Kala u “nolukeno”
1. Kunena ovanhu mounyuni aushe ova pumbwa shike neenghono?
1 Kapa li nande efimbo limwe mondjokonona opo ovanhu vahapuvahapu va li va pumbwa ekwafo neenghono nokuulikilwa olukeno ngaashi kunena. Molwaashi eenghalo dounyuni otadi ende tadi naipala neenghono, oda ningifa ovanhu mounyuni aushe va kale inava hafa, va polimana nova kale vehe na eteelelo lasha. Onghee hano, ovanhu omamiliyona ova pumbwa ekwafo, nafye tu li Ovakriste ofye atuke hatu dulu oku va ulikila kutya otu na ko nasha navo shili. (Mat. 22:39; Gal. 6:10) Ndele mbela ongahelipi hatu dulu okuulika kutya otu na ko nasha novanhu va tya ngaho?
2. Onghedi ya denga mbada ilipi omo hatu dulu okuulika kutya otu uditile ovanhu olukeno?
2 Oilonga yokuudifa otai ulike kutya Jehova Omunalukeno, nafye otu na okukala ovanalukeno: Kape na ehekeleko lashili notali kalelele inali dja kuKalunga. (2 Kor. 1:3, 4) Jehova okwe tu ladipika tu mu hopaenene mokukala ‘ovanalukeno’ nokwe tu pa oshinakuwanifwa shokuudifila ovanhu vakwetu onghundana iwa yOuhamba. (1 Pet. 3:8) Okukufa ombinga moilonga oyo oku li onghedi ya denga mbada yokuhekeleka ‘ovo ve na omitima da nyanyaulwa,’ molwaashi Ouhamba waKalunga oo auke u li ekandulepo lokumona oixuna kwovanhu. (Jes. 61:1) Molwaashi Jehova oku uditile oshiwana shaye olukeno, ota ka katuka onghatu mafiku opo a xulife po oukolokoshi noku ete po ounyuni mupe wouyuki. — 2 Pet. 3:13.
3. Ongahelipi hatu dulu okuulika kutya ohatu tale ko ovanhu ngaashi Jesus a li he va tale ko?
3 Kala ho tale ko ovanhu ngaashi Jesus a li he va tale ko: Nokuli nongeenge Jesus a li ta udifile eemhunga dovanhu, okwa li e shii kutya keshe umwe pauhandimwe okwa pumbwa ekwafo opo a kale e na ekwatafano liwa naKalunga. Ovanhu ovo ova li va fa eedi dihe na omufita oo te di wilike. Jesus eshi e va mona okwa li e va udila olukeno, naasho osha li she mu linyengifa e va honge nelidiiniko. (Mark. 6:34) Ngeenge otwa kala hatu tale ko ovanhu ngaashi Jesus a li he va tale ko, otashi ke tu linyengifa nafye tu va udile olukeno lashili pauhandimwe. Osho ohatu ke shi ulika okupitila monghedi omo hatu popi navo notashi ke limonikila yo koipala yetu. Onghee hano, otu na okukala twa pitifa komesho oukalele mokukalamwenyo kwetu nokuninga eenghendabala tu udifile vamwe she likolelela keemhumbwe davo. — 1 Kor. 9:19-23.
4. Omolwashike twa pumbwa okukala hatu udile vamwe olukeno?
4 Ovanhu vahapu vomoiwana aishe otava tambula ko etumwalaka lOuhamba nohava pandula omolwohole oyo hava ulikilwa kovaudifi vOuhamba. Ohatu ka fimanekifa Kalunga ketu Omunalukeno, Jehova, ngeenge otwa twikile okukala hatu udile vamwe olukeno. — Kol. 3:12.