Oto ka longifa ngoo omhito oyo u na?
Edimbuluko olo twa taalela otali ke tu kwafela tu ulike olupandu
1. Edimbuluko otali ke tu pa omhito ye likalekelwa ilipi?
1 Edimbuluko olo tali ka kala ko mo 14 Aprili otali ke tu pa omhito ye likalekelwa yokukulika nokuulika olupandu letu lokupandula ouwa waJehova. Ehokololo olo li li muLukas 17:11-18 otali ulike nghee Jehova naJesus va tala ko olupandu. Shinyikifa oluhodi, umwe ashike womovanashilundu 10 ovo va li va velulwa a li a longifa omhito oyo a li e na yokuulika olupandu. Monakwiiwa, oshali yekuliloyambo otai ke shi ningifa tashi shiiva opo ovanhu va veluke filufilu komikifi adishe, nokungaho otava ka dula okukala nomwenyo fiyo alushe. Nopehe na omalimbililo, ohatu ka pandula Jehova efiku keshe omolwomanangeko noupuna a tya ngaho. Ndele ongahelipi hatu dulu okuulika olupandu letu moivike oyo twa taalela?
2. Ongahelipi hatu dulu okuulika olupandu li na sha nekulilo?
2 Kulika olupandu: Olupandu ohali tamekele momadiladilo. Elesho lOmbibeli le likalekelwa li na sha nEdimbuluko olo tali ke tu kwafela tu kulike olupandu letu li na sha nekulilo, otali hangwa moinima ihapu, ngaashi moshiwedelwako B12 osho shi li mOmbibeli ipe yo-New World Translation, mokalindeli nomokambo Konakona Omishangwa keshe efiku. Otali ka tulwa yo ko-jw.org ofimbo Edimbuluko inali fika. Omolwashike itamu kundafana ouyelele oo mu li oukwaneumbo? Okuninga ngaho, otaku ka hapupalifa olupandu letu li na sha nekulilo. Oshidjemo, osho otashi ka kuma elihumbato letu. — 2 Kor. 5:14, 15; 1 Joh. 4:11.
3. Omeenghedi dilipi hatu dulu okuulika olupandu letu pefimbo lEdimbuluko?
3 Ulika olupandu: Olupandu ohali ulikwa okupitila moilonga. (Kol. 3:15) Omunashilundu oo a li e na olupandu okwa li a ninga eenghendabala a ka konge Jesus noku mu pandula. Osha yela kutya okwa li yo a lombwela vamwe nexwamo kombinga yokuvelulwa pashikumwifilonga. (Luk. 6:45) Mbela olupandu letu li na sha nekulilo otali ke tu linyengifa ngoo tu kufe ombinga nouladi moshikonga shokushiva ovanhu kEdimbuluko? Okukufa oukwafelikokolindjila ile okulonga efimbo lihapu moukalele pefimbo lEdimbuluko oku li onghedi imwe vali iwa omo hatu dulu okuulika olupandu. Konguloshi fiku lEdimbuluko, omitima di na olupandu otadi ke tu linyengifa tu hambelele ovaenda nokulilongekida okunyamukula omapulo avo.
4. Ongahelipi hatu dulu okudana Edimbuluko eli nopehe na oku ke lipa oushima?
4 Mbela Edimbuluko eli olo tali ka kala letu laxuuninwa? (1 Kor. 11:26) Katu shi shii. Ashike otu shii kutya ngeenge ola piti po, omhito ye likalekelwa yokuulika olupandu oya pita po ngaho. Mbela oto ke i longifa ngoo? Eendjovo detu dolupandu nomadilongo omitima detu nai hafife Jehova, oo a yandja nehalo liwa ekulilo. — Eps. 19:15.