Omaimbilo mape e na sha nokulongela Kalunga!
1 Pokwoongala kwokomudo kwehangano lo-Watch Tower Bible and Tract Society of Pennsylvania, oko kwa li ko mu 4 Oktoba 2014, opa li pa shiivifwa kutya embo letu lomaimbilo otali ka pepalekwa. Osho kasha li tuu onghundana itunhula! Aveshe ovo va li pokwoongala oko ova li va dimbulukifwa onghandangala ya fimana oyo omaimbilo etu Ouhamba taa dana melongelokalunga letu. — Eps. 96:2.
2 Otashi dulika u lipule kutya, ‘Omolwashike omaimbilo etu a pumbwa okupepalekwa?’ Ope na omatomheno e lili noku lili. Lotete ololo kutya, eudeko letu li na sha nOmishangwa otali ende tali yela, naasho peemhito dimwe ohashi kumu eendjovo domaimbilo etu. (Omayel. 4:18) Etomheno limwe vali ololo kutya, oitya nomautumbulilo mahapu oo a longifwa membo leimbilo lipe okwa dja mo-New World Translation ei ya tetekela. Onghee hano, eendjovo domaimbilo a tya ngaho oda pumbwa okulundululwa di kale de likolelela koitya nomautumbulilo oo e li mo-New World Translation oyo ya pepalekwa. Molwaashi otashi pula oilonga ihapu okuninga omalunduluko a tya ngaho, opa ningwa etokolo opo membo lomaimbilo mu wedwe omaimbilo mape manini.
3 Otu na mbela okuteelela fiyo osheshi pa nyanyangidwa embo lipe lomaimbilo opo tu hovele okulongifa omaimbilo oo mape? Hasho nandenande. Otwa hafa oku mu shiivifila kutya omaimbilo mahapu mape otaa ka pita ko-Web site yetu, o-jw.org, momukokomoko weemwedi donhumba tadi landula. Ngeenge eimbilo lipe ola piti, otali ka tulwa melandulafano pexulilo lOkwoongala kwoPailonga, notapa ka kala pe na eshangelo “eimbilo lipe.”
4 Nghee hatu dulu okulihonga omaimbilo oo mape: Otashi dulika shi kale eshongo okulihonga omaimbilo mape. Ngaashi omushangi wepsalme 30, nafye otwa hala okukala hatu imbile Jehova pokwoongala kweongalo ‘nopehe na okuloloka.’ (Eps. 30:13) Ngeenge owa hala okulihonga omaimbilo oo mape, oto dulu okuninga ngaashi tashi landula:
Pwilikina lwoikando keengovela domaimbilo oo, odo tadi ka enda tadi tulwa ko-Web site yetu. Ngeenge owa kala ho pwilikine keengovela odo, oto ke di dimbuluka noupu.
Konakona eendjovo nokukendabala oku di koneka momutwe.
Kala to imbi omaimbilo oo pamwe neengovela dao fiyo osheshi we a funda.
Lideuleni yo omaimbilo oo lwoikando pElongelokalunga lOukwaneumbo weni fiyo mwe a shiiva nawa.
5 Meemwedi dokomesho, ngeenge eimbilo lipe ola tulwa pexulilo melandulafano lOkwoongala kwoPailonga, eongalo oli na okupwilikina tete kongovela lumwe aluke. Opo nee ovapwilikini otave ke li imba pamwe nongovela ngaashi shito.
6 Diladila kwaashi, okwiimba pokwoongala ohaku tu pe omhito yokwiimbila Jehova nehafo twa hangana. Onghee hano, inatu kala nonghedindjikilile yokufikavaama po poipundi yetu inashi pumbiwa eshi taku tiwa kutya natu ka imbeni eimbilo.
7 Ope na vali eemhito dikwao opo hatu dulu okuulika olupandu letu li na sha nomusika yetu iyapuki. Pashihopaenenwa, poyoongalele yetu ohapa danwa omusika oyo hai tetekele omutumba keshe. Ovamwatate novamwameme ovo hava longifwa okushika omusika ya tya ngaho iwa ohava i koPatterson, shomuNew York lwoikando ivali momudo okudja keembinga neembinga mounyuni aushe, tave liyambe nokulongifa oiniwe yavo okufuta olweendo la tya ngaho. Onghee hano, ngeenge omunashipundi te tu shivi tu ka pwilikine komusika oyo ye tu longekidilwa, otu na okuninga ngaho. Osho otashi ke tu kwafela tu longikide omitima detu opo tu dule okuyandja elitulemo koipopiwa oyo tai ka landula ko. — Esra 7:10.
8 Pexulilo lokwoongala kwetu kwonena ohatu ka imba eimbilo lipe li na oshipalanyole “Ouhamba woye, oo wa dikwa po, nau uye!” Eimbilo olo, olo la imbilwe pokwoongala kwokomudo oko opo kwa di ko, ola totwa nelalakano opo li tu dimbulukife omudo omuti-100 wokupangela kwOuhamba.
9 Omaimbilo oo mape oku li lela imwe yomoinima ‘iwa’ oyo twa pewa kuJehova. (Mat. 12:35a) Onghee hano, natu kendabaleni twa mana mo okulihonga omaimbilo oo mape nokwiimbila Kalunga ketu tashi di komutima, molwaashi okwa wana okuhambelelwa nokufimanekwa! — Eps. 147:1.