Kala wa lenga oufembanghenda wokuudifa
1. Ovanhu vahapu mounyuni ohava tale ko ngahelipi oilonga yetu yokuudifa?
1 Ovanhu vahapu mounyuni ou waSatana ohava tale ko oilonga yetu yokuudifa i li “oulai.” (1 Kor. 1:18-21) Ngeenge inatu lungama, etaleko la penga la tya ngaho nafye otali dulu oku tu teya omukumo noku tu kanififa ouladi wetu woukalele. (Omayel. 24:10; Jes. 5:20) Ndele mbela omatomheno elipi tu na oo tae tu ningifa tu kale twa lenga oufembanghenda wokukala tu li Eendombwedi daJehova? — Jes. 43:10.
2. Omolwashike taku dulu okutiwa kutya oukalele ou li ‘oilonga iyapuki’?
2 ‘Oilonga iyapuki’: Omuyapostoli Paulus okwa ti kutya oukalele wetu ou li ‘oilonga iyapuki.’ (Rom. 15:15, 16) Ndele mbela omeityo lilipi oukalele u li ‘oilonga oiyapuki’? Ngeenge hatu kufa ombinga moilonga yokuudifa, kungaho otu li “ovalongi pamwe” ‘nOmuyapuki,’ Jehova, nohatu yapulifa edina laye. (1 Kor. 3:9; 1 Pet. 1:15) Jehova oha tale ko oilonga yetu yokuudifa i li ngaashi “omahambeleloyambo,” onghee hano, oukalele ou li oshitukulwa sha fimanenena shelongelokalunga letu. — Heb. 13:15.
3. Omolwashike oilonga yokuudifa i li oufembanghenda munene?
3 Ovanhu ashike vanini va pewa oufembanghenda munene wokuudifa. Ngeno ovaengeli ovo va pelwe oshilonga osho, otashi dulika ngeno ve shi wanifa po nehafo notashi dulika ngeno va pondola monghedi ya tongomana. (1 Pet. 1:12) Ndele Jehova okwa hoolola ovanhu inava wanenena, ovo ve li ngaashi ‘oitoo yedu,’ ovo va wanife po oshilonga osho sha fimanenena. — 2 Kor. 4:7.
4. Ongahelipi hatu dulu okuulika kutya otwa lenga oukalele wetu?
4 Osho sha fimanenena: Oukalele wetu otwe u tala ko u li ‘oshinima sha fimanenena,’ molwaashi otwa lenga neenghono oufembanghenda oo tu na. (Fil. 1:10, NW) Onghee hano, ohatu litulile po efimbo lonhumba oshivike keshe lokuya moukalele. Omwiimbi oo a lenga oufembanghenda wokwiimba mongudu yonhumba ya shiivika nawa mounyuni ohe lilongekida nawa kuyele noha xwepopaleke ounghulungu waye wokwiimba. Sha faafana, nafye otu na okukala hatu lilongekida fimbo inatu ya moukalele opo tu dule “okulongifa nawa eendjovo doshili” nokuxwepopaleka ‘ounghulungu wetu wokuhonga.’ — 2 Tim. 2:15; 4:2, NW.
5. Oukalele wetu owa fimanenena pataleko lalyelye?
5 Ino efa u teywe omukumo ketaleko lavahapu. Dimbuluka kutya ope na natango ovanhu vahapu moshitukulwa shetu ovo va hala okuudifilwa. Kakele kaasho, inatu teelela tu kale twa pandika kovanhu. Ndele osho sha fimanenena kufye oshosho kutya otwa hala okuhafifa Jehova, na Jehova okwa lenga neenghono eenghendabala detu. — Jes. 52:7.