Oyoongalele yoitukulwa ohai kala i li omhito yokulongela Jehova nehafo

¹ Josef, Maria, ounona vavo nosho yo vamwe okwa li hava i kuJerusalem opo va ka dane oivilo yokomudo. Peemhito da tya ngaho, oukwaneumbo waJosef nosho yo ovalongelikalunga vakwao vamwe ova li hava dimbwa oisho yavo yakeshe efiku ndele tava yandje elitulemo koinima yopamhepo oyo ya li ya fimanenena mokukalamwenyo kwavo. Oivilo oyo oya li hai va pe omhito opo va dilonge nokupopya kombinga youwa waJehova nokukundafana eemhango daye. Oyoongalele yetu yoitukulwa oyo tai uya nayo otai ke tu pa omhito tu longele Jehova nehafo.

² Otwa pumbwa okulilongekida kuyele: Oukwaneumbo wooJesus okwa li hau ende eekilometa 200 lwaapo. Nonande katu shii kutya Jesus okwa li e na ovamwaina vangapi, ohatu dulu okuuda ko kutya Josef naMaria okwa li hava ningi omalongekido neenghendabala di fike peni. Owa ninga ngoo omalongekido oo a pumbiwa opo u dule oku ka kala poshoongalele shoshitukulwa oule womafiku aeshe atatu? Otashi dulika wa pumbwa okupula efudo koilonga ile okupopya nomuyandji woilonga ile okulombwela omuhongifikola kutya ounona voye itava ka ya kofikola oule womafiku oo. Mbela owa konga ngoo onhele oko to ka kala? Mbela ito dulu okuninga omaliyambo u kwafele umwe meongalo leni oo e na eemhumbwe de likalekelwa opo naye a dule oku ka kala poshoongalele osho? — 1 Joh. 3:17, 18.

³ Eendafano tali tungu: Oivilo yOvajuda kaya li tuu hai va pe omhito va dule okweendafana nokutungafana novalongelikalunga vakwao! Nopehe na omalimbililo, oukwaneumbo wooJesus okwa li hau teelele nodjuulifi oku ka monafana vali nookaume kavo ovo ve liefa nale navo. Okwa li yo hau kala wa teelela nodjuulufi okupanga oukaume nOvajuda nosho yo novanhu ovo ve lidilululifwa ndele tava ningi veitavelo lOshijuda ovo tava ka kala poivilo ile ovo tava ende pamwe navo molweendo lokuya nokwaaluka kuJerusalem.

⁴ Etomheno limwe kutya omolwashike omupiya omudiinini nomunaendunge ha ningi omalongekido opo tu ongale poyoongalele yoitukulwa nokupewa oipopiwa ponhele yokunyanyangida ouyelele oo, olo okutwaafana omukumo. (Heb. 10:24, 25) Onghee hano, ninga omalongekido u fike ponhele yoshoongalele kuyele nokuhafela eendafano navamwe fimbo omunashipundi womutumba ina ninga etwalemo li na sha nomusika oyo hai tu dimbulukifa kutya efimbo lokukala omutumba ola fika. Ponhele yokufiya po onhele yoshoongalele tu ka lande oikulya pefimbo lomusha, ohatu ladipikwa tu etelele omusha wetu u li paunafangwa nokukala ponhele yoshoongalele opo tu dule okupopya novanhu ovo inatu shakeneka nale nosho yo ovo ve li popepi nafye. Oumwainafana wetu wopaKriste wa hangana ou li oshali ya dja kuJehova nokatu na oku u kwata okahetengi nandenande. — Mika 2:12.

⁵ Oshoongalele ohashi tu pe omhito yokulihonga: Jesus okwa kala ha longifa nawa omhito yoivilo okudja kounona waye opo e lihonge kombinga yaXe womeulu. (Luk. 2:41-49) Mbela oshike tashi dulu oku ku kwafela nosho yo oukwaneumbo woye mu dule oku ka mona ouwa pauyadi moitukulwa yoshoongalele? Pefimbo lomutumba, kala omutumba wa ngungumana nokuhenuka okupopya inashi pumbiwa. Shilipaleka kutya ongodi yoye yopeke ile oikwaelektronika ikwao itai piyaaneke vamwe. Kala wa tala komupopi nokuninga omadidilikoshango. Oukwaneumbo weni nau kale omutumba pamwe opo mu dule okushilipaleka kutya ounona navo otava pwilikine. Kundafaneni pamwe konguloshi kombinga yoitwa yonhumba oyo mwa hafela.

⁶ Okudjala nokuliwapeka: Ovashingifi ovaendi vokoilongo imwe ova li tava dulu okudidilika noupu oukwaneumbo wooJesus nosho yo ovalongelikalunga vakwao Ovajuda ngeenge va li tava i ile tava aluka koivilo, molwaashi oikutu yavo oya li hai hondjelwa eenyemba da endjelela keemwooyo dayo nohai hondjelwa eengodi dimbulau pombada yeenyemba. (Num. 15:37-41) Nonande Ovakriste ihava djala omudjalo wonhumba we likalekelwa, otwa shiivika kutya ohatu djala omidjalo da wapala nohatu liwapeke nawa. Otu na okufila oshisho eholokepo letu kutya nee ongeenge tu li molweendo hatu i koshoongalele ile ohatu aluka ko nofimbo tu li moshilando omo tamu ningilwa oshoongalele. Nokuli nongeenge otwa shendje omidjalo detu eshi twa dimbuka, eholokepo letu oli na okukala li shii okufimanekwa notu na okudjala oukalata vetu voshoongalele. Kungaho, ohatu ka kala twa yooloka ko kovanhu ovo vehe fi Eendombwedi nohatu ka yandja efano liwa kovatali.

⁷ Opa pumbwa ovaliyambi: Poshoongalele opa pumbwa ovanailonga vahapu opo oinima i ende nawa. Mbela ito dulu okuliyamba u ka kwafela poshoongalele? (Eps. 110:3) Oilonga oyo hai longwa poshoongalele oi li oshitukulwa shoilonga yetu iyapuki nohai yandje oundombwedi muwa. Omukulunhu wonhele imwe oyo kwa li ya ningilwa oshoongalele okwa li a tunhukwa omolwovaliyambi ovo va li va wapaleka etungo olo, ndele ta ti: “Onda hala oku mu pandula neenghono omolwoshiningwanima shikumwifi osho nda mona. Ohandi udu ngoo alushe taku tiwa kutya Eendombwedi daJehova ovanhu ve likalekelwa nohadi popilwa alushe mouwa moshikondo shetu, molwaashi ohadi fiye alushe eenhele da yela shi dulife nokuli pwaashi da li fimbo inadi di longifa. Nye nosho yo ehangano leni omwa wapeka onhele ei yaaveshe nomwa longa mu li ongudu inene ya hafa oyo ya li ye tu hafifa neenghono inashi monika nande onale.”

⁸ Oshoongalele ohashi tu pe eemhito dokuyandja oundombwedi: Ovanhu vomoshilando omo tamu ningilwa oshoongalele otava ka didilika onghedi yetu yokudjala nokuliwapeka, oukalata vetu voshoongalele, naasho otashi ke tu pa omhito yoku va lombwela kombinga yoshoongalele. Pomhito imwe konima yoshoongalele shimwe, okamati kamwe komido 4 oka li ka ulikila omuyakuli womorestaulanda oshileshomwa osho opo sha piti. Osho osha li sha pa ovadali vokamati oko omhito opo va shive omukainhu oo koshoongalele.

⁹ Ovajuda ovo va li va hala okulihonga shihapu kombinga yaJehova ova li hava kala va teelela nodjuulufi oivilo yonale. (Deut. 16:15) Oukwaneumbo wooJesus owa li wa hala okuninga omaliyambo keshe opo u ka kale poivilo oyo nokumona ouwa pauyadi. Otu na olupandu la faafana li na sha noyoongalele yetu yoitukulwa, hatu i tale ko i li oshali ya dja kuTate yetu womeulu. (Jak. 1:17) Paife olo efimbo lokulilongekidila oshoongalele osho shokomudo noku ka longela Jehova nehafo.

[Omapulo ekonakono]

1. Oivilo oyo kwa li hai danwa kOvaisrael oya faafana ngahelipi noyoongalele yetu yoitukulwa yokunena?

2. Oshike tu na okuninga po opo tu lilongekidile oshoongalele shoshitukulwa osho shi li poduka?

3. Ongahelipi oivilo yOvaisrael ya li hai va pe omhito yeendafano tali tungu?

4. Ongahelipi hatu dulu okuulika kutya itatu kwata okahetengi oumwainafana wetu wopaKriste wa hangana?

5. Oshike tashi ke tu kwafela tu dule okumona ouwa pauyadi moitukulwa yoshoongalele?

6. Oshike tu na okukaleka momadiladilo ngeenge tashi uya pokudjala nokuliwapeka?

7. Omolwashike tu na okudiladila shi na sha noku ka longa oilonga yeliyambo poshoongalele?

8. Otu na eemhito dilipi dokuyandja oundombwedi moshilando omo tamu ka ningilwa oshoongalele?

9. Ongahelipi hatu dulu okuulika olupandu li na sha nomafiloshisho opamhepo aJehova ngaashi oukwaneumbo wooJesus?

[Oshimhungu pepandja 6]

Omadimbulukifo e na sha noshoongalele shoshitukulwa

◼ Efimbo: Oshoongalele shoshitukulwa otashi ka hovela po 9:00 wongula omafiku aeshe atatu. Ngeenge okwa ningwa eshiivifo kutya omusika oyo hai tetekele omutumba woshoongalele otai ka hovela, atusheni otu na okukala omutumba opo oshoongalele shi hovele monghedi i shii okufimanekwa. MEtitano, oshoongalele otashi ka dimbuka po 4:15 komatango, mOlomakaya opo 4:30 komatango, nomOsoondaxa opo 3:20 komatango.

◼ Eenhele dokupaakinga: Poyoongalele aishe yoitukulwa, ovanhu otava ka paakinga eehauto oshali, notaku ka paakingwa palandulafano. Ovanhu otava ladipikwa va longife oshihauto shimwe apa tashi shiiva molwaashi eenhele dokupaakinga ohadi kala alushe dinini.

◼ Eenhele dokunangala: Ovaudifi ovo va hala okuninga eindilo leenhele dokunangala ove na okuyadeka ofoloma yedina Special Needs Room Request (CO-5). Okomitiye yOilonga yEongalo oi na okushilipaleka ngeenge omuudifi okwa wana ngoo okupewa onhele yokukala, tai landula omifindalandu odo di li mofoloma nosho yo odo di li monhumwafo yo 15 Juli 2009, oyo ya li ya shangelwa ovakulunhuongalo aveshe. Ovaudifi ovo tava dulu okukongelwa eenhele ovovo ashike ve na edina liwa meongalo nosho yo ovo ve na ounona ve na elihumbato liwa.

◼ Okuumbulila vamwe oipundi: Oipundi otai dulu ashike okuumbulilwa ovo to ende pamwe navo mohauto ile ovo hamu di navo meumbo limwe nosho yo ovo to konakona navo Ombibeli. — 1 Kor. 13:5.

◼ Omusha: Oto indilwa u etelele omusha woye opo uha fiye po onhele yoshoongalele u ka lande oikulya pefimbo lomusha. Oto dulu okulongifa okandjato kanini kokutalaleka oikulya, oko taka dulu okutulwa koshi yoshipundi. Eendjato dinene domaukwaneumbo dokutalaleka oikulya odi na okutulwa opo to ulikilwa kovayakuli. Oikwatelwa yoikwamakende nosho yo oikunwa yoalkoholi inai pitikilwa mo monhele yoshoongalele.

◼ Omayambidido: Ohatu dulu okuulika olupandu letu omolwomalongekido oshoongalele mokuyandja omayambidido nehalo liwa e na sha noilonga yomounyuni aushe kOlupale lOuhamba letu ile poshoongalele. Ngeenge owa hala okuyambidida notyeke, shilipaleka nOkomitiye yOshoongalele kutya openi to dulu oku i tuma.

◼ Oiponga nosho yo ekwafo lopaulumomumbwe: Ngeenge opa holoka onghalo oyo tai pula omunhu a pewe ouhaku meendelelo poshoongalele, ninga ekwatafano nomuyakuli oo e li popepi naave, oo ta ka shiivifila diva oshikondo shEkwafo lOtete opo ovo tava longo moshikondo osho va konakone kutya onghalo oyo oya kwata moiti shi fike peni nokuyandja ekwafo.

◼ Eenghaku: Omudo keshe poshoongalele ohapa holoka oiponga ihapu oyo hai etifwa keenghaku. Oshiwa okulanda eenghaku tadi wapalele, odo omunhu to wana mo nawa, odo tadi ke ku kwafela uhe limonife oshiponga ngeenge to ende keetalapa nosho yo peenhele di lili noku lili.

◼ Okukwata omawi: Oilongifo yokukwata omawi kai na okutulwa keepulaka dolusheno ponhele yoshoongalele ile komambako, nokai na okulongifwa monghedi oyo tai piyaaneke vamwe.

◼ Outemba vokulonga ounona okweenda: Outemba vokulonga ounona okweenda kave na okweetwa monhele yoshoongalele. Ashike outemba vounona vokukala omutumba va mangelwa mo otava dulu okulongifwa nokukala polwaamba lovadali.

◼ Omaadi okulishasha: Oyoongalele yoshitukulwa ihapu ohai ningilwa meenhele dihe na omhepo ya wana omo hamu longifwa ashike omashina okupepela omhepo. Onghee hano, otashi ka kala shiwa okuhalongifa omaadi okulishasha oo e na edimba li na eenghono, olo tali dulu okuninga nai ovo ve na oupyakadi wokufuda ile omaupyakadi amwe. — 1 Kor. 10:24.

◼ Ofoloma yokulandula ovanhu ovo ve na ohokwe: Ofoloma yedina Please Follow Up (S-43) otai dulu okulongifwa opo ku yandjwe ouyelele u na sha novanhu ovo va ulika ohokwe eshi va pewa oundombwedi wohangelela pefimbo loshoongalele. Ovaudifi ove na okweetelela ofoloma imwe ile mbali koshoongalele. Eefoloma odo da yadifwa otadi dulu okuyandjwa konduda yomambo ile kuhamushanga weongalo leni ngeenge mwa shuna komaongalo. — Tala okafo Oukalele Wetu wOuhamba kaNovemba 2009, epandja 4.

◼ Eerestoulanda: Natu fimanekifeni edina laJehova okupitila melihumbato letu liwa ngeenge twa ya keerestoulanda. Moilongo ihapu, oshi li onghedindjikilile okuyandja olupandu lokamaliwa keepresenda 10 fiyo 15, she likolelela keyakulo.

◼ Oilonga yeliyambo: Okukala poshoongalele otaku ke tu etela ehafo linene, unene tuu ngeenge otwa kufa ombinga moilonga yeliyambo. (Oil. 20:35) Keshe oo a hala okukufa ombinga moilonga yeliyambo poshoongalele oku na okuya kOshikondo shOilonga yEliyambo. Ovanyasha ovo ve li meni lomido 16 navo otava dulu okukwafela poshoongalele tava longo mepashukilo lovadali ile lovatekuli vavo ile lovakulunhu vamwe ngeenge ova pewa epitikilo kuumwe womovadali.

◼ Omaimbilo: Omaongalo otaa dulu okulideula komesho yefimbo omaimbilo oo taa ka imbwa poshoongalele. Omaimbilo oo taa ka imbwa mEtitano: 118, 18, 113, 91, 88 nosho yo 75. Omaimbilo oo taa ka imbwa mOlomakaya: 92, 85, 60, 65, 69 nosho yo 48. Nomaimbilo oo taa ka imbwa mOsoondaxa: 51, 63, 106, 16, 49 nosho yo 2.