“Oto dulu okuninga omukokolindjila muwa!”
1. Omumwameme umwe okwa li e uditile ngahelipi oilonga youkokolindjila?
1 Kathe B. Palm okwa ti: “Kape na vali oilonga imwe ngeno ya dula okumbilipaleka nge ile ngeno ya etela nge omanangeko noupuna opamhepo.” Okwa kala omukokolindjila omido omilongo, ta udifa moshilongo ashishe shaChile osho shi li kOlukadi laAmerika. Okutala komanangeko noupuna oo taa hafelwa kwaavo ve li moilonga yefimbo li yadi, otashi dulika umwe a tye kuove: “Oto dulu okuninga omukokolindjila muwa!”
2. Yelifa kutya omolwashike taku dulu okutiwa kutya embilipalelo lashili ohali di mokukufa ombinga momalipyakidilo opamhepo.
2 Onghedi yokukalamwenyo tai mbilipaleke: Omuhopaenenwa wetu Jesus, okwa li a mona epepelelo lashili mokulonga ehalo laXe. (Joh. 4:34) Onghee hano, Jesus okwa li e na oushili eshi a honga ovashikuli vaye kutya embilipalelo lashili ohali di mokukufa ombinga moilonga oyo ya pamba okulongela Jehova. Ohatu ka kala twa wanenwa ngeenge otwa kala hatu longo oilonga oyo ya hokiwa kuJehova. Shikwao vali, ngeenge ohatu longifa efimbo letu lihapu, eenghono nosho yo oiniwe yetu mokukwafela vamwe, otashi ka hapupalifa ehafo letu. — Oil. 20:31, 35.
3. Ohatu ka hafela shike ngeenge otwa tamununa mo efimbo olo hatu longifa moukalele?
3 Apa ngoo pe fike okukala efimbo lihapu moukalele, opo ngoo tapa ka kala pe fike okumona ehafo olo hali di mokuhovela nomokuninga omakonakonombibeli. Eshi hatu ende hatu likola owino nosho yo ounghulungu moukalele wetu, otashi dulika tu mone kutya nokuli nomoshitukulwa omo ovanhu vahapu ihava tambula ko etumwalaka letu omu na vamwe ovo tave linyenge nawa kulo, ndele hangaashi twa li hatu diladila pehovelo. Ovakokolindjila ohava longifa osho ve lihonga kOfikola yOilonga yOvakokolindjila, oko hava i konima eshi va kokola ondjila oule womudo. (2 Tim. 2:15) Ngeenge otwa twikile noudiinini, ohatu ka dula okukuna eembuto doshili odo tadi ka imika oiimati lwanima. — Omuud. 11:6.
4. Ovanyasha ovo ve li pokumana ofikola ova pumbwa okukonakona shike?
4 Ovanyasha: Otamu diladila ngoo nawa shi na sha nonakwiiwa yeni, ofimbo mu li pokumana ofikola? Paife otashi dulika oilonga yokofikola oyo unene hai mane po efimbo loye. Konima ngeenge owa mane ofikola, ongahelipi to dulu okulongifa efimbo olo wa kala to longifa moilonga yokofikola? Ponhele yokulalakanena eifano loilonga yokulikongela omboloto, omolwashike ito konakona pamwe neilikano opo u litulile po elalakano lokukala omukokolindjila wondjikilile? Ounghulungu oo to ka likola eshi to udifile ovanhu vomaputuko e lili noku lili, to ungaunga nomupondo nomashongo, to kulike elipangelo nosho yo eshi to kulike ounghulungu wokuhonga, otau ke ku kwafela monghalamwenyo yoye aishe.
5. Ongahelipi ovadali nosho yo eongalo tali dulu okuladipikila vamwe oilonga youkokolindjila?
5 Ovadali, otamu ningi ngoo ngaashi tamu dulu opo mu kwafele ovana veni va lalakanene oilonga yefimbo li yadi? Eendjovo deni diwa nosho yo oshihopaenenwa sheni otashi ka kwafela opo ovana veni va konge Ouhamba tete. (Mat. 6:33) Ray, oo a li a hovela okukokola ondjila konima eshi a mana ofikola okwa ti: “Meme okwa kala ha lombwele nge kutya oukokolindjila oo onghedi yokukalamwenyo ya denga mbada.” Ovanhu aveshe meongalo otava dulu okuladipika vamwe va ye moilonga youkokolindjila noku va yambidida. Jose, wokuSpania okwa ti: “Ovanhu vomeongalo letu ohava tale ko oilonga youkokolindjila i li eifano la denga mbada olo ovanyasha ve na okulalakanena. Omatyekosha avo, olupandu lavo li na sha noilonga youkokolindjila nosho yo ekwafo lavo tali longo okwa li ye shi ninga shipu kwaame okuhovela okukokola ondjila.”
6. Oshike osho hatu dulu okuninga nonande paife otashi dulika katu na ehalo lokukokola ondjila?
6 Okuungaunga nomashongo nomupondo: Ndele mbela ongahelipi ngeenge oto ti: ‘Inandi hala okukokola ondjila.’ Ngeenge osho u udite ngaho, ilikana kuJehova to mu lombwele omaliudo oye kutya, ‘Kandi shii ngeenge ohandi dulu okukokola ondjila, ashike onda hala okulonga osho tashi ku hafifa.’ (Eps. 62:9; Omayel. 23:26) Opo nee konga ewiliko laye mEendjovo daye nosho yo mehangano laye. Ovakokolindjila vahapu ohava ‘makele’ tete mokuhovela noukwafelikokolindjila, nehafo olo hava mono moukwafelikokolindjila ohali ve linyengifa va lalakanene eifano loilonga yefimbo li yadi. — Eps. 34:9.
7. Ongahelipi hatu dulu okufinda eshongo lokukala twa limbililwa shi na sha nongeenge ohatu dulu okuwanifa po eevili 70 momwedi?
7 Ongahelipi ngeenge ku na oushili kutya oto dulu okuwanifa po eevili 70 odo omukokolindjila e na okulonga momwedi? Omolwashike ito popi novakokolindjila ovo ve li meenghalo da faafana naadi doye? (Omayel. 15:22) Opo nee shanga eenghedi di lili noku lili omo to dulu okuunganeka oinima yoye. Otashi dulika u mone kutya otashi ka kala shipu kwoove ngeenge owa longifa moukalele efimbo olo tashi dulika wa li u na okulongifa moinima oyo inai fimana. — Ef. 5:15, 16.
8. Omolwashike twa pumbwa okukonakona eenghalo detu efimbo nefimbo?
8 Konakona natango eenghalo doye: Eenghalo domunhu ohadi lunduluka luhapu. Oshiwa okukonakona eenghalo doye efimbo nefimbo. Pashihopaenenwa, mbela ou li pokupendjelwa moilonga yokulikongela omboloto? Randy, oo e lipendjelifa diva, okwa ti: “Etokolo eli ola kwafela nge opo ndi dule okuhovela oukokolindjila wondjikilile pamwe nomukulukadi wange, noshe tu pa omhito opo tu ka longe keenhele oko ku na omhumbwe inene. Onda mona omanangeko noupuna mahapu omolwetokolo lange, ndele enangeko noupuna linenenene li dule makwao oo nda mona olo eliudo liwa.”
9. Ovalihomboli ove na okukonakona shike?
9 Ovalihomboli vamwe konima eshi va konakona nawa eenghalo davo ova mona kutya itava dulu okulonga aveshe moilonga yokulikongela omboloto. Oshoshili kutya osho otashi dulika shi va pule opo va ninge onghalamwenyo yavo yanafangwa, ndele omaliyambo oo hava ningi ohae va etele ouwa muhapu. John, oo omukulukadi waye a li a efa po oilonga yefimbo li yadi yokulikongela omboloto opo a tamunune mo oukalele waye, okwa ti: “Ohandi kala ndi udite nawa eshi ndi shii kutya omukulukadi wange oha kufa ombinga moinima yopamhepo momukokomoko wefiku.”
10. Oshike hashi linyengifa Ovakriste va lalakanene oukokolindjila?
10 Oukokolindjila otau ulike kutya omunhu oku na ohole neitavelo: Jehova okwe tu pa oilonga ya fimanenena yokuudifa oyo keshe umwe womufye ta dulu okulonga. Onghalelo ei yoinima yakulupa, mafiku oi li pokuhanaunwa po, ndele ovo tava ifana edina laJehova otava ka xupifwa. (Rom. 10:13) Ohole yashili yokuhola Kalunga nosho yo olupandu li na sha naasho e tu ningila otai ke tu linyengifa tu dulike kelombwelo lokuudifa nouladi lOmona waye. (Mat. 28:19, 20; 1 Joh. 5:3) Kakele kaasho, ngeenge otwa kala tu na eitavelo kutya otu li momafiku axuuninwa otashi ke tu linyengifa tu ninge ngaashi hatu dulu moukalele omanga pe na efimbo, ponhele yokulongifa ounyuni pauyadi. — 1 Kor. 7:29-31.
11. Ngeenge umwe okwe ku lombwele kutya oto dulu okuninga omukokolindjila muwa ou na oku shi tala ko ngahelipi?
11 Oukokolindjila wondjikilile kau fi ashike okulonga eevili dihapu moukalele. Oo euliko kutya otwe liyapulila Kalunga. Ngeenge umwe okwe ku lombwele kutya oto dulu okuninga omukokolindjila muwa, shi tala ko kutya okwe ku halela oshinima shiwa. Konakona pamwe neilikano opo u limbwange mumwe naavo tava kufa ombinga moilonga yaKalunga oyo tai mbilipaleke.
[Eendjovo dididilikwedi pepandja 4]
Ovadali otamu ningi ngoo ngaashi tamu dulu opo mu kwafele ovana veni va lalakanene oilonga yefimbo li yadi?
[Eendjovo dididilikwedi pepandja 5]
Jehova okwe tu pa oilonga ya fimanenena yokuudifa oyo keshe umwe womufye ta dulu okulonga.