Oukwatya wa fimanenena oo omuhongi muwa e na okukala e na
1. Oukwatya wa fimanenena ulipi omuhongi muwa e na okukala e na?
1 Oshike tashi dulu okukwafela omunhu a kale omuhongi muwa? Mbela ehongo laye lomounyuni, oule wefimbo olo a kala moshili ile ounghulungu waye? Hasho nandenande! Omunhu okwa pumbwa okukala e na ohole oyo i li oukwatya oko kwa kanghamekelwa omhango, oo hau didilikifa mo ovahongwa vaJesus nou li yo oukwatya waJehova wa tongomana. (Joh. 13:35; Gal. 5:14; 1 Joh. 4:8) Ovahongi vawa ohava ulikile ovahongwa vavo ohole.
2. Omolwashike sha fimanenena okukala tu hole ovanhu vakwetu?
2 Kala u hole ovanhu: Omuhongi Munene, Jesus, okwa li ha ulikile ovanhu ohole, naasho osha li hashi ve linyengifa va pwilikine kuye. (Luk. 5:12, 13; Joh. 13:1; 15:13) Ngeenge nafye otwa kala tu na ko nasha novanhu vakwetu, ohatu ke va udifila pomhito keshe hatu mono. Inatu efa oinima ngaashi omahepeko nomasheko i tu shololife. Natu kaleni hatu ulikile ohokwe ovanhu ovo hatu udifile nokukala hatu ningi omatwalemo a yukila kwaasho tave lipula nasho. Otu na yo okukala hatu kongo efimbo tu lilongekidile ekonakonombibeli keshe hatu shi ningi komesho yefimbo, ndele haku ka ninga ashike omakonakonombibeli.
3. Ongahelipi ohole yokuhola oshili yOmbibeli tai dulu oku tu kwafela ngeenge tu li moukalele?
3 Kala u hole oshili yOmbibeli: Jesus okwa li e hole oshili yOmbibeli nokwa li e i tala ko i li onga emona. (Mat. 13:52, yelekanifa no-NW.) Ngeenge otu hole oshili, ohatu ke i udifila vamwe nexwamo notashi dulika va ka kale va tunhukwa. Ohole oyo otai ke tu kwafela yo tu yandje elitulemo letu kehongo la fimanenena olo tu na okuhonga vamwe, ponhele yokuyandja ashike elitulemo komangabeko etu notashi dulika tuha ka kale unene twa tila ngeenge tu li moukalele.
4. Ongahelipi hatu dulu okukulika oukwatya wohole?
4 Kulika oukwatya wohole: Ongahelipi hatu dulu okukulika ohole yokuhola ovanhu vakwetu? Omokudilonga kohole oyo Jehova nOmona waye ve tu ulikila nosho yo konghalo yopamhepo inyikifa oluhodi omo ovanhu vomoshitukulwa shetu ve li. (Mark. 6:34; 1 Joh. 4:10, 11) Opo tu kale tu hole neenghono oshili yOmbibeli, otu na okukala hatu ningi ekonakonombibeli lopaumwene nokudilonga. Ohole oi li oshitukulwa shoiimati yomhepo. (Gal. 5:22) Onghee hano, otu na okwiindila Jehova e tu pe omhepo yaye iyapuki noku tu kwafele tu kulike ohole. (Luk. 11:13; 1 Joh. 5:14) Ohole otai ke tu kwafela tu kale ovaudifi ovanekeka, kashi na nee mbudi kutya otu li ovahongwanhu, otwa kala moshili oule wefimbo li fike peni ile otu na ounghulungu u fike peni.