Oifo yetu oya nuninwa okukwafela ovanhu vomaludi aeshe
1. Ongahelipi ongudu yomupiya omudiinini nomunaendunge hai hopaenene omuyapostoli Paulus?
1 Ngaashi ashike omuyapostoli Paulus a li ha tifuka ngeenge ta udifa onghundana iwa opo a dule okukwafela “ovanhu vomaludi aeshe,” ongudu yomupiya omudiinini nomunaendunge nayo ohai longifa oifo yetu opo i kwafele ovanhu vomaputuko novomaitavelo e lili noku lili. (1 Kor. 9:22, 23, NW) Onghee hano, nafye otwa pumbwa okukaleka momadiladilo kutya oifo yOshungonangelo no-Awake! oya nuninwa oolyelye opo tu dule okukala hatu i longifa nawa.
2. Oshifo sho-Awake! osha nuninwa okukwafela oolyelye?
2 O-Awake!: Oshifo osho osha nuninwa okukwafela ovanhu ovo ve li monghalo ya faafana naayo yovanhu ovo va li va udifilwa pomhito imwe komuyapostoli Paulus, ovo a li a popifa a ti: “Ovalumenhu nye Ovaatena.” (Oil. 17:22) Ovalumenhu ovo kava li Ovakriste nova li ashike ve na eudeko linini lOmishangwa. Sha faafana, o-Awake! oya nuninwa ovanhu ovo ve na eshiivo linini lOmbibeli ile vehe i shii nandenande. Ovanhu va tya ngaho otashi dulika kave shii omahongo opaKriste, inave lineekela lela momalongelokalunga ile tashi dulika vehe shii kutya Ombibeli oi na omayele taa longo. O-Awake! oya nuninwa unene tuu okutomha ovanhu ovo va itavele kutya Kalunga kashili oko e li. Oya nuninwa yo okukwafela ovaleshi va kale va itavela mOmbibeli noku va kwafela va mone kutya elongelokalunga lEendombwedi daJehova ola yooloka ko komalongelokalunga makwao.
3. Oolyelye va nuninwa okulesha Eeshungonangelo adishe dopavali?
3 Oshungonangelo: Oshungonangelo oyo hai yandjwa moukalele oya nuninwa ovanhu ovo va fimaneka ngoo Kalunga nosho yo Eendjovo daye. Ovanhu va tya ngaho ove na eshiivo lonhumba lOmbibeli ndele kave udite ko lelalela omahongo ayo. Ovanhu ovo ova faafana novanhu vamwe ovo Paulus a li a popya kutya ohava “tila Kalunga.” (Oil. 13:14-16) Oshungonangelo yokukonakonwa oya nuninwa unene tuu Eendombwedi daJehova. Paulus okwa li e lineekela kutya ovo tava ka lesha eenhumwafo daye ove shii Omishangwa nove shii nawa oshili. (1 Kor. 1:1, 2) Sha faafana, oitukulwa oyo i li mOshungonangelo yokukonakonwa oya nuninwa yo ovanhu ovo hava kala pokwoongala kwetu nove shii omahongo Eendombwedi daJehova nosho yo omautumbulilo oo hadi longifa.
4. Omolwashike twa pumbwa okushiiva oshikalimo shoifo oyo hatu yandje moukalele?
4 Nonande peemhito dihapu ohatu yandje Oshungonangelo no-Awake! oshita, luhapu ohatu ningi ashike etwalemo loshifo shimwe. Onghee hano, litulila po elalakano u kale ho lesha oifo aishe opo u kale u shii oshikalimo shayo. Kungaho, oto ka dula okutofa mo oinima oyo tai dulu okupendula ohokwe yavamwe ngeenge to va pe oifo oyo.