“Kaleni mwa xwama momhepo”
1. Otu na okukala nomaukwatya elipi ngeenge hatu udifa?
1 Kape na nande ombinga imwe yoilonga yetu yopaKriste i na okulongwa noundede. Ponhele yaasho, otwa ladipikwa taku ti: “Kaleni mwa xwama momhepo; kaleleni Omwene.” (Rom. 12:11) Ashike ope na oinima ihapu oyo tai dulu okuninipika ouladi wetu woukalele. Ndele mbela ongahelipi hatu dulu ‘okuxwameka’ ouladi wetu nokukala nondjungu yoilonga yOuhamba? — 2 Tim. 1:6, 7.
2. Ekonakonombibeli lopaumwene ola pambafana ngahelipi nouladi woukalele?
2 Ekonakonombibeli lopaumwene: Omuudifi wOuhamba oo ha pondola oyoo e hole omhango yaKalunga nokwe linyengifwa neenghono keeshili domomhango oyo. (Eps. 119:97) Ngeenge otwe lihongo eeshili donhumba mOmbibeli pefimbo lekonakono letu lopaumwene, otashi ke linyengifa omitima detu notashi ka xwameka ouladi wetu. Ohole yetu yokuhola Omuyandji weeshili odo nosho yo okukala twa hala okuudifila vamwe onghundana iwa otaku ke tu linyengifa tu tange Kalunga notu lombwele vamwe kombinga yedina laye. (Heb. 13:15) Osha yela kutya ngeenge ohatu udifa onghundana iwa nomutima aushe otashi ulike kutya otwa lenga neenghono ongushu yayo.
3. Ongahelipi omhepo yaKalunga tai dulu oku tu kwafela moukalele wetu?
3 Ilikana Kalunga e ku pe omhepo yaye: Itatu dulu okupondola moukalele keenghono detu vene. Ndele omhepo yaKalunga ohai tu kwafele tu kale tu na ouladi washili. (1 Pet. 4:11) Ngeenge otwa ehene popepi elela nOdjo ‘yeenghono dinene,’ ohatu ka pamekwa pamhepo tu yandje oundombwedi nouladi. (Jes. 40:26, 29-31) Eshi omuyapostoli Paulus a li a hangwa komaupyakadi pefimbo loukalele waye, okwa li ‘a pewa ekwafo kuKalunga.’ (Oil. 26:21, 22) Omhepo iyapuki yaJehova otai dulu oku tu nghonopaleka tu kale twa xwama moukalele wetu, onghee hano, natu ilikaneni tu i pewe. — Luk. 11:9-13.
4. Ouladi otau dulu okweetifa oidjemo iwa ilipi, ndele oshike tu na okukala twa lungamena?
4 Ouladi wetu wa xwama wokuudifa Ouhamba luhapu ohau xwameke yo ouladi wOvakriste vakwetu. (2 Kor. 9:2) Ovanhu moitukulwa ohave linyenge nawa unene tuu ngeenge ohatu udifa etumwalaka nondjungu nohatu popi tu na oushili. Ndele nande otu na ouladi, otwa pumbwa alushe okukala tu na elungi nosho yo omwenyo muwa. (Tit. 3:2) Natu kale hatu fimaneke ovaneumbo efimbo keshe nokukala twa fimaneka emanguluko lavo lokuninga omatokolo.
5. Ekumaido lopamishangwa lilipi tu na okukendabala tu tule moilonga?
5 Tu li ovaudifi wOuhamba, natu kaleni alushe twa “xwama momhepo.” Natu pepalekeni ouladi wetu okupitila mekonakonombibeli lopaumwene nomokwiilikana kuJehova twa mana mo, oo ta dulu oku tu pa eenghono domhepo yaye iyapuki. Kungaho, ohatu ka dula okuwanifa po oukalele wetu ‘momhepo iyapuki nomeyelelo la pama.’ — 1 Tes. 1:5.