Ulika olupandu li na sha noshali inenenene oyo Kalunga a yandja
1. Oshike unene hashi tu linyengifa tu pandule Jehova?
1 Ekulilo olo la yandjwa kOmona waJehova omuholike olo “oshipewa shiwa” shinenenene shomoipewa oyo Jehova a yandja. (Jak. 1:17) Ekulilo ole shi ningifa tashi shiiva opo tu dule okumona omanangeko noupuna mahapu, mwa kwatelwa okudiminwa po omatimba. (Ef. 1:7) Otu na alushe olupandu omolwoinima ya tya ngaho. Eemwedi odo da tetekela nosho yo odo da landula Edimbuluko omo unene hatu dilonga kombinga yoshali i na ondilo ya tya ngaho.
2. Ongahelipi hatu dulu okukwafela omaukwaneumbo etu nosho yo fye vene tu kale tu na olupandu li na sha nekulilo?
2 Kwafela oukwaneumbo woye u kale u na olupandu: Omolwashike itamu kundafana ouyelele wonhumba u na sha nekulilo pefimbo lEkonakono lOukwaneumbo weni moule woivike oyo ya tetekela efiku lEdimbuluko, 30 Marsa, opo u kwafele oukwaneumbo woye u kale u na olupandu omolwekulilo? Kundafaneni yo elesho lOmbibeli le likalekelwa li na sha nEdimbuluko efiku keshe pamwe noukwaneumbo woye. Dilonga pauhandimwe kombinga yanghee wa mona ouwa omolwekulilo nosho yo nghee la kuma etaleko loye li na sha naJehova, naave mwene, novanhu vakweni nosho yo nonakwiiwa. Otamu ka mona yo ouwa ngeenge omwa kala tamu liendifa po pomaimbilo mape avali oo taa ka longifwa pEdimbuluko, eimbilo eti-8 nosho yo 109. — Eps. 77:12.
3. Ongahelipi hatu dulu okuulika olupandu letu li na sha nekulilo?
3 Nghee hatu dulu okuulika olupandu: Olupandu li na sha nekulilo ohali tu linyengifa tu lombwele vamwe kombinga yaJehova nosho yo ohole yaye inene eshi a tuma Omona waye. (Eps. 145:2-7) MuMarsa, Aprili naMei, omaukwaneumbo amwe ohaa ulike olupandu lao mokuninga omalongekido opo oilyo imwe moukwaneumbo i kufe oukwafelikokolindjila. Ngeenge pamwe osho itashi shiiva, omolwashike itamu ‘longifa nawa efimbo’ mu tamunune mo oukalele weni? (Ef. 5:16) Ningeni omalongekido mu li oukwaneumbo opo mu ka kufe ombinga pauyadi mEfiku lOifo le likalekelwa mOlomakaya, 17 Aprili. Olupandu otali ke tu linyengifa yo tu kwafele vamwe ve uye va ongale pamwe nafye pEdimbuluko. (Eh. 22:17) Hovela okuninga elandulafano li na sha naavo wa hala okuninga omalishuneko kuvo, ovakonakonimbibeli, ovapambele, ovanailonga vakweni nosho yo ovashiinda shoye ndele to ningi ngaashi to dulu u va shive nokafo ke likalekelwa kokushiva ovanhu kEdimbuluko.
4. Omeenghedi dilipi hatu dulu okulongifa efimbo pandunge meemwedi odo da tetekela nosho yo odo da landula Edimbuluko?
4 Eemwedi odo da tetekela nosho yo odo da landula Edimbuluko otadi tu pe omhito yokuulikila Jehova kutya otu na olupandu li fike peni shi na sha noshali oyo a pa ovanhu. Natu longifeni omhito ya tya ngaho tu ulike kutya otu na olupandu linene li na sha nekulilo nosho yo ‘oupuna waKristus aushe uhe fi okukonakonwa.’ — Ef. 3:8.