Oho ningi ngoo eenghendabala u mone ouwa mehongo olo Jehova he tu pe?

1. Jehova oha tale ko ngahelipi ehongo?

¹ ‘Omuhongi wetu Munenenene,’ Jehova, okwa hala tu kale twa hongwa. (Jes. 30:20, NW) Jehova okwa hovela okuhonga oishitwa yaye okudja ngoo eshi a shita Omona waye woshiveli. (Joh. 8:28) Nokuli nokonima younashibofa waAdam, Jehova ina efa po okuhonga oishitwa yaye, ndele ponhele yaasho, okwa twikila okuhonga pahole ovanhu inava wanenena. — Jes. 48:17, 18; 2 Tim. 3:14, 15.

2. Oshikonga shokuhonga ovanhu shilipi tashi ningwa kunena?

² Kunena, Jehova ota kwatele komesho oshikonga shinenenene mondjokonona shokuhonga ovanhu. Ovanhu omamiliyona mounyuni aushe otava tondokele ‘komhunda yongulu yOmwene’ yopafaneko, ngaashi naanaa sha li sha xunganekwa kuJesaja. (Jes. 2:2) Ndele mbela omolwashike tava tondokele komhunda oyo? Opo va ka hongwe eendjila daKalunga, ile tu tye, va ka hongwe kuJehova. (Jes. 2:3) Momudo woilonga 2010, Eendombwedi daJehova oda longa eevili di dulife pebiliyona 1, 6 moilonga yokuudifa nokuhonga ovanhu oshili yOmbibeli. Kakeke kaasho, oshivike keshe ovanhu ohava hongwa ehongo lopamhepo okupitila momaongalo omounyuni aushe e dulife po 105 000 nosho yo moishangomwa yopaKriste oyo hai nyanyangidwa komupiya omudiinini nomunaendunge momalaka e dulife 500.

3. Ouwa ulipi wa mona pauhandimwe mehongo olo Jehova he tu pe?

³ Mona ouwa pauyadi: Ohatu mono ouwa muhapu mehongo olo Kalunga he tu pe. Otwe lihonga kutya edina laKalunga oJehova nonokutya ohe tu file oshisho. (Ex. 15:3, OB-1954; 1 Pet. 5:6, 7) Otwa shiiva yo omanyamukulo omapulo amwe a fimanenena monghalamwenyo ngaashi aa taa landula apa: Omolwashike ovanhu hava mono oixuna nohava fi? Ongahelipi handi dulu okumona ehafo lashili monghalamwenyo? Nosho yo, Elalakano longhalamwenyo oshike? Jehova okwe tu honga yo nghee tu na okulihumbata opo tu ‘kale tu nelao meendjila detu.’ — Jos. 1:8.

4. Eemhito dehongo dimwe dilipi da yeulukila ovapiya vaKalunga, nomolwashike tu na okuninga eenghendabala tu mone ouwa mehongo olo?

⁴ Jehova okwa ninga yo omalongekido opo pa kale eetundi de likalekelwa di kwafele ovapiya vaye vahapu va tamunune mo oukalele wavo. Pepandja 4-6 lokafo aka opa tumbulwa eemhito donhumba odo da yeulukila vamwe vomovapiya vaJehova. Oho ningi ngoo eenghendabala u mone ouwa pauyadi mehongo olo Jehova he tu pe, nokuli nonande eenghalo doye itadi ku pitike u ka deulwe keefikola odo da tumbulwa pomapandja oo? Mbela ohatu ladipike ngoo ovanyasha va lalakanenene oinima yopamhepo nosho yo ehongo la denga mbada olo hatu pewa kuJehova, ponhele yokulalakanena ehongo lopombada lomounyuni olo luhapu hava ladipikilwa kovahongifikola nosho yo kuvamwe? Ngeenge otwa kala hatu ningi eenghendabala da mana mo tu mone ouwa mehongo olo Jehova he tu pe, ohatu ka hafela onghalamwenyo paife nosho yo omwenyo waalushe monakwiiwa. — Eps. 119:105; Joh. 17:3.

Eemhito dimwe dehongo odo da yeulukila ovanhu mehangano laJehova:

Eetundi dokulihonga okulesha nokushanga

• Elalakano: Okuhonga ovanhu okulesha nokushanga opo va dule okukala hava konakona Ombibeli paumwene nokuhonga vamwe oshili.

• Efimbo: Ohadi kwata efimbo she likolelela keemhumbwe dovahongwa.

• Onhele: Olupale lOuhamba.

• Ovo tava dulu okulishangifa: Ovaudifi aveshe nosho yo ovo ve na ohokwe.

• Nghee u na okulishangifa: Ovakulunhuongalo ohava unganeke eetundi odo she likolelela komhumbwe yomoshitukulwa shavo, nohava ladipike aveshe ovo va hala okumona ouwa meetundi odo va kale po.

Ofikola yOukalele woPauteokratika

• Elalakano: Okudeula Ovakriste va kale ovahongi novaudifi vonghundana iwa va pyokoka.

• Efimbo: Ihai xulu.

• Onhele: Olupale lOuhamba.

• Ovo tava dulu okulishangifa: Ovaudifi aveshe. Ovo hava endafana alushe neongalo notava tu kumwe nomahongo Ombibeli nove na onghedi yokukalamwenyo oyo i li metwokumwe nomifikamhango dopaKriste, navo otava dulu okulishangifa mofikola oyo.

• Nghee u na okulishangifa: Popya nomupashukili wOfikola yOukalele woPauteokratika.

Eetundi dokulihonga elaka loshinailongo

• Elalakano: Okuhonga ovaudifi nghee ve na okuudifa onghundana iwa melaka olo.

• Efimbo: Eemwedi nhee ile nhano. Luhapu eetundi odo ohadi ningwa mOlomakaya ongula, oule wovili imwe ile mbali.

• Onhele: Luhapu ohadi ningilwa mOlupale lOuhamba lopopepi nanye.

• Ovo tava dulu okulishangifa: Ovaudifi aveshe ovo ve na oupamhepo muwa nove na ehalo loku ka udifila ovanhu ovo hava popi elaka olo.

• Nghee u na okulishangifa: Oshitaimbelewa osho hashi unganeke eetundi odo she likolelela komhumbwe oyo i li po.

Okutunga Omalupale Ouhamba

• Elalakano: Okutunga nokuwapekulula Omalupale Ouhamba. Elongekido olo lokutunga Omalupale Ouhamba kali fi ofikola, ndele ohali kwafele ovaliyambi ve lihonge omaunghulungu e lili noku lili opo va dule okukwafela meeproyeka dokutunga.

• Efimbo: Oshe likolela keenghalo domuliyambi.

• Onhele: Keshe opo Okomitiye yOkutunga yomOshitukulwa sheni ya pulwa i ka tunge. Oto dulu yo okukala ho longo efimbo li yadi keshe opo pe na omhumbwe, pamwe nOngudu yOkutunga Omalupale Ouhamba koshi yewiliko loshitaimbelewa.

• Oiteelelwa: Ovamwatate novamwameme ovo ove na okukala va ninginifwa nove na okupopilwa kolutu lovakulunhuongalo, kutya nee ove na ounghulungu wokutunga ile hasho.

• Nghee u na okulishangifa: Pula ovakulunhuongalo vomeongalo leni ve ku pe ofooloma yedina Kingdom Hall Volunteer Worker Questionnaire (S-82) opo u dule okukala ho longo pamwe nOkomitiye yOkutunga yomOshitukulwa. Ngeenge oto dulu okuliyamba oule womwedi umwe ile dihapu, yadeka ofooloma yedina Application for Kingdom Hall Construction Volunteer Program (A-25).

Ofikola yOkudeula Ovakokolindjila

• Elalakano: Okukwafela ovakokolindjila va ‘wanife po nawa oshilongayakulo shavo.’ — 2 Tim. 4:5.

• Efimbo: Oivike ivali.

• Onhele: Oshitaimbelewa osho hashi tokola kutya openi i na okuningilwa; naluhapu ohai ningilwa mOlupale lOuhamba lopopepi nanye.

• Oiteelelwa: Omunhu oku na okukala a kokola ondjila oule wodula imwe lwaapo.

• Nghee u na okulishangifa: Ovakokolindjila ovo va wana ohava shiivifilwa komupashukilishikandjo wavo nopehe na okulishangifa.

Ofikola yOvabetel Vape

• Elalakano: Ofikola oyo oya nuninwa okukwafela Ovabetel vape va pondole moilonga yavo yaBetel.

• Efimbo: Ohai ningwa ovili imwe oshivike keshe, oule woivike 16.

• Onhele: Betel.

• Oiteelelwa: Omunhu oku na okukala oshilyo shoukwaneumbo waBetel shefimbo li yadi ile oo te liyambe oule wefimbo lile (omudo umwe ile shi dule po).

• Nghee u na okulishangifa: Ovabetel ovo va wana ohava shivwa kofikola oyo nopehe na okulishangifa.

Ofikola yOukalele wOuhambaa

• Elalakano: Okudeula ovakulunhuongalo novayakuliongalo opo va dule okupashukila omaongalo nokuwanifa po oinakuwanifwa yehangano. (Oil. 20:28) Ofikola oyo ohai ningwa konima yomido dinini, she likolelela ketokolo lOlutuwiliki.

• Efimbo: Omido opo da di ko, ovakulunhuongalo ova kala hava i kofikola oyo efiku limwe netata, ofimbo ovayakuliongalo efiku limwe alike.

• Onhele: Luhapu ohai ningilwa mOlupale lOuhamba lopopepi ile mOlupale lOyoongalele.

• Oiteelelwa: Omunhu oku na okukala omukulunhuongalo ile omuyakuliongalo.

• Nghee u na okulishangifa: Ovakulunhuongalo novayakuliongalo ovo va wana ohava shivwa komupashukilishikandjo.

Ofikola yOkudeula Ovakulunhuongalob

• Elalakano: Okukwafela ovakulunhuongalo va wanife po oinakuwanifwa yavo meongalo.

• Efimbo: Omafiku atano.

• Onhele: Oshitaimbelewa osho hashi tokola kutya otai ka ningilwa peni; naluhapu ohai ningilwa mOlupale lOuhamba lopopepi ile mOlupale lOyoongalele.

• Oiteelelwa: Omunhu oku na okukala omukulunhuongalo.

• Nghee u na okulishangifa: Ovakulunhuongalo ovo va wana ohava shivwa koshitaimbelewa nopehe na okulishangifa.

Ofikola yOkudeula Ovapashukili Ovaendi nOvakulukadi Vavo*

• Elalakano: Okukwafela ovapashukilishikandjo novapashukili voitukulwa va pondole filufilu moilonga yavo yokufila oshisho omaongalo nova longe noudiinini ‘moshilonga shondjovo noshokuhonga’ nokupashukila ovo ve li koshi yewiliko lavo. — 1 Tim. 5:17; 1 Pet. 5:2, 3.

• Efimbo: Eemwedi mbali.

• Onhele: Oshitaimbelewa osho hashi ufa kutya otai ka ningilwa peni.

• Oiteelelwa: Omunhu oku na okukala omupashukilishikandjo ile omupashukili woshitukulwa.

• Nghee u na okulishangifa: Ovapashukili ovaendi ovo va wana novakulukadi vavo ohava shivwa koshitaimbelewa nopehe na okulishangifa.

Ofikola yOmbibeli yOkudeula Ovamwatate Inava Hombolac

• Elalakano: Okudeula ovakulunhuongalo novayakuliongalo ovo inava hombola opo va dule oku ka pewa oinakuwanifwa ya wedwa po konahiya. Vahapu ovo hava piti mofikola oyo ohava tuminwa koitukulwa oko ku na omhumbwe yovaudifi moshilongo shavo. Ovamwatate ashike vanini hava dulu okutuminwa koilongo imwe ngeenge ove na ehalo.

• Efimbo: Oule weemwedi mbali.

• Onhele: Oshitaimbelewa osho hashi tokola kutya otai ka ningilwa peni; naluhapu ohai ningilwa mOlupale lOuhamba ile mOlupale lOyoongalele.

• Oiteelelwa: Omunhu oku na okukala omumwatate ina hombola e na omido 23 fiyo 62, e na oukolele muwa, noku na ehalo lokuyakula ovamwaxe nokuxumifa komesho oinima yOuhamba keshe opo pe na omhumbwe. (Mark. 10:29, 30) Oku na yo okukala omukulunhuongalo ile omuyakuliongalo oule womido mbali noina kala pedu lwopokati opo.

• Nghee u na okulishangifa: Ngeenge oshitaimbelewa sheni osha ninga po elongekido li na sha nofikola oyo, otamu ka shivwa kokwoongala kwaavo va hala okulishangifa poshoongalele shopashikandjo. Ohapa yandjwa yo ouyelele wa wedwa po pokwoongala oko.

Ofikola yOmbibeli yOkudeula Ovalihomboli Ovakristed

• Elalakano: Okupa ovalihomboli edeulo le likalekelwa opo va dule okulongifwa pauyadi kuJehova nosho yo kehangano laye. Vahapu ovo hava piti mofikola oyo ohava tuminwa koitukulwa oko ku na omhumbwe yovaudifi moshilongo shavo. Ovamwatate ashike vanini hava dulu okutuminwa koilongo imwe ngeenge ove na ehalo.

• Efimbo: Eemwedi mbali.

• Onhele: Eetundi donhumba dopehovelo ohadi ningilwa ko-Watchtower Educational Center oyo i li muPatterson, shomuNew York, U.S.A. Konima yaasho, ohadi ka twikila keenhele donhumba odo da hoololwa koshitaimbelewa, naluhapu ohadi ka ningilwa mOlupale lOyoongalele ile mOlupale lOuhamba.

• Oiteelelwa: Ovalihomboli ove na okukala ve na omido 25 fiyo 50, ve na oukolele muwa, eenghalo davo tadi va pitike va ka longe keshe opo pe na omhumbwe nove na oikala oyo kutya: “Aame ou, tume nge!” (Jes. 6:8) Natango, ove na okukala va hombola oule womido mbali nova kala ve li moilonga yefimbo li yadi oule womido mbali noinava kala pedu lwopokati opo.

• Nghee u na okulishangifa: Ngeenge oshitaimbelewa sheni osha ninga po elongekido li na sha nofikola oyo, otamu ka shivwa poshoongalele shefiku le likalekelwa mu ye pokwoongala kwaavo va hala okulishangifa. Ouyelele wa wedwa po ohau yandjwa pokwoongala oko.

Ofikola yOmbibeli yoWatchtower yaGilead

• Elalakano: Okudeulila ovakokolindjila nosho yo ovalongi vakwao vefimbo li yadi oilonga youtumwa.

• Efimbo: Eemwedi nhano.

• Onhele: Oko-Watchtower Educational Center oyo i li muPatterson, shomuNew York, U.S.A.

• Oiteelelwa: Ovalihomboli ovo va ninginifwa oule womido nhatu nove na omido 21 fiyo 38 pefimbo opo tava tula mo omaindilo avo oshikando shotete. Ove na yo okukala hava popi Oshiingilisha, va hombola oule womido mbali nova kala ve li moilonga yefimbo li yadi oule womido mbali noinava kala pedu lwopokati opo. Ovo tava tula mo omaindilo ove na okukala ve na oukolele muwa. Ovo tava longo ve li ovakokolindjila moilongo imwe (mwa kwatelwa ovatumwa); ovapashukili ovaendi; Ovabetel nosho yo ovo va li nale kOfikola yOkudeula mOukalele, kOfikola yOmbibeli yOkudeula Ovamwatate Inava Hombola nosho yo kOfikola yOmbibeli yOkudeula Ovalihomboli Ovakriste navo otava dulu okutula mo omaindilo ngeenge ova wanifa po oiteelelwa.

• Nghee u na okulishangifa: Oitaimbelewa imwe ohai ningi omalongekido opo poshoongalele shoshitukulwa pa ningwe okwoongala kwaavo va hala okuya kofikola oyo. Ohapa yandjwa yo ouyelele wa wedwa po pokwoongala oko. Ndele ngeenge poyoongalele yeni ihapa ningwa okwoongala kwa tya ngaho, ashike owa hala okutula mo eindilo, oto dulu okushangela koshitaimbelewa sheni opo u pewe ouyelele wa wedwa po.

Ofikola yOkudeula Oilyo yEekomitiye dOitaimbelewa nOvakulukadi Vayo

• Elalakano: Okukwafela oilyo yEekomitiye dOitaimbelewa i dule okuwanifa po nawa oilonga yayo yokupashukila omaumbo aBetel, okuyandja elitulemo koinima oyo ya kuma omaongalo, okupashukila oikandjo noitukulwa oyo i li koshi yoitaimbelewa yayo, oilonga yokutoloka, yokunyanyangida nosho yo yokutumina oileshomwa komaongalo nokupashukila oikondo i lili noku lili. — Luk. 12:48b.

• Efimbo: Eemwedi mbali.

• Onhele: Oko-Watchtower Educational Center oyo i li muPatterson, shomuNew York, U.S.A.

• Oiteelelwa: Oku na okukala oshilyo shOkomitiye yOshitaimbelewa ile shOkomitiye yOshilongo ile a ulikwa a ninge oshilyo shaimwe yomeekomitiye odo.

• Nghee u na okulishangifa: Ovamwatate ovo va wana novakulukadi vavo ohava shivwa kOlutuwiliki.

[Omashangelo opedu]