Udifa neendelelo!
1. Otu na okuyandja elitulemo kekumaido laPaulus lilipi kunena?
1 Ombibeli oya ti: “Udifa ondjovo, shi ninga neendelelo.” (2 Tim. 4:2, yelekanifa no-NW.) Omolwashike ekumaido laPaulus olo la fimanenena kufye kunena? Eendjovo odo otadi dulu ngahelipi okukuma onghalamwenyo yetu nosho yo yavamwe?
2. Omolwashike hatu kongo noudiinini ovanhu ovo inava uda natango onghundana iwa?
2 Okuudifa otaku xupifa eemwenyo: Ovanhu omamiliyona mounyuni inava uda natango onghundana iwa oyo tai dulu oku va kwafela va ka xupifwe. (Rom. 10:13-15; 1 Tim. 4:16) Ovanamitimadiwa vahapu otava hangwa moitukulwa oyo hai longwa luhapu. Ngeenge otwa kala hatu ka udifa momafiku a yoolokafana ile pomafimbo a yoolokafana momukokomoko wefiku, oshi na oupu tu udifile ovanhu ve lili noku lili. Okukonga ovanhu noudiinini kwa tya ngaho otaku ke tu kwafela tu kale tu na eliudo la koshoka notuha kale tu na etimba lohonde. — Oil. 20:26.
3. Ongahelipi hatu dulu okulongifa nawa efimbo ngeenge tu li moukalele?
3 Ovakriste vomefelemudo lotete ova li va ‘yadifa Jerusalem ashishe nehongo lavo,’ nonande ova li va shakeneka omapataneko manene. (Oil. 5:28) Mbela nafye otwa tokola toko ‘okuyandja oundombwedi nawanawa’? (Oil. 10:42, NW) Mbela ohatu longifa ngoo nawa efimbo ngeenge tu li moukalele? Ngeenge twa teelela vamwe tava ningi elishuneko lonhumba, mbela ohatu kendabala ngoo okupopya novanhu ovo tava piti pufye?
4. Okuudifa neendelelo otashi tu kwafele ngahelipi tu kale oupafi?
4 Okuudifa otaku tu kaleke oupafi efimbo alishe: Otu na okukala oupafi molwaashi exulilo longhalelo ei yoinima oli li popepi. (1 Tes. 5:1-6) Ngeenge otwa kala hatu popi pandjikilile kombinga yeteelelo letu lOuhamba, ohatu henuka okukala twa wililwa po konghalelo ei yoinima. (Luk. 21:34-36) Kakele kaasho, ngeenge otwa kaleke efiku laJehova “momadiladilo,” otashi ke tu linyengifa tu kale hatu kufa ombinga pauyadi moilonga yokuudifa oyo tai xupifa eemwenyo. — 2 Pet. 3:11, 12, NW.
5. Okukala twa fimaneka omwenyo ohaku tu linyengifa tu ninge shike moukalele?
5 Ngeenge otwa kala hatu udifa neendelelo, ohatu ulike kutya otu na etaleko la fa laJehova li na sha nomwenyo, molwaashi Ombibeli oya ti: “Ina hala pa kane nande umwe, ndelenee aveshe ve lialulukile melidilululo.” (2 Pet. 3:9; Hes. 33:11) Natu kaleni twa tokola toko okuudifila ovanhu vahapu moshitukulwa shetu ngaashi tashi dulika opo tu tange Jehova. — Eps. 109:30.