Mbela itandi dulu okuninga omukokolindjila?
1-3. “Vamwe ohava ti oukokolindjila kau fi oshinima sha keshe umwe. Ongahelipi handi dulu okumona kutya naame ohandi dulu okuninga omukokolindjila?”
1 Mbela owa diladilile ngoo nale wa mana mo pamwe neilikano ngeenge oto dulu okuninga omukokolindjila? Ngeenge otwe liyapulila Jehova, otu na okutala ngeenge ohatu dulu ngoo okukufa ombinga pauyadi mokuudifa onghundana iwa yOuhamba. Onghee hano, natu ka kundafaneni omapulo amwe oo vahapu hava pula shi na sha noukokolindjila.
2 Enyamukulo ole likolelela keenghalo nokoinakuwanifwa yoye yopamishangwa. Ope na vahapu ovo oukolele ile eenghalo omo ve li itadi va pitike opo va wanife po eevili 70 momwedi moukalele. Kakele kaasho, ovamwatate novamwameme vahapu ovo ve limangulula ko koinakuwanifwa yavo ova ninga ovakokolindjila eshi va ninga omalunduluko moinima oyo va lenga monghalamwenyo yavo. Ongahelipi shi na sha naave? Mbela ou li omunyasha oo a mana ondodo onhimulongo nonhivali? Mbela ou li omukulukadi oo omushamane woye ha dulu okuwanifa po eemhumbwe adishe doukwaneumbo? Mbela owa hombolwa ile wa hombola ndele kamu na ounona ovo tamu file oshisho? Mbela owa peendjelwa koilonga yomboloto? Kutya nee oto ka kufa oukokolindjila ile hasho, omunhu keshe oku na okuninga etokolo kuye mwene. Ndele epulo ole li kutya, mbela ito dulu okuliunganeka opo u ninge omukokolindjila?
3 Satana ota longifa onghalelo younyuni waye opo a piyaaneke onghalamwenyo yetu noku tu kwata ko nohole yokulihola mwene. Ngeenge otwa tokola tuha kale oshitukulwa shounyuni ou, Jehova ote ke tu kwafela tu pitife komesho tete oinima yOuhamba nokulalakanena nokudiinina omaufembanghenda opaKriste aeshe oo hatu dulu okumona. Ngeenge oto dulu okuninga omalunduluko momalipyakidilo oye opo u ninge omukokolindjila, omolwashike ito shi ningi?
4-7. “Ongahelipi handi dulu okushilipaleka kutya ohandi ka dula okulifila oshisho pashimaliwa ngeenge onda i moilonga yefimbo liyadi?”
4 Momukokomoko womido onghalo oya enda tai lunduluka omo ovanhu ve na okulonga eevili dihapu opo va mone osho sha talika ko shi li oipumbiwa yonghalamwenyo. Kakele kaasho, ovanhu vahapu ova kokola ondjila oule womido omilongo, naJehova ota twikile noku va yambidida. Opo u pondole u li omukokolindjila, owa pumbwa eitavelo nomhepo yeliyambo. (Mat. 17:20) Epsalme 34:11 otali tu shilipaleke kutya “ou ta kongo omwene, ye ita hepa sha shiwa nande.” Keshe oo ta ningi omukokolindjila oku na okukala elineekela filufilu kutya Jehova ote ke mu fila oshisho. Osho osho ha ningile ovakokolindjila ovadiinini mounyuni aushe. (Eps. 37:25) Metwokumwe nefinamhango olo li li mo 2 Ovatessaloniki 3:8, 10 nosho yo mu 1 Timoteus 5:8, ovakokolindjila kave na okukala va teelela va filwe oshisho kuvamwe pashimaliwa.
5 Keshe oo a hala okuninga omukokolindjila oku na okuninga ngaashi Jesus a ti: ‘Kala omutumba manga, ndele to valula oitungifo.’ (Luk. 14:28) Ohatu ka ulika ounongo ngeenge otwa ningi ngaho. Popya novakokolindjila ovo va pondola moshilonga osho oule womido. Va pula nghee Jehova a kala he va file oshisho.
6 Omunhu otashi dulika a kale ina mona oushili weudaneko leendjovo daJesus pauyadi olo tali hangwa muMateus 6:33 fiyo osheshi eliyandja kuJehova. Ounyuni ou we tu dingilila otau xumifa komesho ohole yoinima yopamaliko. Ashike, ngeenge otwa kala nolupandu li na sha noilonga yefimbo liyadi otashi ke tu kwafela tu kale twa wanenwa ku kanini oko tu na. (1 Tim. 6:8) Ovakokolindjila ovo va nangwafapaleka onghalamwenyo yavo nokuunganeka nawa efimbo lavo, ohava kala ve na efimbo lihapu moukalele, hava mono ehafo linene naashi tava hongo vamwe oshili, ohashi va pameke pamhepo. Nonande itava kendabala okulidilika shihe li pandjele, ohava ungaunga nonghalo yopamaxupilo pandjele opo va dule okuhafela omanangekonoupuna oukokolindjila.
7 Ngeenge owa tomhwa shili kutya otu li momafiku a xuuninwa nonokutya ounyuni woukolokoshi kau na ko vali efimbo lile, oto ka tuwa omukumo pamhepo u ninge omaliyambo oo a pumbiwa opo u dule okuudifa onghundana iwa pomhito keshe. Ngeenge owa konakona nawa onghalo yoye yopainiwe nokweefela oinima momake aJehova, otashi dulika u ka mone kutya oto dulu oku mu longela efimbo liyadi. Nonande ou na okweefa po oinima imwe yopamaliko oyo wa hala opo u dule okukokola ondjila, oto ka hafela omanangeko noupuna aJehova. — Eps. 145:16.
8-12. “Ndi li omunyasha, omolwashike ndi na okutala ko oukokolindjila u li eifano lange?”
8 Alushe ngeenge u li pokumana ondodo yaxuuninwa, oho diladila kombinga yonakwiiwa. Oho kala wa hala onakwiiwa ya amenwa, i na elao notai ti sha. Ovayandjimayele keefikola otashi dulika ve ku ladipikile eifano la denga mbada koiputudilo yopombada olo tali pula omido dihapu. Eliudo loye lopaKriste la deulwa nawa otali ku lombwele kutya ou na okulilongekida opo u longele Jehova pauyadi ngaashi tashi dulika. (Omuud. 12:1) Otashi dulika yo u diladile shi na sha nokuya mohombo nosho yo nokukala u na oukwaneumbo. Oshike to ka ninga po?
9 Pomhito oyo omatokolo oo to ningi monghalamwenyo otaa ka kuma onakwiiwa yoye aishe. Ngeenge ou li nale Ondombwedi ye liyapulila Jehova, ya ninginifwa, owe liyandjela Jehova nomwenyo aushe. (Heb. 10:7) Ngeenge otashi dulika, kendabala okukufa oukwafelikokolindjila omwedi umwe ile di dule po. Osho otashi ke ku kwafela u makele ehafo noinakuwanifwa oyo hai di moukwafelikokolindjila netaleko loye li na sha naasho u na okulongifa onghalamwenyo yoye nopehe na omalimbililo otali ka kala layela. Ponhele, yokulalakanena oilonga yomboloto yefimbo liyadi shimha wa mane ondodo onhimulongo nonhivali, omolwashike ito hovele oukwafelikokolindjila? Vamwe ovo va kala va teelela fiyo tava shelelelwa opo va ka hafele oukokolindjila ohave li pe oushima eshi inava hovela diva.
10 Ovanyasha osha fimana okulongifa efimbo leni opo mu lalakanene eemhito daavo inava hombolwa ile inava hombola, nokuhafela omauwa oo haa di moilonga yefimbo liyadi. Ngeenge oho ka kala wa hala okuhombola, kape na ekanghameno liwa lohombo li dule okulonga tete oilonga youkokolindjila wondjikilile. Eshi to ende to kulu palutu nopamhepo, otashi dulika u hoolole okuninga oukokolindjila eifano loye nye nakaume koye kopahombo. Ovalihomboli vamwe ovo va kokola ondjila pamwe ova ninga ovapashukilishikandjo ile ovatumwa. Onghedi yokukalamwenyo oyo oya denga mbada shili!
11 Kashi na nee mbudi kutya oto ka twikila okukokola ondjila efimbo li fike peni, oto ka mona ehongo nedeulo itali dulu okuyelekwa nasha olo itali dulu okuyandjwa keifano limwe kombada yedu. Ovakokolindjila ohava hongwa eenghedi, nghee tava dulu okuliunganeka pauhandimwe, okuungaunga novanhu, okulineekela muJehova nonghee tava dulu okuulika elididimiko nonghenda, omaukwatya oo tae ke va kwafela va wanife po oshinakuwanifwa shinenene.
12 Ovanhu inava kala nale nonghalamwenyo inai amenwa shi dulife paife. Kakele koinima oyo Jehova a udaneka, oinima ashike inini hai kalelele shili. Molwaashi onakwiiwa yoye oi li momake oye, mbela paife halo efimbo liwa opo u diladile wa mana mo shi na sha nanghee to ka longifa onghalamwenyo yoye momido tadi uya? Diladila moule shi na sha noufembanghenda wokukokola ondjila. Ito ke lipa oushima nandenande ngeenge owa hoolola oukokolindjila u ninge eifano loye.
13-16. “Mbela oshi li omutengi okuwanifa po eevili odo da pumbiwa? Ongahelipi ngeenge onda kala inandi di wanifa po?”
13 Ngeenge to yadeke ofooloma youkokolindjila wondjikilile, ou na okunyamukula epulo eli tali ti: “Mbela owa unganeka ngoo oinima yoye yopaumwene opo u dule okuwanifa eevili 840 odo wa pumbwa okulonga komudo?” Osha yela kutya osho otashi pula u ninge elandulafano launganekwa nawa nosho yo elipangelo. Ovakokolindjila vahapu ohava mono diva onghedi tai pondola moule ashike weemwedi dinini.
14 Kakele kaasho, Omuudifi 9:11, (NW 2013) Ombibeli oya popya paushili ya ti, “efimbo noiningwanima yombadilila otai dulu okuhanga keshe umwe.” Ouyahame wa kwata moiti ile eenghalo odo hadi holoka ombadilila otadi dulu okushunifa pedu oilonga yomukokolindjila. Ngeenge oupyakadi owa tameke pehovelo lomudo woilonga noi na u kwata efimbo lile, omukokolindjila otashi dulika ta pumbwa ashike okulongela po eevili defimbo olo ina longa. Ndele ongahelipi ngeenge opa holoka oupyakadi wonhumba eshi ku na ashike eemwedi dinini domudo woilonga nomukokolindjila ita dulu vali okuwanifa po eevili daye?
15 Ngeenge owa kwatwa kouyahame wopakafimbo oule weemwedi donhumba ile pe na omatomheno opaulumomhumbwe oo e ku ningifa opo uha dule okuwanifa po eevili odo wa teelelwa u longe, oto dulu okumona oshilyo shOkomitiye yOilonga yEongalo noku shi yelifila oupyakadi woye. Ngeenge ovakulunhuongalo ove wete kutya otashi ka kala pandunge oku ku pitika u twikile nokukokola ondjila nopehe na okulipula shi na sha nefimbo olo wa kanifa, otava dulu okuninga etokolo la tya ngaho. Hamushanga ota ka didilika mokakalata kovaudifi keongalo opo a ulike kutya ino pumbwa okulonga eevili dinya da kana.
16 Ovakokolindjila ovanawino ohava longo eevili da wedwa po petameko lomudo woilonga. Ohava tale ko oukokolindjila wa fimanenena kuvo, nomolwaasho omafimbo amwe ohava mono sha pumbiwa okuninipika omalipyakidilo avo oo inaa fimana. Ngeenge omukokolindjila okwa kala ina wanifa po eevili molwaashi ina tula po elandulafano liwa ile ehe na elipangelo a diinine kulo, oku na okukala e shii kutya oshi li oshinakuwanifwa shaye a wanife po eevili odo a kanifa ndele ke na okuteelela a ungaungwe naye monghedi ye likalekelwa.
17. “Onda hala okuwanifa po oshinima shonhumba noku shi hafela. Mbela oukokolindjila otau dulu ngoo okweetela nge ehafo?”
17 Ehafo lashili unene ola kanghamena kokukala twa ehena popepi naJehova, tu na ekwatafano naye pauhandimwe nokukala twa tomhwa kutya ohatu mu longele noudiinini. Monghalelo ei yoinima yopaife, ohatu dulu okumona ehafo la shili ngeenge omalipyakidilo etu omonghalamwenyo a fimana okwe likolelela kokulongela Jehova. Okulalakanena oinima yopamhepo otashi ke tu kwafela tu kale tu na onghalamwenyo i na eityo lashili molwaashi moule womitima detu otu shii kutya ohatu longo osho sha yuka. Ehafo lashili ohali di mokuyandja, notu shii kutya kaku na vali onghedi imwe ya denga mbada yokuyandja i dule okuhonga vamwe nghee tava dulu oku ka mona omwenyo waalushe mounyuni mupe waKalunga. — Oil. 20:35.
18, 19. “Ngeenge oukokolindjila kau fi oshiteelelwa shoku ka mona omwenyo waalushe, mbela oshi na ngoo oshilonga kutya ohandi kokola ondjila ile hasho?”
18 Oshoshili kutya etokolo oloye mwene okuninga omukokolindjila. Jehova oye aeke ta dulu okutokola eenghalo doye dopaumwene. (Rom. 14:4) Nopehe na omalimbililo, okwa teelela u mu longele nomutima woye aushe, nomwenyo woye aushe, neendunge doye adishe nosho yo neenghono doye adishe. (Mark. 12:30; Gal. 6:4, 5) Oku hole ovo hava yandje nehafo, have mu longele nehafo ndele hanomunyengutima ile kefininiko. (2 Kor. 9:7; Kol. 3:23) Etomheno la fimana lokuya moilonga yefimbo liyadi nali kale ohole yokuhola Jehova nosho yo ovanhu ovo ve ku dingilila. (Mat. 9:36-38; Mark. 12:30, 31) Ngeenge osho u udite ngaho, owa pumbwa okudilonga moule shi na sha noukokolindjila.
19 Otwe lineekela kutya osho sha kundafanwa omu otashi ke ku kwafela u talulule etaleko loye li na sha noku kufa oukokolindjila. Mbela ito dulu okuninga omalunduluko momalipyakidilo oye opo u ninge omukokolindjila wondjikilile? Oto dulu okupondola kekwafo laJehova! Okwa udaneka a ti: ‘Ohandi ke mu lokifila enangekonoupuna la wanenena.’ (Mal. 3:10) Epulo olo eli kutya, “Mbela ito dulu okuninga omukokolindjila?” Ngeenge enyamukulo loye “Heeno ohandi dulu,” tula po efiku olo to ka hovela okukokola ondjila diva noto shilipalekwa yo kutya Jehova ote ke ku nangeka noupuna nehafo linene monghalamwenyo yoye!