Oyoongalele yetu yoshitukulwa oi li omhito yokuyandja oundombwedi wa kola kombinga yoshili
1. Oivilo yokomudo oya li hai pe Ovaisrael omhito yokukundafana nokudilonga kombinga yeeshili dopamhepo da fimana dilipi?
1 Ovaisrael vonale ova li hava ongala lutatu momudo omolwoivilo yokomudo. Nonande ovalumenhu ovo aveke va li va teelelwa va kale poivilo oyo, luhapu omaukwaneumbo avo aeshe okwa li haa i kuJerusalem opo a ka tyapule oivilo oyo yehafo. (Deut. 16:15, 16) Oivilo ya tya ngaho ohai kala omhito yokukundafana nokudilonga kombinga yeeshili dopamhepo da fimana. Eeshili dimwe domwaado odilipi? Imwe oyoyo kutya Jehova Omuyandji nomufilishisho Omunahole. (Deut. 15:4, 5) Ikwao vali oyoyo kutya ohatu dulu okulineekela ewiliko neameno laye. (Deut. 32:9, 10) Ovaisrael ova li yo tava dulu okudilonga koushili oo kutya ve li oshiwana shaJehova ove na okuulika ouyuki waye monghalamwenyo yavo. (Deut. 7:6, 11) Sha faafana, nafye kunena ohatu mono ouwa moyoongalele yoshitukulwa yokomudo.
2. Oshoongalele shoshitukulwa otashi ke tu kwafela ngahelipi tu ude ko oshili yOmbibeli?
2 Oshoongalele ohashi tu kwafela tu ude ko oshili yOmbibeli: Poshoongalele shoshitukulwa ohatu hafele oipopiwa, oinyandwa, omauliko nosho yo omapulapulo, naaishe oyo ohai tu kwafele tu ude ko nawa eeshili dOmbibeli noku di tula moilonga. (Joh. 17:17) Efimbo lihapu ola longifwa nale mokulongekida oshoongalele osho twa teelela. Ehangano laJehova otali unganeke oshoongalele osho sha nuninwa kondadalunde okuwanifa po eemhumbwe dovanhu kunena mounyuni aushe. (Mat. 24:45-47) Mbela ino halelela okuka mona nokuuda osho tashi ka ningwa po?
3. Oshike tu na okuninga opo tu ka mone ouwa poshoongalele?
3 Ohatu ka mona ouwa pauyadi ngeenge otwa kala po nokupwilikina nelitulemo omafiku aeshe atatu. Ngeenge ino popya natango nomuyandji woye woilonga shi na sha nokukufa efudo, shi ninga paife. Kala to kofa sha wana momafiku oo atatu opo u ka dule okukala oupafi pefimbo loshoongalele. Vahapu ova mona kutya ohashi va kwafele va yandje elitulemo ngeenge ova kala va tala komupopi nokuninga omadidilikoshango e li pauxupi. Ino efa u piyaanekwe kongodi yopeke ile u piyaaneke vamwe. Ino kala to popi, to tumu omatumwalaka, to li ile to nu pefimbo loprograma ngeenge kape na etomheno lopaunamiti ile onghalo yomhepo tai shi pula.
4. Ongahelipi ovadali tava dulu okukwafela ounona vavo va mone ouwa poshoongalele?
4 Momido dEshabata, eshi omaukwaneumbo Ovaisrael a li haa ongala opo a pwilikine eshi Omhango tai leshwa pefimbo lOivilo yOmatwali, omaukwaneumbo okwa li haa etelele ‘ounona’ vao “opo va shiive okuuda nokulongwa.” (Deut. 31:12) Itashi tu tuu omukumo okumona omaukwaneumbo e li omutumba pamwe novana vao poshoongalele ve li oupafi notava pwilikine nawa! Otashi ke mu etela ouwa ngeenge omwa kala hamu kundafana oitwa oyo mwa hafela unene poshoongalele onguloshi keshe yomafiku oshoongalele. Ombibeli oya ti: ‘oulai owa kanyatela momutima womona omumati,’ onghee hano, ovadali otamu indilwa mu pashukile ounona veni, naavo ve na omido omulongo nasha, pefimbo lomusha nongeenge mu li meehotela vaha kale ‘vehe noutekuduliko’ ile tu tye ve li kuvo vene. — Omayel. 22:15; 29:15.
5. Elihumbato letu liwa ohali fimanekifa ngahelipi elongelokalunga letu ngeenge tu li meehotela?
5 Elihumbato letu liwa ohali fimanekifa elongelokalunga letu: Elihumbato letu liwa fimbo tu li modoolopa omo tamu ningilwa oshoongalele ohali ningifa vamwe va kale va fimaneka elongelokalunga letu. (Tit. 2:10) Ovalongi vomeehotela ohave tu didilike ngeenge hatu dulika keemhango nohatu ungaunga navo nawa nonelididimiko. (Kol. 4:6) Omudo wa ya, eshi ovamwatate vamwe vokoshitaimbelewa va li tava kundafana ofuto nomukulunhu umwe wohotela, omukulunhu oo okwa li e va lombwela a ti: “Otu hole okutambula ovanhu veni mohotela yetu molwaashi ove li nawa. Ove na yo eenghedi nonghenda nohava ungaunga alushe nefimaneko novanailonga nosho yo nonhele.”
6. Onghedi omo twa djala fimbo tu li modoolopa omo tamu ningilwa oshoongalele otai ka fimanekifa ngahelipi elongelokalunga letu?
6 Ngeenge twa djala oukalata vetu voshoongalele itatu shiivifa ashike kutya otu na oshoongalele nokudidilikwa mo kuvamwe ovo navo ve uya koshoongalele ndele ohatu yandje yo oundombwedi kwaavo ve tu wete. Ovanhu vomodoolopa omo tamu ningilwa oshoongalele otava ka didilika kutya ovo va djala oukalata voshoongalele ova djala palandulafano nonoshishohoni, ndele hamuxwanaxwanena ile monghedi tai pendula omahalo omilele oyo i li mounyuni. (1 Tim. 2:9, 10) Onghee hano, otu na okufya oshisho opo tu djale nokuliwapeka nawa ofimbo tu li modoolopa omo tamu ningilwa oshoongalele, nongeenge hatu i keehotela. Okufika modoolopa omo tamu ningilwa oshoongalele twa djala okotswe ile okambidja itashi yandje efano liwa. Nonande oshoongalele otashi ningilwa pokapale, omidjalo detu odi na okukala di shii okufimanekwa. Ngeenge otwa hala okudjala oikutu imwe konima eshi oshoongalele sha dimbuka nokuya korestoulanda, otu na okudimbuluka kutya natango otu li ovaenda ovo ve uya koshoongalele notu na okudjala monghedi i shii okufimanekwa.
7. Omonghedi imwe ilipi hatu dulu okuhafela oukumwe wetu wopaKriste pefimbo loshoongalele shoshitukulwa?
7 Ovaisrael ova li hava hafele eendafano tali tungu novalongelikalunga vakwao ovo va dja koitukulwa imwe mounyuni pefimbo loivilo oyo ya li hai danwa pomafimbo omudo, naasho osha li hashi xumifa komesho oukumwe. (Oil. 2:1, 5) Oumwainafana wetu wopaKriste we likalekelwa ohau limonikila poyoongalele yoshitukulwa. Oshoongalele osho shi li oshitukulwa shoparadisa yetu yopamhepo ohashi kumwifa ovatali. (Eps. 133:1) Ponhele yokufiya po onhele yoshoongalele tu ka lande oikulya pefimbo lomusha, otashi ka kala shiwa okweetelela omusha u li paunafangwa opo shi tu pe omhito tu endafane nokuhafela eenghundafana nOvakriste vakwetu.
8. Otu na omatomheno elipi okulonga poshoongalele ngeenge eenghalo detu otadi shi pitike?
8 Ovo tave tu tale luhapu ohava kala va kumwa eshi ve wete oyoongalele yetu ya unganekwa nawa palandulafano, unene tuu ngeenge va shiiva kutya oilonga aishe ohai longwa kovaliyambi. Mbela owa hala oku ka kwafela poshoongalele “nehalo liwa”? (Eps. 110:3) Luhapu ovadali ohave liyambe poshoongalele pamwe nounona vavo shi li onghedi yoku va deula va kale hava yakula vamwe. Ngeenge ou na eehoni, okulonga poshoongalele oko omhito iwa yokweendafana naavo tava ka kala po. Omumwameme umwe okwa ti: “Kakele koukwaneumbo wetu nookaume vanini, vahapu ovo va li po kanda li ndi va shii. Ndele eshi nda li nda kwafela mokuwapaleka, onda li nda shakeneka Ovakriste vakwetu vahapu. Onda li nde shi tyapula neenghono.” Okukwafela poshoongalele otashi ke tu kwafela tu mbwalangadje notu pange oukaume novanhu vahapu notaku tu etele ehafo. (2 Kor. 6:12, 13) Ngeenge ino liyamba nande onale u longe poshoongalele, pula ovakulunhuongalo kutya oshike u na okuninga opo u dule okukwafela.
9. Ohatu ka shiva ovanhu ngahelipi koshoongalele?
9 Shiva vamwe ve uye ve lihonge oshili: Eshi ku na oivike itatu oshoongalele shi hovele, ohatu ka ninga oshikonga shokushiva ovanhu koshoongalele, ngaashi twa kala nokuninga eedula da ya. Omaongalo oku na okuyandja okafo keshivo kovanhu vahapu moitukulwa yao ngaashi tashi dulika. (Tala oshimhungu, “Ongahelipi hatu dulu okuyandja okafo keshivo?”) Oufo vokushiva aveshe ovo va xupa po ove na okweetelelwa koshoongalele, opo va dule oku ka longifwa kwaavo tava ka kala poshoongalele mokuyandja oundombwedi wohangelela fimbo ve li modoolopa omo tamu ningilwa oshoongalele.
10. Popya oimoniwa oyo tai ulike kutya oikonga yetu yokomudo yokuyandja okafo keshivo ohai eta oidjemo iwa.
10 Mbela ovanhu ohave linyenge ngahelipi koikonga oyo hatu ningi omudo keshe? Omuyakuli poshoongalele shimwe okwa li a kwafela ovalihomboli vamwe va mone oipundi. Ova li ve mu lombwela kutya ova li va pewa eshivo nova “mona lihokwifa.” Ova li va shinga oshinano sheekilometa 320 opo ve uye koshoongalele. Pomhito imwe vali, omumwameme umwe oo a li ta yandje okafo eumbo neumbo okwa li a pa omulumenhu umwe oo a li ta monika a fa a hala okuuda nawa shi na sha noshoongalele. Omumwameme okwa li e mu yelifila osho sha shangwa mokafo. Omafiku manini konima yaasho, omumwameme okwa li a mona omulumenhu oo e li pamwe nakaume kaye poshoongalele va humbata shimwe shomoishangomwa oyo ya pita poshoongalele.
11. Omolwashike sha fimana okukala poyoongalele yetu yoshitukulwa yokomudo?
11 Oivilo oyo ya li hai danwa pomafimbo omudo oya li elongekido lopahole la dja kuJehova okukwafela Ovaisrael ve ‘mu longele mouyuki nomoshili.’ (Jos. 24:14) Sha faafana, okukala poshoongalele shoshitukulwa omudo keshe otaku ke tu kwafela tu ‘ende moshili’ noku li oshitukulwa sha fimanenena shelongelokalunga letu. (3 Joh. 3) Jehova na nangeke noupuna eenghendabala daaveshe ovo ve hole oshili va ka kale po poshoongalele nova mone ouwa pauyadi.
[Blurb on page 3]
Elihumbato letu liwa fimbo tu li modoolopa omo tamu ningilwa oshoongalele ohali fimanekifa elongelokalunga letu
[Blurb on page 4]
Eshi ku na oivike itatu oshoongalele shi hovele, ohatu ka ninga oshikonga shokushiva ovanhu koshoongalele
[Box on page 5]
Omadimbulukifo E Na Sha Noshoongalele Shoshitukulwa Sho 2012
◼ Efimbo: Oshoongalele shoshitukulwa otashi ka hovela po 9:00 wongula omafiku aeshe atatu. Omivelo ota di ka yeuluka po 7:00 yongula. Ngeenge okwa ningwa eshiivifo kutya omusika oyo hai tetekele omutumba woshoongalele otai ka hovela, atusheni otu na okukala omutumba opo oshoongalele shi hovele monghedi i shii okufimanekwa. Etitano nOlomakaya, oshoongalele otashi ka dimbuka po 4:35 komatango, nOsoondaxa opo 3:20 komatango.
◼ Eenhele dokupaakinga: Poyoongalele aishe yoitukulwa, ovanhu otava ka paakinga eehauto oshali, notaku ka paakingwa palandulafano. Ovanhu otava ladipikwa va longife oshihauto shimwe apa tashi shiiva molwaashi eenhele dokupaakinga ohadi kala alushe dinini.
◼ Eenhele dokunangala: Ovaudifi ovo va hala okuninga eindilo leenhele dokunangala ove na okuyadeka ofooloma yedina Special Needs Room Request (CO-5). Okomitiye yOilonga yEongalo oi na okushilipaleka ngeenge omuudifi okwa wana ngoo okupewa onhele yokukala, tai landula omifindalandu odo di li mofooloma nosho yo odo di li monhumwafo yo 14 Desemba 2010, oyo ya li ya shangelwa olutu lovakulunhuongalo. Ovaudifi ovo tava dulu okukongelwa eenhele ovovo ashike ve na edina liwa meongalo nosho yo ovo ve na ounona ve na elihumbato liwa.
◼ Okuumbulila vamwe oipundi: Oipundi otai dulu ashike okuumbulilwa ovo tamu ende navo mohauto ile hamu di navo meumbo limwe nosho yo ovo ho konakona navo Ombibeli. — 1 Kor. 13:5.
◼ Omusha: Oto indilwa u etelele omusha woye opo uha fiye po onhele yoshoongalele u ka lande oikulya pefimbo lomusha. Oto dulu okulongifa okandjato kanini kokutalaleka oikulya, oko taka dulu okutulwa koshi yoshipundi. Eendjato dinene domaukwaneumbo dokutalaleka oikulya odi na okutulwa opo to ulikilwa kovayakuli. Oikwatelwa yoikwamakende nosho yo oikunwa yoalkoholi inai pitikilwa mo monhele yoshoongalele.
◼ Omayambidido: Ohatu dulu okuulika olupandu letu omolwomalongekido oshoongalele mokuyandja omayambidido nehalo liwa e na sha noilonga yomounyuni aushe poshoongalele. Ngeenge owa hala okuyambidida notyeke, ou na okushanga ko “Christian Congregation of Jehovah’s Witnesses of Namibia.” Kakele koimaliwa keemuma neetyeke, poyoongalele imwe otapa dulu yo okuyandjwa omayambidido taku longifwa oukalata vo-debit ile credit.
◼ Oiponga nosho yo ekwafo lopaulumomhumbwe: Ngeenge opa holoka onghalo oyo tai pula omunhu a pewe ouhaku meendelelo poshoongalele, ninga ekwatafano nomuyakuli oo e li popepi naave, oo ta ka shiivifila diva oshikondo shEkwafo lOtete opo ovo tava longo moshikondo osho va konakone kutya onghalo oyo oya kwata moiti shi fike peni nokuyandja ekwafo.
◼ Omiti: Ngeenge oho nu omiti odo wa shangelwa kundokotola, alikana etelela da wana molwaashi itadi ka kala po opo hapa pewa ovanhu omakwafo opaulumomhumbwe. Eevenda odo da longifwa kwaavo ve na oudu woshuuka odi li oyeekelwashi ya nyika oshiponga nomolwaasho kadi na okutulwa momandoloma oimbodi ponhele yoshoongalele ile peehotela.
◼ Eenghaku: Omudo keshe poshoongalele ohapa holoka oiponga ihapu oyo hai etifwa keenghaku. Oshiwa okulanda eenghaku tadi wapalele, odo omunhu to wana mo nawa, odo tadi ke ku kwafela uhe limonife oshiponga ngeenge to ende keetalapa nosho yo peenhele di lili noku lili.
◼ Outemba vounona: Outemba vokulonga ounona okweenda kave na okweetwa monhele yoshoongalele. Ashike outemba vounona vokukala omutumba va mangelwa mo otava dulu okulongifwa nokukala polwaamba lovadali.
◼ Omaadi okulishasha: Oyoongalele yoshitukulwa ihapu ohai ningilwa meenhele dihe na omhepo ya wana omo hamu longifwa ashike omashina okupepela omhepo. Onghee hano, otashi ka kala shiwa okuhalongifa omaadi okulishasha oo e na edimba li na eenghono, olo tali dulu okuninga nai ovo ve na oupyakadi wokufuda ile omaupyakadi amwe. — 1 Kor. 10:24.
◼ Ofooloma yokulandula ovanhu ovo ve na ohokwe: Ofooloma yedina Please Follow Up (S-43) otai dulu okulongifwa opo ku yandjwe ouyelele u na sha novanhu ovo va ulika ohokwe eshi va pewa oundombwedi wohangelela pefimbo loshoongalele. Ovaudifi ove na okweetelela ofooloma imwe ile mbali koshoongalele. Eefoloma odo da yadifwa otadi dulu okuyandjwa konduda yomambo ile kuhamushanga weongalo leni ngeenge mwa shuna komaongalo. — Tala okafo Oukalele Wetu wOuhamba kaMei 2011, epandja 3.
◼ Eerestoulanda: Natu fimanekifeni edina laJehova okupitila melihumbato letu liwa ngeenge twa ya keerestoulanda. Oshi li onghedindjikilile okuyandja olupandu lokamaliwa keepresenda 10 fiyo 15.
◼ Oilonga yeliyambo: Keshe oo a hala okukufa ombinga moilonga yeliyambo poshoongalele oku na okuya kOshikondo shOilonga yEliyambo. Ovanyasha ovo ve li meni lomido 16 navo otava dulu okukwafela poshoongalele tava longo mepashukilo lovadali ile lovatekuli vavo ile lovakulunhu vamwe ngeenge ova pewa epitikilo kuumwe womovadali.
◼ Omaimbilo: Omaongalo otaa dulu okulideula komesho yefimbo omaimbilo oo taa ka imbwa poshoongalele. Omaimbilo Etitano: 52, 57, 113, 106, 116 nosho yo 98. Olomakaya: 96, 68, 58, 67, 95 nosho yo 89. Osoondaxa: 110, 61, 134, 73, 36 nosho yo 49.
[Box on page 4]
Ongahelipi hatu dulu okuyandja okafo keshivo?
Opo tu shive ovanhu vahapu moshitukulwa shetu, otwa pumbwa okuninga etwalemo li li pauxupi. Ohatu dulu okutya: “Mwa lele po! Ohatu kufa ombinga moshikonga shokushiva ovanhu koshoongalele osho tashi ka danwa mounyuni aushe. Okafo koye oko aka. Ouyelele muhapu u na sha noshoongalele osho owa yelifwa mokafo oko.” Popya nexwamo. Ngeenge to yandje okafo oko momaxuliloshivike, oto dulu yo okuyandja oifo opo tashi wapalele.