Kwafela omuneumbo a diladile moule
1. Onghedi yokupopya novanhu ilipi hai pondola moukalele?
1 Mbela onghedi yokupopya novanhu moukalele ilipi hai pondola? Mbela oku mu pa ashike konguto ile oku mu kwafela a diladile moule opo a fike kuye mwene pexulifodiladilo li li mondjila? Omuyapostoli Paulus okwa li a tomhafana nOvajuda vomuTessalonika nokwe va kwafela va fike pexulifodiladilo li li mondjila. Oshidjemo, “vamwe vomuvo ova itavela.” (Oil. 17:2-4) Ndele mbela okutomhafana navamwe okwa kwatela mo shike?
2. Omonghedi ilipi hatu dulu okuhopaenena Paulus ngeenge hatu udifa onghundana iwa?
2 Kala ho yavelele omaliudo avamwe nokukaleka momadiladilo onakudiwa yavo: Opo u dule okutomhafana nawa navamwe moshitukulwa sheni, ou na okuyavelela omaliudo avo. Eshi Paulus a li ta popi nOvagreka ovo va li vehe fi ovaitaveli koAreopagi, okwa li a hovela eenghundafana navo ta tumbula oinima oyo tashi dulika va li ve shii nove i tambula ko. (Oil. 17:22-31) Onghee hano, ngeenge hatu lilongekida omatwalemo etu, nafye natu kaleni hatu diladila kwaasho ovanhu va itavela moshitukulwa shetu nosho yo onghedi omo have linyenge. (1 Kor. 9:19-22) Ngeenge omuneumbo itatu kumwe naave moshinima shonhumba, kendabala u tale kutya otamu tu kumwe moshinima shilipi, ndele to kanghameke eenghundafana deni kwaasho.
3. Ongahelipi okupula omapulo nelungi taku dulu oku tu kwafela tu tomhafane navamwe?
3 Kala ho pula omapulo nelungi: Itatu dulu okuudikila omunhu ondjila yokuya konhele yonhumba okuninga tu mu wete ile tu shii kutya oku li peni pefimbo opo. Sha faafana, nafye itatu dulu okupukulula omuneumbo a dule okufika pexulifodiladilo li li mondjila okuninga tu shii kutya oku shii shike nale. Luhapu fimbo Jesus a li ina tomhafana nomupwilikini waye, okwa li he mu pula tete omapulo opo a ude kutya ota diladila shike kombinga yoshinima osho. Pashihopaenenwa, eshi omulumenhu umwe a li e uya kuye ta ti kutya “ondi na okulonga shike ndi fyuulule omwenyo waalushe?,” Jesus okwa li e mu pula tete omapulo ofimbo ine mu pa enyamukulo. (Luk. 10:25-28) Pomhito vali imwe, Petrus okwa li a yandja enyamukulo la puka, ndele Jesus te mu pukulula nelungi ta longifa omapulo. (Mat. 17:24-26) Onghee hano, nafye otu na okukala hatu pula omuneumbo omapulo opo tu mu kwafele a diladile moule ngeenge a pula ile a popya oshinima sha puka.
4. Omolwashike tu na okukala hatu kendabala tu kwafele omuneumbo a diladile?
4 Ngeenge nafye otwa kala hatu kwafele omuneumbo a diladile, kungaho, ohatu ka hopaenena Omuhongi wetu Munene, Jesus, nosho yo ovaudifi vevangeli vakwao ovanekeka vomefelemudo lotete. Otu na okukala hatu ulikile omuneumbo kutya otwe mu lenga noku mu pula omapulo monghedi yefimaneko. (1 Pet. 3:15) Oshidjemo, omunhu a tya ngaho otashi dulika a kale a hala tu aluke vali moshikando tashi uya.