Ohatu longele Kalunga, oo e na “efilonghenda linene”

1. Oshike tashi dulika shi uye momadiladilo etu, ngeenge hatu diladila komunhu oo e na onghenda?

NGEENGE hatu diladila komunhu oo e na onghenda, otashi dulika tu diladile komunhu oo e na olukeno, omunahole noha yandje. Otashi dulika yo tu diladile kehokololo laJesus li na sha nOmusamaria omunamutimanghenda. Omulumenhu oo womoshiwana shimwe okwa li a “fila onghenda” Omujuda, oo a li a dengwa keembudi. Omusamaria oo okwa li a “kenukila” Omujuda, oo a li a mona oshiponga nokwe mu fila oshisho pahole. (Luk. 10:29-37) Efaneko olo otali divilike oukwatya wa denga mbada waKalunga ketu, onghenda. Oukwatya oo owa pambafana nohole yaKalunga nohe u ulike efiku keshe, ngeenge ta ungaunga nafye.

2. Oshike vali sha kwatelwa mokuulika onghenda?

² Otashi dulika tu diladile koshinima shimwe vali sha pambafana nonghenda. Omunhu oo e na onghenda, otashi dulika a tokole okuhahandukila omunhu, oo a wana okuhandukilwa. Sha faafana, Jehova naye ohe tu file onghenda. Omupsalme okwa ti: “Ye ite tu ningile eshi sha yeleka omatimba etu.” (Eps. 103:10) Omafimbo amwe, Jehova otashi dulika a yandje outekuduliko wa kwata moiti komunhu, oo ta twikile okunyona.

3. Omapulo elipi hatu ka kundafana?

³ Moshitukulwa eshi, ohatu ka kundafana omapulo atatu aa: Omolwashike Jehova ha ulike onghenda? Ekwatafano lilipi li li pokati koutekuduliko wa kwata moiti nonghenda? Oshike tashi tu kwafele tu ulike onghenda? Natu ka taleni nghee Eendjovo daKalunga tadi nyamukula omapulo oo.

NGHEE JEHOVA HA ULIKE ONGHENDA

4. Omolwashike Jehova ha ulike onghenda?

⁴ Jehova oku hole okuulika onghenda. Omuyapostoli Paulus okwa li a nwefwa mo a shange kutya Kalunga oku na ‘efilonghenda linene.’ Paulus okwa yelifa kutya Kalunga oku na onghenda, molwaashi okwa pa Ovakriste ovavaekwa, ovo inava wanenena, eteelelo loku ka kala nomwenyo meulu. (Ef. 2:4-7) Ndele Jehova iha ulikile ashike onghenda Ovakriste ovavaekwa. Omupsalme David okwa shanga a ti: “Kalunga omuwa kwaaveshe, nohole yaye ya nyananana kovashitwa vaye aveshe.” (Eps. 145:9) Molwaashi Jehova oku hole ovanhu, ohe va file onghenda efimbo keshe, ngeenge oku na etomheno liwa loku shi ninga.

5. Jesus okwe lihonga shike shi na sha nohole yaJehova?

⁵ Jesus oku shii kutya Jehova oku hole okuulika onghenda, e dulife ovanhu aveshe. Jehova naJesus ova kala meulu oule wefimbo lile, ofimbo Jesus ine uya kombada yedu. (Omayel. 8:30, 31) Peemhito dihapu, Jesus okwa kala ha mono nghee Xe ta file onghenda ovanhu ovalunde. (Eps. 78:37-42) Eshi Jesus a kala ta hongo, okwa kala ha popi lwoikando ihapu kombinga youkwatya oo muwa waXe.

6. Efaneko lilipi Jesus a longifa, opo e tu kwafele tu ude ko onghenda yaXe?

⁶ Ngaashi sha popiwa moshitukulwa sha tetekela, Jesus okwa longifa efaneko lomumati a kanene, opo e tu kwafele tu ude ko kutya Jehova oku hole okuulika onghenda. Omumati oo okwa fiya po eumbo nokwa hanauna po “eliko laye nokukala nonghalamwenyo inai koshoka.” (Luk. 15:13) Lwanima, okwe ke livela ombedi omolwelihumbato laye inali koshoka, te lininipike nokwaalukila keumbo. Xe okwa li e linyenga ngahelipi? Omulumenhu oo omunyasha okwa li a teelela nghee Xe a li te ke linyenga. Jesus okwa ti: “Fimbo [omonamati] ta di kokule, xe okwe mu mona nokwe mu kenukila. Okwa tondoka ndele te mu papatele noku mu xupita.” Xe ka li a tonda omonamati. Ponhele yaasho, okwa li e mu fila onghenda nokwa li e mu tambula meumbo. Omonamati, oo a kanene, okwa li a nyona enyono la kwata moiti, ashike xe okwa li e mu dimina po, molwaashi okwe livela ombedi. Omushamane omunanghenda womefaneko olo ota faneke Jehova. Onghee hano, Jesus okwa ulika kutya Xe okwa halelela okudimina po ovalunde, ovo ve livela ombedi shili. — Luk. 15:17-24.

7. Ounongo waJehova owa pambafana ngahelipi nonghenda oyo ha ulike?

⁷ Jehova oha ulike onghenda, molwaashi oku na ounongo wa shiya ko. Jehova oha ningi alushe omatokolo, oo taa etele oishitwa yaye ouwa. Ombiibeli oya popya ya ti: “Ounongo wopombada” ohau kwafele omunhu a kale e na ‘onghenda, noha longo oilonga iwa.’ (Jak. 3:17) Ngaashi ovadali ovanahole, Jehova oku shii kutya ovapiya vaye ohava mono ouwa, ngeenge te va file onghenda. (Eps. 103:13; Jes. 49:15) Osho ohashi va kwafele va kale ve na eteelelo li na sha nonakwiiwa, nonande inava wanenena. Molwaashi Jehova oku na ounongo wa shiya ko, ohau mu linyengifa e tu file onghenda, ngeenge oku na etomheno loku shi ninga. Ashike onghenda yaJehova oi na ongaba. Molwaashi Jehova omunaendunge, iha ulikile onghenda omunhu, oo ta twikile okunyonena owina.

8. Onghatu ilipi ya pumbwa okukatukwa omafimbo amwe, nomolwashike?

⁸ Natu tye nee ngeno omupiya umwe waKalunga okwa tokola okukala nonghedi yokukalamwenyo inai koshoka. Mbela oshike hatu ka ninga po? Paulus okwa nwefwa mo a shange kutya natu “efe po okweendafana” nomunhu a tya ngaho. (1 Kor. 5:11) Ovanyoni, ovo inave livela ombedi, ohava kondwa mo meongalo. Onghatu ya tya ngaho oya pumbiwa, opo ovamwatate novamwameme ovadiinini va amenwe nosho yo edina laJehova. Vamwe otashi dulika va diladile kutya omunhu a tya ngaho ina ulikilwa onghenda yaKalunga, eshi a kondwa. Ndele mbela oshoshili tuu? Natu ke shi taleni.

MBELA OUTEKUDULIKO WA KWATA MOITI OTAU ULIKE NGOO ONGHENDA?

9-10. Metwokumwe nOvaheberi 12:5, 6, omolwashike hatu tile kutya okukonda mo omunyoni, oo ine livela ombedi, oshi li elongekido lopahole? Shi faneka.

⁹ Ngeenge twa udu eshiivifo pokwoongala kwopaKriste li na sha naumwe, oo tu shii notu hole kutya “ke fi vali Ondombwedi yaJehova,” ohatu kala twa nyika oluhodi neenghono. Otashi dulika tu lipule ngeenge ovakulunhuongalo ova ninga ngoo etokolo li li pandunge, eshi va konda mo omunhu oo tu hole. Mbela oshi li ngoo pahole okukonda mo umwe meongalo? Heeno, osho naanaa. Ngeenge umwe okwa pumbwa outekuduliko, oshi li pandunge okuulikilwa onghenda nosho yo ohole. (Omayel. 13:24) Mbela okukonda mo omunyoni meongalo, oo ine livela ombedi, ohashi mu kwafele a lundulule onghedi yaye yokukalamwenyo? Heeno. Ovamwatate novamwameme vahapu, ovo va li va kondwa, ova popya kutya ekondo ole va kwafela va mone kutya ova nyona omanyono a kwata moiti. Oshe va kwafela ve livele ombedi, va lundulule omikalo davo nova alukile kuJehova. — Lesha Ovaheberi 12:5, 6.

¹⁰ Diladila kwaashi. Natu tye nee ngeno omufita okwa didilika kutya odi yaye imwe otai vele. Oku shii kutya opo a dule oku i yakula, okwa pumbwa oku i kufa mo mudikwao. Ashike odi paushitwe kai hole okulikalela. Otashi dulika i kale ya hala okushuna koufita notashi dulika i kale i udite inai manguluka. Mbela osha hala kutya eshi omufita e i tongola ko kudikwao, ote i ningi onyanya? Hasho nandenande. Oku shii kutya ngeenge odi oyo tai vele oya i mudikwao, otai ka tandaveleka omukifi oo. Eshi e i tongola mo, kungaho ota amene oufita aushe. — Yelekanifa naLeviticus 13:3, 4.

11. (a) Omeenghedi dilipi omunhu, oo a kondwa, ta yelekanifwa nodi oyo tai vele? (b) Oshike ovanhu, ovo va kondwa, tava dulu okuninga, nekwafo lilipi tava dulu okupewa?

¹¹ Ohatu dulu okuyelekanifa omunhu, oo a kondwa, nodi oyo tai vele. Omunhu a tya ngaho, ota vele pamhepo. (Jak. 5:14) Oudu wopamhepo, owa faafana nomukifi wopalutu, oo u na olutapo. Onghee hano, osha pumbiwa opo ovanhu, ovo tava vele pamhepo, va kondwe mo meongalo. Outekuduliko wa tya ngaho, otau ulike kutya Jehova oku hole ovapiya vaye ovadiinini, ovo ve li moshiunda. Otau dulu yo okukwafela omunyoni a mone kutya okwa nyona enyono la kwata moiti noku livele ombedi. Ngeenge omunhu, oo a kondwa, okwa kala he uya kokwoongala, otashi ke mu kwafela e lipalule pamhepo nokupameka eitavelo laye. Okwa manguluka okupewa oishangomwa oyo ta ka longifa paumwene nokutala o-JW Broadcasting^®. Ngeenge ovakulunhuongalo ova mono kutya ota ningi exumokomesho, otava ka kala have mu pe omayele omafimbo nomafimbo, oo tae mu kwafele a kale vali e na ekwatafano naJehova. Mokweendelako kwefimbo ota ka alulilwa meongalo e li Ondombwedi yaJehova.b

12. Ovakulunhuongalo ohava ningile shike pahole nopanghenda omunyoni, oo ine livela ombedi?

¹² Osha fimana okushiiva kutya ovanyoni, ovo inave livela ombedi, ovo ashike hava kondwa mo meongalo. Ovakulunhuongalo ove shii kutya ova pumbwa okudiladila moule, ofimbo inava tokola okukonda mo omunyoni meongalo. Ove shii kutya outekuduliko waJehova ou li ‘pandjele.’ (Jer. 30:11) Ove hole ovamwaxe noinava hala nande okuninga oshinima shonhumba osho tashi nyono po ekwatafano lavo naJehova. Ashike omafimbo amwe, ova pumbwa okukonda mo omunyoni meongalo oule wefimbo, naasho oshi na okuningwa pahole nosho yo nonghenda.

13. Omolwashike Omukriste umwe womuKorinto a li a pumbwa okukondwa mo meongalo?

¹³ Diladila nghee omuyapostoli Paulus a li a ungaunga nomunyoni umwe, oo a li ine livela ombedi, pefimbo lovayapostoli vaJesus. Omukriste oo womuKorinto, okwa li a ya momilele nomukulukadi waxe. Osho osha li oshinima shinyanyalifi neenghono. Paulus okwa li e shii kutya Jehova okwa lombwela oshiwana shaIsrael shonale a ti: “Nomulumenhu ou ta nangala nomwalikadi waxe, ye okwa dula mo eteta laxe. Vo aveshe vavali ve nokudipawa shili.” (Lev. 20:11) Oshoshili kutya Paulus ka li a tokolela omulumenhu oo efyo. Ndele okwa li a lombwela Ovakorinto ve mu konde mo meongalo. Oikala ii yomulumenhu oo, oya li tai dulu okunwefa mo vamwe meongalo. Ashike kuvamwe kava li va tala ko enyono lomulumenhu oo la kwata moiti. — 1 Kor. 5:1, 2, 13.   

14. Paulus okwa ulikila ngahelipi onghenda omulumenhu, oo a kondwa mo meongalo lomuKorinto, nomolwashike? (2 Ovakorinto 2:5-8, 11)

¹⁴ Mokweendela ko kwefimbo, Paulus okwa li a mona kutya omulumenhu oo, okwa ninga omalunduluko manene. Okwa li e livela ombedi shili. Nonande omulumenhu oo okwa li a fifa eongalo ohoni, Paulus okwa lombwela ovakulunhuongalo kutya ina hala “okupopya shihapu kombinga yaasho.” Okwe va lombwela a ti: “Mu diminei po nehalo liwa noku mu hekeleka.” Tala etomheno laPaulus, eshi e va lombwela ngaho, a ti: “Opo aha wililwe po neenghono koluhodi.” Paulus okwa li a fila onghenda omulumenhu oo e livela ombedi. Omuyapostoli ka li a hala okumona omulumenhu oo a wililwa po koluhodi, ndele ta efa okukonga ekwafo a diminwe po. — Lesha 2 Ovakorinto 2:5-8, 11.

15. Ongahelipi ovakulunhuongalo hava yandje outekuduliko wa kwata moiti, nopefimbo opo tuu opo otava file onghenda omunyoni?

¹⁵ Ovakulunhuongalo ovanahole ohava hopaenene Jehova mokuulika onghenda. Ohava yandje outekuduliko wa kwata moiti, ngeenge osha pumbiwa. Ashike nande ongaho, ohava ulike onghenda, ngeenge ope na etomheno loku shi ninga. Ngeenge ovakulunhuongalo ihava yandje outekuduliko nandenande, itava ka ulika onghenda. Ndele ponhele yaasho, otava ka mbebeleka omunyoni. Mbela ovakulunhuongalo ovo ashike va pumbwa okuulika onghenda?

OSHIKE TASHI TU KWAFELE ATUSHE TU ULIKE ONGHENDA?

16. Metwokumwe nOmayeletumbulo 21:13, Jehova ohe linyenge ngahelipi shi na sha naavo ihava ulike onghenda?

¹⁶ Ovakriste aveshe ova pumbwa okukala ovananghenda, ngaashi Jehova. Omolwashike mbela? Etomheno limwe ololo kutya, Jehova ita ka pwilikina kwaavo inava hala okufila vakwao onghenda. (Lesha Omayeletumbulo 21:13.) Kape na nande oumwe womufye a hala Jehova a kale ita pwilikine komailikano aye. Onghee hano, osha fimana okukala tu na onghenda. Inatu hala okwaanya okupwilikina kOmukriste mukwetu, oo ta mono oixuna. Otwa hala alushe okweendekela okutwi kwetu ‘konghuwo yohepele.’ Sha faafana, otwa hala okutula moilonga omayele a nwefwa mo, oo taa ti: “Ou ehe na onghenda ota ka tokolwa nopehe na onghenda.” (Jak. 2:13) Ngeenge otwa kala tu shii kutya otwa pumbwa okufilwa onghenda shi fike peni, otashi ke tu linyengifa tu file vakwetu onghenda. Otwa hala unene okuulikila onghenda omunyoni, oo e livela ombedi nokwaalulilwa meongalo.

17. Ohamba David oya ulika ngahelipi onghenda?

¹⁷ MOmbiibeli omu na oihopaenenwa oyo tai tu kwafele tu ulike onghenda, ponhele yokuhakala ovananghenda. Pashihopaenenwa, diladila kohamba David. Oya li ya ulika oikando ihapu onghenda. Nonande Saul okwa li a hala oku mu dipaa, David okwa ulikila onghenda ohamba, oyo ya li ya nangekwa po kuKalunga, molwaashi ina kendabala oku i shunifila owii, ile e i monife oshiponga. — 1 Sam. 24:9-12, 18, 19.

18-19. Opeemhito dopavali dilipi David a li a dopa okuulika onghenda?

¹⁸ David ina kala alushe ha ulike onghenda. Pashihopaenenwa, eshi Nabal, omulumenhu oo ehe na ko na sha a popya monghedi ihe fi yefimaneko nokwa anya okupa David novalumenhu vaye oikulya, David okwa li a fula onya. Okwa li a tokola oku ka dipaa Nabal novaneumbo laye aveshe. Ashike omukulukadi waNabal, Abigail, oo a li omunanghenda nohe lididimike, okwa li a katuka onghatu diva a twaalele David oikulya. Osho osha kwafela David aha kale e na etimba lohonde. — 1 Sam. 25:9-22, 32-35.

¹⁹ Pomhito imwe vali, omuprofeti Natan okwa li a lombwela David kombinga yomulumenhu oshipuna, oo a nyeka ohepele odi yayo. David okwa li a handuka nai, ndele ta ti: “Oshili, ngaashi Omwene e nomwenyo, omulumenhu ou e shi ninga, e nokufya!” (2 Sam. 12:1-6) David okwa li e shii Omhango oyo Kalunga a li a pa oshiwana shaIsrael okupitila muMoses. Omunhu ngeenge a vaka odi, okwa li e na oku i futila po needi nhee. (Ex. 22:1) Ndele omolwashike a li a tokolela omulumenhu oo efyo? Okwa li a ninga etokolo meendelelo. Natan okwa li ashike a popya ehokololo olo, opo a kwafele David a ude ko kutya enyono la kwata moiti olo a ninga, oli dulife po nokuli pwaasho. Ashike Jehova okwa ulika kutya okwa fila neenghono David onghenda, shi dulife pwaayo David a li a pumbwa okuulikila omulumenhu, oo a vaka odi womefaneko laNatan. — 2 Sam. 12:7-13.

20. Oshike hatu lihongo moshihopaenenwa shaDavid?

²⁰ Eshi David a li a handuka neenghono, okwa li a tokola okudipaa Nabal novaneumbo laye aveshe. Lwanima, David okwa li natango a tokola meendelelo omulumenhu womefaneko laNatan, e mu tokolela efyo. Ashike David okwa li omulumenhu omunanghenda. Ndele mbela omolwashike moshihopaenenwa oshitivali a li a tokola nonyanya omulumenhu, oo wombudi? Otwa pumbwa okuuda ko oshikalimo. Pefimbo opo, David okwa li e na eliudo tali mu nyenyetele. Ngeenge omunhu oha tokola vakwao nonyanya, otashi ulike kutya oku na oupyakadi wopamhepo. Jesus okwa londwela ovashikuli vaye sha kwata moiti, a ti: “Inamu tokola vakweni, opo muha tokolwe; etokolo olo tamu va tokolifa olo tamu ka tokolifwa.” (Mat. 7:1, 2) Onghee hano, otwa pumbwa okuninga eenghendabala tu henuke okuninga omatokolo omeendelelo, nokukala “tu yadi efilonghenda,” ngaashi Kalunga ketu.

21-22. Omeenghedi dimwe dilipi tadi longo hatu dulu okuulika onghenda?

²¹ Onghenda oya kwatela mo shihapu shihe fi ashike omaliudo. Ovanhu, ovo ve na onghenda, ohava “katuka eenghatu,” opo va kwafele ovanhu vakwao. Atusheni natu kaleni hatu konenene ovo va pumbwa ekwafo moukwaneumbo wetu, meongalo nosho yo moshitukulwa. Ope na eenghedi dihapu omo hatu dulu okuulika onghenda. Mbela ope na umwe a pumbwa okuhekelekwa? Mbela ohatu dulu oku mu kwafela, tashi dulika nande oku mu pa oikulya, ile oku mu ningila oinima yonhumba? Mbela Omukriste, oo a alulilwa meongalo, okwa pumbwa kaume muwa, oo te mu tu omukumo? Ohatu dulu okuhekeleka vakwetu moku va lombwela onghundana iwa. Oyo oi li onghedi imwe yomeenghedi, odo da denga mbada, omo hatu dulu okufila onghenda keshe umwe. — Job 29:12, 13; Rom. 10:14, 15; Jak. 1:27.

²² Ngeenge otu shii kutya ope na vamwe ve li momhumbwe ya tya ngaho, ohatu ka konga eenghedi omo hatu dulu oku va fila onghenda. Ngeenge ohatu ulike onghenda, ohatu ka hafifa Tate yetu womeulu, oo e li Kalunga ‘e yadi efilonghenda linene.”