Tungulula ekwatafano loye naJehova

OMUDO keshe, eedi dihapu di na ondilo ohadi alulilwa meongalo lopaKriste. Diladila ashike nghee ‘meulu hamu kala ehafo linene,’ ngeenge umwe okwaalulilwa meongalo. (Luk. 15:7, 10) Ngeenge opo wa alulwa, kala u na oushili kutya Jesus, ovaengeli nosho yo Jehova ye mwene ohava kala va hafa, eshi wa ninga natango oshitukulwa sheongalo. Ashike otashi dulika u ka shakeneke omashongo, eshi to tungulula ekwatafano loye naJehova. Omashongo amwe omuo oelipi po, noshike tashi dulu oku ku kwafela?

OMASHONGO OO OELIPI PO?

Vahapu ohava kala tava kondjo nomaliudo mai konima eshi va alulilwa meongalo. Otashi dulika naave u kale u udite ngaashi ohamba David. Nokuli nokonima eshi ya diminwa po omanyono ayo, oya popya ya ti: “Owii wange omuhapu unene.” (Eps. 40:12; 65:3) Konima eshi omunhu a alukila kuJehova, otashi dulika a kale e udite ondjo, ile ohoni oule womido dihapu. Isabelle okwa kala a kondwa oule womido di dulife po 20.a Okwa ti: “Osha li shidjuu kwaame okudimina kutya Jehova okwa dimina nge po.” Ngeenge owa teka omukumo, otashi ka nghundipaleka natango ekwatafano loye naJehova. (Omayel. 24:10) Ino efa nande osho shi ku ningilwe.

Vamwe otashi dulika va kale va limbililwa kutya itava dulu okuninga oinima oyo ya pumbiwa, opo va tungulule ekwatafano lavo naJehova. Konima eshi Antoine a alulilwa meongalo, okwa ti: “Onda li nda dimbwa oinima ihapu oyo nda li nde lihonga, eshi nda li Ondombwedi.” Omolwomaliudo a tya ngaho, vamwe otashi dulika va kale tava ongaonga okukufa ombinga pauyadi momalipyakidilo opamhepo.

Natu tye nee ngeno omunhu oku na eumbo laye la hanaunwa po koshikungulu. Otashi dulika a kale a wililwa po, ngeenge ta diladila kefimbo nosho yo koilonga oyo ta ka longa, opo a dule oku li tungulula. Sha faafana, ngeenge ekwatafano loye naJehova ola li la teka po omolwenyono la kwata moiti, otashi dulika u kale u udite kutya otashi pula oilonga ihapu neenghono, opo u dule oku li tungulula vali. Ashike ope na osho tashi dulu oku ku kwafela.

Jehova ote tu shivi, ta ti: ‘Ileni tu ke lihokololeni notu yukifeni oinima.’ (Jes. 1:18) Owa longa nale noudiinini, eshi we lihokolola “nokuyukifa oinima.” Jehova oku ku hole, eshi wa ninga eenghendabala da tya ngaho. Diladila kwaashi: Molwaashi owa alukila kuJehova, ote ke ku longifa u li oshihopaenenwa osho tashi ulike kutya Ondiaboli oi na oipupulu. — Omayel. 27:11.

Eshi wa alukila kuJehova, owa ehena popepi elela naye nokwa udaneka kutya ota ka ehena popepi naave. (Jak. 4:8) Oshiwa neenghono kovanhu okumona kutya owa alukila meongalo. Ndele nande ongaho, owa pumbwa okuninga shihapu. Owa pumbwa okutwikila okupameka ohole yoye yokuhola Xo naKaume koye, Jehova. Ongahelipi to dulu okuninga ngaho?

LITULILA PO OMALALAKANO OO TO DULU OKUHANGA

Kendabala okulitulila po omalalakano e li pandjele. Otashi dulika natango to dimbuluka omahovelohongo, oo we lihonga nale kombinga yaJehova nosho yo omaudaneko aye e na sha nonakwiiwa. Ashike otashi dulika wa pumbwa okwiikilila onghedi yokukalamwenyo yOmukriste, naasho osha kwatela mo okuudifa onghundana iwa nosho yo okukala ho endafana pandjikilile novamwatate novamwameme. Diladila komalalakano taa shikula.

Kala ho popi naJehova pandjikilile. Xo womeulu oku udite ko kutya otashi ka kala shidjuu kwoove okupopya naye meilikano, omolwokukala u udite ondjo. (Rom. 8:26) Ndele ngeenge owa ‘diinine okwiilikana,’ Jehova ota ka mona kutya owa lenga neenghono ekwatafano leni naye. (Rom. 12:12) Andrej okwa ti: “Onda li ndi udite ondjo neenghono nonda fya ohoni. Ashike konima yeilikano keshe, ohandi kala ndi udite ndi li po xwepo. Ohandi kala nombili yopamadiladilo.” Ngeenge ku shii osho u na okupopya meilikano, konakona omailikano ohamba David konima eshi ye lidilulula, oo taa hangwa mEpsalme 51 nosho yo 65.

Konakona Ombiibeli pandjikilile. Osho otashi ke ku kwafela u kale u na eitavelo la kola, nohole yoye yokuhola Jehova otai ka enda tai kulu. (Eps. 19:7-11) Felipe, okwa ti: “Molwaashi kanda li nde litulila po elalakano lokulesha Ombiibeli paumwene noku i konakona, osha nghundipaleka nge nonda nyemateka Jehova. Molwaashi inandi hala vali okunyemateka Jehova, onde litulila po elalakano lokuninga ekonakono lopaumwene pandjikilile.” Naave oto dulu okuninga sha faafana. Ngeenge owa pumbwa ekwafo li na sha nanghee u na okuhoolola oshitukulwa tashi ku wapalele pekonakono loye lopaumwene, oto dulu okupula kaume koye, oo e na ekwatafano la kola naJehova e ku kwafele.

Tungulula ekwatafano loye novamwaxo. Vamwe, ovo va alulilwa meongalo, otashi dulika va kale tave lipula kutya ovamwaxe ove na etaleko lii li na sha navo. Larissa okwa ti: “Onda li nda fya ohoni neenghono. Onda li ndi udite nda kengelela eongalo. Onda kala ndi udite ngaho oule wefimbo lile.” Kala u shii kutya ovakulunhuongalo nosho yo ovo va pyokoka pamhepo ova halelela oku ku kwafela u tungulule ekwatafano loye naJehova. (Tala oshimhungu “Oshike ovakulunhuongalo tava dulu okuninga?”) Ova hafa neenghono adishe, eshi wa alukila meongalo nova hala u kale wa hafa. — Omayel. 17:17.

Oshike tashi ke ku kwafela u kale u na ekwatafano liwa neongalo? Kala ho kufa ombinga pauyadi mwaasho ovamwaxo tava ningi, ngaashi okukala alushe pokwoongala nokukufa ombinga moilonga yokuudifa. Osho ohashi kwafele ngahelipi? Felix okwa ti: “Eongalo ola li la teelela nodjuulufi ndi aluke. Onda li ndi udite ndi holike. Ola kwafela nge ndi mone kutya ondi li natango oshitukulwa sheongalo. Ondi udite yo nda diminwa po, naasho ohashi kwafele nge ndi pule komesho.” — Tala oshimhungu “Oshike to dulu okuninga?”

INO SHOLOLA!

Satana ota twikile okutula “omainda” mondjila yoye, opo a kendabale oku ku nghundipaleka uha dule okutungulula ekwatafano loye naJehova. (Luk. 4:13) Kala we lilongekida, mokupameka ekwatafano loye naJehova paife.

Jehova okwa udaneka shi na sha needi daye, a ti: “Odo da kana, ohandi ke di konga, naado da halakanifwa, Ame ohandi ke di alula ko, naado da teka, ohandi ke di manga, naado da utama, ohandi ke di pameka.” (Hes. 34:16) Jehova okwa kwafela vahapu va dule okutungulula ekwatafano lavo naye. Kala u na oushili kutya okwa hala oku ku kwafela u twikile okutungulula ekwatafano leni naye, li kale la pamenena.