Osho twa pitifa komesho
1. Jesus okwa li a ulika ngahelipi kutya okwa pitifa komesho oukalele waye?
1 Jesus okwa li a pitifa komesho oukalele waye. Okwa li ha longo noudiinini, a li ha ende eekilometa omafele, ta tavakana muPalestina ashishe opo a udifile ovanhu vahapu ngaashi tashi dulika. Okwa li a kaleka onghalamwenyo yaye paunafangwa opo a dule okulongifa efimbo lihapu nokuyandja elitulemo koukalele. (Mat. 8:20) Eshi eemhunga dovanhu da li da hala Jesus a kale puvo opo a velule ovanaudu vavo, okwa li e di lombwela a ti: “Ondi na okuudifila oilando imwe yo evangeli louhamba waKalunga, osheshi olo tuu eli [nde] li tuminwa.” — Luk. 4:43.
2. Omolwashike Jesus a li a fimaneka neenghono oukalele waye?
2 Omolwashike Jesus a li a fimaneka neenghono oukalele waye? Jesus okwa li te lipula unene shi na sha nokuyapulifwa kwedina laJehova. (Mat. 6:9) Okwa kala e hole Xe womeulu, nomolwaasho okwa li a halelela okuwanifa po ehalo laXe nokudulika koipango yaYe. (Joh. 14:31) Natango, Jesus okwa li e na ko nasha shili novanhu nokwa li a hala oku va kwafela. — Mat. 9:36, 37.
3. Ongahelipi hatu dulu okuulika kutya otwa pitifa komesho oukalele?
3 Natu hopaeneneni Jesus: Okupitifa komesho oukalele wetu ngaashi Jesus a li a ninga otaku dulu okukala eshongo molwaashi mounyuni omu na oinima ihapu oyo tai dulu okumana po efimbo letu noku tu piyaaneka neenghono. (Mat. 24:37-39; Luk. 21:34) Onghee hano, otu na okushilipaleka kutya oinima ilipi ya fimanenena nokulitulila po efimbo lokulilongekidila oilonga yokuudifa nokukufa ombinga muyo pandjikilile. (Fil. 1:10) Otu na okukendabala okukala nonghalamwenyo i li paunafangwa nokuhenuka okulongifa ounyuni pauyadi. — 1 Kor. 7:31.
4. Omolwashike sha fimanenena okupitifa komesho oinima oyo ya fimana paife?
4 Omunaendunge oha ningi tete oinima oyo ya fimanenena ngeenge okwa mono kutya ke na efimbo la wana, opo nee ta ka yandja elitulemo koinima oyo inai fimana. Pashihopaenenwa, ngeenge okwa udu kutya ope na oshikungulu sha nyika oshiponga sha ehena popepi, oku na okulongifa efimbo laye nosho yo eenghono daye opo e lilongekide a dule okuxupifa oukwaneumbo waye nokulondwela ovashiinda shaye. Efimbo olo la xupa ko fimbo oshikungulu shinene shopafaneko shaHarmagedon inashi uya olixupi. (Sef. 1:14-16; 1 Kor. 7:29) Opo tu lixupife fye vene nosho yo ovo tave tu pwilikine, otu na okulipashukila fye vene nosho yo ehongo letu, kutya nee omeongalo ile okondje yeongalo. (1 Tim. 4:16) Onghee hano, okuxupa kwetu okwe likolelela kokupitifa komesho oukalele wetu.