Ongahelipi to dulu okutamununa mo oukalele woye?
1. Ope na omhumbwe ya endelela ilipi moilonga yomomapya, nomolwashike?
1 Eshi Jesus a li a mona kutya ovanhu vahapu ove na ohokwe monghundana iwa yOuhamba, okwa li a ladipika ovahongwa vaye va ‘ilikane Omwene weteyo a tume ovateyi keteyo laye.’ (Mat. 9:37, 38) Oilonga yetu oya endelela neenghono shi dulife nale molwaashi otu li mefimbo laxuuninwa leteyo. Onghee hano, otu na okudiladila pamwe neilikano shi na sha nanghee hatu dulu okutamununa mo oukalele wetu. — Joh. 14:13, 14.
2. Ovaudifi vamwe ove linyenga ngahelipi keindilo li na sha novalongi vahapu moukalele?
2 Eenghedi omo hatu dulu okutamununa mo oukalele wetu: Ovaudifi vahapu ova dula okuya moilonga youkokolindjila omolwewiliko nekwafo laJehova. (Eps. 26:2, 3; Fil. 4:6) Vamwe ohava ningi eenghendabala da mana mo opo va kufe oukwafelikokolindjila omwedi umwe ile eemwedi dihapu momudo. Oyo oi li onghedi iwa okutamununa mo oukalele wavo. Vahapu ohava ningi ovakokolindjila vondjikilile omolwehafo olo va mona moukwafelikokolindjila. — Oil. 20:35.
3. Ngeenge owa li nale omukokolindjila, oshike osho tashi dulika wa hala okuninga po paife?
3 Mbela ito dulu okushuna moukokolindjila?: Ngeenge owa li nale omukokolindjila, nopehe na omalimbililo, oho dimbuluka nehafo efimbo olo. Mbela owa diladila ngoo nale pamwe neilikano opo u dule okushuna moukokolindjila? Eenghalo odo da li de ku ningifa u efe po oukokolindjila otashi dulika itadi ku imbi vali u kokole ondjila. Otashi dulika paife to dulu okuninga vali omukokolindjila. — 1 Joh. 5:14, 15.
4. Omhito ye likalekelwa ilipi ye tu yeulukila atusheni?
4 Oilonga yeteyo otai longwa paife noi li pokupwa mafiku. (Joh. 4:35, 36) Atusheni natu konakone eenghalo detu odo tu li mudo paife nokutala ngeenge pamwe ohatu dulu okuninga po omalunduluko momalipyakidilo etu akeshe efiku opo tu dule okutamununa mo oukalele wetu. Ngeenge otwa mono shili kutya itatu dulu okutamununa mo oukalele wetu, mbela itatu dulu okuninga eenghendabala monghedi yonhumba opo tu kale hatu pondola moukalele? (Mark. 12:41-44) Kau fi tuu oufembanghenda kwaaveshe ovo eenghalo davo tadi va pitike va longifwe kuJehova moshilonga osho she likalekelwa! — Eps. 110:3.