Ino kala iho ningi omakonakonombibeli molwaashi u udite ino wana
1. Omolwashike vamwe ihava ningi omakonakonombibeli?
1 Mbela oho henuka okuninga omakonakombibeli molwaashi u udite kutya ito dulu okuninga nande olimwe monghedi tai pondola? Ovapiya ovadiinini vopefimbo lonale, ngaashi Moses naJeremia omafimbo amwe navo ova li ve udite inava wana okulonga oilonga oyo Kalunga a li e va pa. (Ex. 3:10, 11; 4:10; Jer. 1:4-6) Onghee hano, ovanhu vahapu ove udite ngaashi u udite. Ndele mbela ongahelipi hatu dulu okukondjifa eamo lokudiladila ngaho?
2. Omolwashike tuhe na okukala twa wanenwa kokulonga eumbo neumbo nokudiladila kutya vamwe ovo ashike tava dulu okuninga omakonakombibeli?
2 Otu na okudimbuluka kutya Jehova ke na efiku e tu pule tu ninge oshinima shonhumba shi dulife peenghono detu. (Eps. 103:14) Hano otu na okuwanifa po oshilonga shetu ‘shokuninga ovanhu ovahongwa.’ (Mat. 28:19, 20) Jehova ina yandja ashike oufembanghenda oo kwaavo ve na owino ile ounghulungu. (1 Kor. 1:26, 27) Onghee hano, inatu kala twa wanenwa kokulonga eumbo neumbo nokudiladila kutya vamwe ovo ashike tava dulu okuninga omakonokonombibeli.
3. Jehova ohe tu deula ngahelipi tu ninge omakonakonombibeli?
3 Jehova ohe tu deula: Jehova oye he tu deula opo tu kale twa wana okuninga ovanhu ovahongwa. (2 Kor. 3:5) Okwe tu honga okupitila mehangano laye oshili yOmbibeli oyo nokuli novahongwanhu vahapu mounyuni ou vehe i shii. (1 Kor. 2:7, 8) Okwa shangifa eenghedi dokuhonga dOmuhongi Munene, Jesus, opo tu di landule nohe tu deula monghedi tai twikile okupitila meongalo. Kakele kaasho, okwe tu pa yo oishangomwa oyo tu na okulongifa eshi hatu hongo vamwe Ombibeli. Imwe yomuyo ongaashi embo Ombibeli otai hongo, olo hali hongo oshili monghedi ya yela noipu okuudiwa ko. Okukonakona Ombibeli naumwe kaku fi oshinima shidjuu ngaashi hatu diladila.
4. Omolwashike hatu dulu okukala nelineekelo kutya Jehova ote ke tu kwafela?
4 Moses naJeremia ova li va dula okuwanifa po oilonga yavo kekwafo laJehova. (Ex. 4:11, 12; Jer. 1:7, 8) Nafye ohatu dulu okupula Jehova e tu kwafele. Kakele kaasho, ngeenge hatu ningi ekonakonombibeli, ohatu hongo umwe oshili kombinga yaJehova, naasho otashi hafifa Jehova. (1 Joh. 3:22) Onghee hano, kala ho ningi omakonakonombibeli, oko ku li oshitukulwa shoukalele shihafifa neenghono noshi na ondjabi.