Omapya okwa pya okuteywa
1. Oilonga ya fimana ilipi tai longwa kunena?
1 Konima eshi Jesus a li a udifila omukainhu Omusamaria, okwa li a lombwela ovahongwa vaye a ti: “Yeluleni omesho eni nye mu tale omapya nhumbi a pya okuteywa.” (Joh. 4:35, 36) Eteyo olo lopafaneko ola li la hovela, naJesus okwa li a dula okumona komesho yefimbo nhumbi oilonga oyo tai ka longwa mounyuni aushe. Eshi Jesus a shuna meulu, okwa kala natango ta dana onghandangala ya fimana moilonga yeteyo. (Mat. 28:19, 20) Oshike tashi ulike kutya oilonga oyo oya endelela neenghono eshi ya yuka pexulilo?
2. Oshike tashi ulike kutya oilonga yeteyo lomounyuni aushe oya endelela neenghono?
2 Eteyo lomounyuni aushe: Momudo woilonga 2009, ovaudifi mounyuni aushe ova hapupala neepersenda 3, 2. Moilonga omo oilonga yokuudifa ya shilikwa, ovaudifi ova hapupala neepersenda 14. Ohaku lopotwa omakonakonombibeli a konda po 7 619 000 omwedi keshe, nomuvalu oo ou dulife pomuvalu wovaudifi nou dule hanga netata lemiliyona omuvalu womakonakonombibeli oo a ningwa omudo wa ya. Eshi oilonga tai ende tai tamunuka mo neenghono moitukulwa ihapu, ope na omhumbwe inene yovatumwa ovo va deulwa koGilead. Moilongo ihapu omu na ekulo linene moitukulwa omo hamu popiwa omalaka oshinailongo. Osha yela kutya Jehova ota endelelifa oilonga yaye eshi eteyo li li pokupwa. (Jes. 60:22) Mbela ou na ngoo etaleko liwa li na sha ‘nepya’ leni?
3. Ovaudifi vamwe otashi dulika va fike pexulifodiladilo lilipi shi na sha neteyo lomoitukulwa yavo?
3 Eteyo lomoshitukulwa sheni: Vamwe otashi dulika va tye: “Fye moshitukulwa shetu kamu na eteyo liwa.” Oshoshili kutya moitukulwa imwe ohamu monika mwa fa muhe na eteyo liwa okuyelekanifa noitukulwa ikwao ile ya fa itai imike nawa ngaashi nale. Onghee hano, Eendombwedi dimwe otashi dulika di fike pexulifodiladilo kutya eteyo ola pwa moitukulwa yado nonokutya paife otadi pupudulula mo ashike oilya inini oyo ya fyaala mo. Ndele mbela osho ngoo shi li ngaho?
4. Otu na okukulika oikala ya yuka ilipi i na sha noukalele wetu, nomolwashike?
4 Oilonga yeteyo oya kala ya endelela neenghono okudja ngoo pehovelo fiyo opexulilo leteyo. Didilika nghee Jesus a li a ulika kutya oilonga oyo oya endelela, eshi a ti: “Oilya oi li po ihapu, ndele ovateyi ovo ovanini. Ilikaneni hano Omwene weteyo, a tume ovateyi keteyo laye.” (Mat. 9:37, 38) Jehova oo e li Omwene weteyo, oye e na oshinakuwanifwa shokutya onaini nopeni hatu dulu okuhanga oilya yeteyo. (Joh. 6:44; 1 Kor. 3:6-8) Mbela fye oshinakuwanifwa shetu oshilipi? Ombibeli otai nyamukula tai ti: “Ombuto yoye i kuna ongula, ndele ino tulumukifa eke loye komatango.” (Omuud. 11:4-6) Doshili, katu na okutulumukifa eke letu eshi eteyo li li pokupwa.
5. Omolwashike tu na okutwikila okuudifa nouladi moitukulwa oyo tai monika ya fa itai imike oiimati?
5 Twikila noilonga yeteyo: Nonande otu kale twa mana ko oshitukulwa shetu lwoikando notashi monika sha fa itashi imike oiimati, otu na etomheno liwa lokulonga nouladi nosho yo neendelelo. (2 Tim. 4:2, yelekanifa NW.) Oiningwanima itilifa oyo tai ningwa mounyuni otai ningifa ovanhu va lundulule oikala yavo nova diladile va mana mo shi na sha nonakwiiwa. Eshi ovanyasha tava kulu, otashi dulika va ka kale ve udite kutya ova pumbwa okukala va amenwa nove na ombili yopamadiladilo. Vamwe otashi dulika va kale va kumwa eshi itatu sholola. Doshili, ovo va li inava tambula ko onghundana iwa monakudiwa otashi dulika ve i tambule ko paife. Otwa pumbwa yo okulondwela nokuli naavo hava anye okutambula ko etumwalaka letu owina. — Hes. 2:4, 5; 3:19.
6. Ngeenge moshitukulwa shetu kamu na eteyo liwa, oshike tashi ke tu kwafela tu kale ovaladi?
6 Ngeenge moshitukulwa shetu kamu na eteyo liwa, oshike tashi ke tu kwafela tu kale ovaladi? Kakele kokuudifa eumbo neumbo, otashi dulika twa pumbwa okulongifa eenghedi dimwe vali ngaashi okuudifila peenhele domalandifilo ile okuyandja oundombwedi okupitila mongodi, ile tu lundulule omatwalemo etu. Ohatu dulu yo okulundulula efimbo olo hatu i moukalele, tashi dulika tu ye mo komatango ile peemhito dimwe vali opo ovanhu luhapu hava kala momaumbo. Shimwe vali, ohatu dulu okulihonga elaka lipe opo tu dule okuudifila ovanhu vahapu onghundana iwa. Ohatu dulu yo okutamununa mo oukalele wetu mokukufa oukokolindjila wondjikilile, ile tu tembukile koitukulwa oko ku na ovateyi vanini. Ngeenge otu na etaleko liwa li na sha neteyo, ohatu ka ninga eenghendabala ngaashi hatu dulu opo tu kufe ombinga pauyadi moilonga oyo ya fimana.
7. Otu na okulonga oilonga yeteyo fiyo onaini?
7 Ovanamapya ohava kala ve na efimbo la ngabekwa lokuteya oilikolomwa yavo, nomolwaasho ihava longo nonyalo fiyo osheshi eteyo la pwa. Eteyo lopamhepo nalo ola endelela. Ndele mbela otu na okulonga oilonga ei yeteyo fiyo onaini? Otu na oku i longa “fiyo okexulilo lefimbo lounyuni” nofiyo ‘exulilo le uya.’ (Mat. 24:14; 28:20) Ngaashi ashike Jesus, Omukalele waJehova a shiya ko, nafye otwa hala okumana oshilonga osho twe lineekelelwa. (Joh. 4:34; 17:4) Onghee hano, natu twikileni okuwanifa po oukalele wetu nouladi, twa hafa notu na etaleko liwa fiyo exulilo le uya. (Mat. 24:13) Eteyo inali pwa natango!
[Eendjovo dididilikwedi pepandja 2]
Oilonga yeteyo oya kala ya endelela neenghono okudja ngoo pehovelo fiyo opexulilo leteyo