Natu hopaeneneni ovaprofeti — Amos
1. Omolwashike oshihopaenenwa shaAmos tashi dulu oku tu twa omukumo?
1 Mbela oho kala u udite ino wana okuudifa molwaashi wa dja meputuko lidinifa? Ngeenge osho shi li ngaho, oshihopaenenwa shaAmos otashi dulu oku ku twa omukumo. Amos okwa putuka e li omufita weedi nokwa li ha longo omalupita oilonga younafaalama. Ndele nande ongaho, Jehova okwa li e mu lineekelela oshinakuwanifwa shokuudifa etumwalaka laye letokolo. (Amos 1:1; 7:14, 15) Sha faafana nokunena, Jehova oha longifa ovanhu ovalininipiki nova dinika. (1 Kor. 1:27-29) Oshike vali hatu dulu okulihonga komuprofeti Amos shi na sha noukalele wetu?
2. Omolwashike tu na okukala twa pama eshi hatu shakeneke omapataneko moukalele?
2 Natu kale twa pama eshi hatu shakeneke omapataneko: Eshi omupristeri Amasia, oo a li ha longele onhana mouhamba womapata omulongo aIsrael okolundume, a li a uda osho Amos a xunganeka, okwa li te mu taataa. Paulelalela, okwa li ta ti: ‘Inda keumbo leni! Inatu hala fye! Fye otu na nale elongelokalunga letu!’ (Amos 7:12, 13) Amasia okwa li a pengifa eendjovo daAmos eshi a li a ka pula ohamba Jerobeam i shilike oilonga yaAmos. (Amos 7:7-11) Ashike osho kasha li sha tilifa Amos. Kunena, ovafita vamwe vomalongelokalunga ohava pula ovanapolotika ve va kwafele eshi tava hepeke oshiwana shaJehova. Ndele nande ongaho, Jehova okwe tu shilipaleka kutya oilwifo oyo twa hambulilwa itai ka pondola nandenande. — Jes. 54:17.
3. Etumwalaka olo hatu udifa kunena ola kwatela mo oinima yopavali ilipi?
3 Natu udife etokolo laKalunga nomanangeko noupuna oo ta ka eta monakwiiwa: Nonande Amos okwa li a udifila omapata omulongo aIsrael etokolo laKalunga, okwa xulifa embo lOmbibeli olo le mu lukilwa neudaneko laJehova li na sha nokutungulula edu nosho yo omanangeko noupuna mahapu okonahiya. (Amos 9:13-15) Nafye ohatu udifa kombinga ‘yefiku letokolo,’ ndele osho hasho ashike sha kwatelwa ‘mevangeli louhamba’ olo tu na okuudifa. (2 Pet. 3:7; Mat. 24:14) Ngeenge Jehova a hanauna po ovakolokoshi puHarmagedon, ota ka eta oparadisa kombada yedu. — Eps. 37:34.
4. Eshilipaleko lilipi tali ulike kutya ohatu dulu okuwanifa po ehalo laJehova?
4 Okuudifa etumwalaka lOuhamba mounyuni omu mu na ovapataneki vahapu ohashi yeleke etokolotoko letu lokukala metwokumwe neliyapulo letu kuJehova nosho yo okulonga ehalo laye. (Joh. 15:19) Ndele otu na oushili kutya Jehova ota ka twikila oku tu kwafela tu dule okuwanifa po ehalo laye, ngaashi a li a kwafela Amos. — 2 Kor. 3:5.