmona, ita ka mona omwenyo, ndelenee ehandu laKalunga otali kala kombada yaye.” (Joh. 3:36) Didilika kutya Johannes okwa pingakanifa okukala neitavelo nokuhadulika. Onghee hano, ngeenge to dulika kuJesus oho ulike kutya ou na eitavelo. Oho dulika kuJesus mokushikula “omhango yaKristus,” sha hala okutya ashishe osho a popya nokwa honga. (Gal. 6:2) Oho dulika yo kuJesus mokutambula ko ewiliko olo ha yandje okupitila ‘momupiya omudiinini nomunaendunge.’ (Mat. 24:45) Ngeenge owa kala ho dulika kuJesus, otashi ke ku pameka u dule okulididimikila omaudjuu oo taa yelekanifwa noikungulu. — Luk. 6:47, 48.

“LITUNGILENI KEKANGHAMENO LEITAVELO LENI LIYAPUKI”

Omulumenhu umwe okwa li a lombwela Jesus ta ti: “Onda itavela. Kwafa okuhaitavela kwange.” (Mark. 9:24) Omulumenhu oo okwa li e na eitavelo, ashike okwa li a mona kutya eitavelo laye ola pumbwa okuwedelwa. Ngaashi omulumenhu oo, nafye omafimbo amwe ohatu kala twa pumbwa okuwedelwa eitavelo. Atusheni ohatu dulu okupameka eitavelo letu paife. Ngaashi twe shi kundafana, ohatu ka pameka eitavelo letu ngeenge otwa kala hatu konakona Eendjovo daKalunga nokudilonga kudo, naasho otashi ke tu kwafela tu kale tu na olupandu lomoule li na sha naJehova. Ohatu ka kala tu na eitavelo la pama ngeenge otwa kala hatu longele Jehova pamwe novaitaveli vakwetu, hatu udifile vamwe kombinga yeteelelo letu, nokutwikila okwiilikana. Ngeenge otwa pameke eitavelo letu, ohatu ka mona ondjabi ya denga mbada. Eendjovo daKalunga ode tu lombwela da ti: “Ovaholike, litungileni kekanghameno leitavelo leni liyapuki . . . opo mu likaleke mohole yaKalunga.” — Jud. 20, 21.