“Diinina oshili”

1. Ongahelipi hatu mono ouwa, ngeenge hatu popi nghee twe uya ‘moshili’?

“OWE uya ngahelipi moshili?” Nopehe na omalimbililo, owa nyamukula epulo olo lwoikando ihapu. Oli li limwe lomomapulo oo ovaitaveli hava pula, opo va shiivafane. Otu hole okuuda nghee ovamwatate novamwameme va shiiva Jehova nokukala ve mu hole, nohatu kala twa hafa oku va lombwela nghee oshili ya fimana kufye. (Rom. 1:11) Omolweenghundafana odo, ohashi tu dimbulukifa tu mone kutya oshili oi na ondilo. Ohatu kala yo twa tokola toko ‘okudiinina oshili,’ sha hala okutya okukala mondjila oyo tai tu etele omanangeko noupuna aJehova nokukala e tu hokwa. — 3 Joh. 4.

2. Oshike hatu ka kundafana moshitukulwa eshi?

² Moshitukulwa eshi, ohatu ka kundafana omatomheno amwe kutya omolwashike tu hole oshili. Opo nee ohatu ka kundafana nghee hatu dulu okutwikila okuulika kutya otu hole oshali oyo i na ondilo. Oshitukulwa eshi otashi ke tu kwafela tu kulike olupandu letu li na sha naasho Jehova e tu ningila, eshi e tu nanena koshili. (Joh. 6:44) Otashi ke tu pameka yo tu kale twa halelela okuudifila vamwe oshili yOmbiibeli.

OMOLWASHIKE TU HOLE “OSHILI?”

3. Otu hole oshili omolwetomheno limwe la fimanenena lilipi?

³ Otu hole oshili omolwomatomheno mahapu. Etomheno limwe la fimanenena, ololo kutya otu hole Jehova Kalunga, Odjo yoshili. Eendjovo daye, Ombiibeli, inadi tu kwafela ashike tu mu shiive e li Omushiti weulu nedu nomunaenghono adishe, ndele ode tu kwafela yo tu mu shiive e li Tate womeulu omunahole, oo he tu file oshisho pahole. (1 Pet. 5:7) Otu shii kutya Kalunga ketu ‘omunefilonghenda, omunanghenda, omunanheni, nomunene mouwanghenda nomoudiinini.’ (Ex. 34:6) Jehova oku hole ouyuki. (Jes. 61:8) Ohashi mu ehameke ngeenge te tu tale hatu mono oixuna noha kala e lilongekida nokwa halelela oku ka xulifa po okumona oixuna akushe peufwafimbo laye la wapala. (Jer. 29:11) Osho kashi tunhula tuu! Naalo oli li etomheno limwe lomomatomheno oo kutya omolwashike tu hole Jehova neenghono.

4-5. Omolwashike omuyapostoli Paulus a yelekanifa eteelelo letu nekanghamifo?

⁴ Otu hole oshili omolwetomheno likwao lilipi? Oshili ohai tu etele ouwa muhapu. Diladila koshihopaenenwa eshi. Oshili yOmbiibeli oya kwatela mo eteelelo letu li na sha nonakwiiwa. Opo tu mone kutya eteelelo ola fimanenena, omuyapostoli Paulus okwa ti: “Otu na eteelelo olo li li ngaashi ekanghamifo leemwenyo detu olo tali tu kwafele tu kale twa pama notuhe na omalimbililo.” (Heb. 6:19) Ngaashi ashike ekanghamifo hali kwafele ombautu iha twalwaatwalwe, eteelelo ohali tu kwafele tu kale twa ngungumana, ngeenge twa taalela omayeleko monghalamwenyo.

⁵ Pomhito oyo, Paulus okwa li ta popi shi na sha neteelelo lomeulu olo tali hafelwa kOvakriste ovavaekwa. Ashike eendjovo odo, otadi dulu yo okuyukifwa kOvakriste ovo ve na eteelelo loku ka kala nomwenyo fiyo alushe moparadisa kombada yedu. (Joh. 3:16) Onghee hano, eshi twe lihonga shi na sha neteelelo loku ka kala nomwenyo fiyo alushe kombada yedu, oshe tu ningifa tu kale tu na onghalamwenyo i na eityo.

6-7. Ongahelipi Yvonne a mona ouwa, eshi e lihonga oshili kombinga yonakwiiwa?

⁶ Natu ka kundafaneni oshihopaenenwa shomumwameme Yvonne. Ina kulila moshili, ashike eshi a li okaana okwa li ha tila efyo. Ota dimbuluka eshi a li a lesha oshitukulwa osho ehe na efiku a dimbwe nandenande. Okwa ti: “Efiku limwe itapa ka kala efiku lomongula. Eendjovo odo oda li hadi ningifa nge ndiha kofe oufiku handi diladila kombinga yonakwiiwa. Onda li handi lipula kutya omolwashike hatu kala ko ashike omido dinini nokufya. Kanda li ndi udite ko kutya omolwashike tu li kombada yedu nokanda li nda hala okufya.”

⁷ Lwanima, eshi Yvonne a li omunyasha okwa ka shakena nEendombwedi daJehova. Okwa ti: “Onda li nda hovela okwiitavela kutya ohandi dulu okukala neteelelo li na sha nokukala nomwenyo fiyo alushe mOparadisa kombada yedu.” Ongahelipi omumwameme a mona ouwa, eshi e lihonga oshili? Okwa ti: “Ihandi papuduka vali meemhofi handi lipula unene kombinga yonakwiiwa, ile yefyo.” Osho otashi ulike kutya Yvonne oku hole oshili yOmbiibeli noha hafele neenghono okulombwela ovanhu vakwao kombinga yeteelelo laye lonakwiiwa. — 1 Tim. 4:16.

8-9. (a) Mefaneko limwe laJesus, omulumenhu umwe okwa li a tala ko ngahelipi emona olo e litwa? (b) Oshili owe i tala ko i na ongushu i fike peni?

⁸ Oshili yOmbiibeli oya kwatela mo onghundana iwa i na sha nOuhamba waKalunga. Jesus okwa yelekanifa oshili i na sha nOuhamba waKalunga nemona la holekwa. Ngaashi sha popiwa muMateus 13:44, Jesus okwa ti: “Ouhamba womeulu owa fa emona la holekwa mepya, olo omulumenhu e li mona, ndele te li holeke; ndele molwaashi okwa tunhukwa, okwa ya nokwa landifa po oinima aishe oyo a li e na, ndele ta lande po epya olo.” Didilika kutya omulumenhu oo ka li ta kongo emona. Ashike eshi e li litwa, okwa ninga omaliyambo manene, opo e li mone. Okwa li a landifa po keshe osho a li e na. Omolwashike mbela? Omolwaashi okwa li e shii kutya emona olo oli na ongushu inene. Ola li li na ongushu inene li dule oinima aishe oyo a yandja po.

⁹ Mbela naave osho u uditile oshili ngaho? Nopehe na omalimbililo, osho. Otu shi shii kutya mounyuni ou kamu na osho tashi dulu okuyelekwa nehafo olo hatu mono paife, eshi hatu longele Jehova tu na eteelelo loku ka kala nomwenyo waalushe monakwiiwa koshi yOuhamba waKalunga. Oufembanghenda, oo hatu hafele u na sha nekwatafano lopofingo naJehova, itau dulu okuyelekwa nomaliyambo oo hatu ningi paife. Ohatu mono ehafo linene, ngeenge hatu mu ‘hafifa moinima aishe.’ — Kol. 1:10.   

10-11. Oshike she linyengifa Michael a ninge omalunduluko manene monghalamwenyo yaye?

¹⁰ Vahapu vomufye, otwa ninga omaliyambo a kwata moiti, opo tu kale twa hokiwa kuJehova. Vamwe ova efa po omaifano a denga mbada oo e li mounyuni. Vamwe ova efa po okulalakanena oupuna. Natango, vamwe ova ninga omalunduluko monghalamwenyo yavo filufilu, eshi ve lihonga kombinga yaJehova. Naasho osho sha li sha ningilwa Michael. Ina kulila moshili. Eshi a li omunyasha, okwa li a deulwa okulyata okarate. Okwa ti: “Osha li sha fimanenena kwaame okukaleka olutu lange monghalo iwa. Omafimbo amwe, onda li handi kala ndi udite kutya nghi na fiku ndi findwe.” Ashike eshi Michael a hovela okukonakona Ombiibeli, okwe lihonga nghee Jehova ha tale ko elongifo leenghono. (Eps. 11:5) Michael okwa popya shi na sha novalihomboli vEendombwedi ovo va konakona naye, a ti: “Kava li va lombwela nge ndi efe po oudano wokarate, ashike ova li va twikila okuhonga nge oshili yOmbiibeli.”

¹¹ Eshi ngoo Michael a enda te lihongo kombinga yaJehova, osho ngoo ohole yaye yoku mu hola ya enda tai kulu. Osho sha li she mu kuma unene, onghenda yaJehova oyo ha ulikile ovalongeli vaye. Mokweendela ko kwefimbo, Michael okwa li a mona kutya okwa pumbwa okuninga elunduluko linene. Okwa ti: “Onda li ndi shi shii kutya okweefa po okarate otashi ka kala oshinima shidjuu osho inandi ninga nande onale. Ashike onda li yo ndi shii kutya otashi ka hafifa Jehova nonda li nda tomhwa kutya okulongela Jehova osho eliyambo linene.” Michael okwa li a lenga oshili i na ondilo oyo a mona, nolupandu la tya ngaho, ole mu linyengifa a ninge omalunduluko manene monghalamwenyo yaye. — Jak. 1:25.

12-13. Oshili yOmbiibeli oya kwafela ngahelipi Mayli?

¹² Ombiibeli opo i divilike oshili nghee i na ondilo, oya yelekanifa oshili nouyelele wolamba ya tema momulaulu. (Eps. 119:105; Ef. 5:8) Mayli, wokoAzerbaijan, okwa pandula neenghono ekwafo olo a mona mEendjovo daKalunga. Okwa kulila moukwaneumbo wa tukauka palongelokalunga. Xe okwa li Omumoslema, naina Omujuda. Okwa ti: “Nonande kanda li nda limbililwa ngeenge Kalunga oko e li, onda li ndi na omapulo mahapu. Onde lipula nda ti: ‘Omolwashike Kalunga a shitila ovanhu, nomolwashike ovanhu vamwe hava mono oixuna monghalamwenyo yavo aishe, nolwanima otava ka hepekwa vali moheli fiyo alushe?’ Molwaashi ovanhu ohava popi kutya keshe oshinima tashi ningwa oshi li ehalo laKalunga, onda li handi lipula kutya, ‘Mbela Kalunga oha pangele ovanhu, noha kala a hafa, ngeenge te va tale tava mono oixuna?’”

¹³ Mayli okwa twikila okukonga omanyamukulo omapulo aye. Mokweendelako kwefimbo, okwa li a tambula ko ekonakonombiibeli nokwa ninga Ondombwedi yaJehova. Okwa ti: “Omanyamukulo opaMbiibeli taa tomho okwa kwafela nge ndi kale nda hafa neenghono. Eyelifo lopandunge, olo nda mona mEendjovo daKalunga, ola etela nge ombili inene.” Ngaashi Mayli, atusheni ohatu dulu okutanga Jehova, oo ‘e tu ifana mo momilaulu tu ye mouyelele waye wa twa.’ — 1 Pet. 2:9.

14. Ongahelipi hatu dulu okuhapupalifa ohole yetu yokuhola oshili? (Tala yo oshimhungu “Oinima ikwao oyo tai dulu okuyelekanifwa noshili yOmbiibeli.”)

¹⁴ Oyo oi li ashike oihopaenenwa inini oyo tai ulike nghee oshili ya fimanenena. Oto dulu okudiladila kuikwao ihapu. Omolwashike ito shi ningi elalakano pekonakono loye lopaumwene, u konge vali omatomheno makwao mahapu, kutya omolwashike tu na okukala tu hole oshili? Ngeenge otwa kala tu hole oshili neenghono, otashi ke tu linyengifa tu konge eenghedi tu ulike kutya otu i hole.

NGHEE HATU DULU OKUULIKA KUTYA OTU HOLE OSHILI

15. Omonghedi imwe ilipi omo hatu dulu okuulika kutya otu hole oshili?

¹⁵ Ohatu dulu okuulika kutya otu hole oshili, mokukala hatu konakona Ombiibeli pandjikilile nosho yo oishangomwa oyo ya kanghamena kuyo. Osho sha fimanenena osho sho kutya, kashi na nee mbudi kutya otwa kala moshili oule wefimbo li fike peni, ohatu dulu okulihonga shihapu. Oshungonangelo yotetetete oya tile: “Oshili oya fa okangala kawa ka dingililwa koimbodi ihapu. Opo u ka mone, ou na okukala to talaatala. . . . Ngeenge owe ke litu poima, ou na okupetama u ka toole po. Ino kala ashike wa wanenwa kokangala koshili kamwe. . . . Kala nokukonga nokwoongela oungala vahapu va tya ngaho.” Okukonakona otashi pula oilonga youdiinini, ashike ngeenge otwa ningi eenghendabala ohatu ka pondola.    

16. Onghedi ilipi po hai pondola unene? (Omayeletumbulo 2:4-6)

¹⁶ Haatushe tu hole okulesha nokukonakona. Ashike Jehova ote tu shivi tu ‘konge’ notu “shitilile” eudeko lomoule li na sha noshili. (Lesha Omayeletumbulo 2:4-6.) Ngeenge otwa ningi eenghendabala da tya ngaho, ohatu ka mona ouwa. Corey okwa popya shi na sha nekonakonombiibeli laye lopaumwene a ti kutya oha yandje elitulemo kovelishe imwe poshikando. Okwa ti: “Ohandi lesha omashangelo opedu, omishangwa da pambafana nohandi ningi yo omapekapeko a wedwa po. . . . Onghedi oyo oya kwafela nge ndi lihonge oinima ihapu.” Kashi na nee mbudi kutya ohatu longifa onghedi oyo, ile oimwe vali, atusheni ohatu dulu okuulika olupandu letu li na sha noshili, mokukala hatu longifa efimbo nosho yo eenghono detu tu i konakone. — Eps. 1:1-3.

17. Okukala metwokumwe noshili osha hala okutya ngahelipi? (Jakob 1:25)

¹⁷ Oshoshili kutya otu shi shii kutya inashi wana ashike okukonakona oshili. Opo tu mone ouwa, otu na okukala metwokumwe noshili, sha hala okutya okutula moilonga osho twe lihonga. Ngeenge otwa ningi ngaho, opo ashike oshili tai ke tu etela ehafo. (Lesha Jakob 1:25.) Ongahelipi hatu dulu okuulika kutya ohatu katuka metwokumwe noshili? Omumwatate umwe okwa popya kutya ohe likonakona paumwene, opo a dule okumona kutya openi te shi endifa nawa naapa a pumbwa okuxwepopala. Omuyapostoli Paulus okwe shi popya ngaha: “Ngaashi twa kala nokuninga exumokomesho, natango natu twikileni okweenda mondjila imwe.” — Fil. 3:16.

18. Omolwashike tu na okuninga eenghendabala tu “ende moshili”?

¹⁸ Diladila ashike kouwa oo hau di mokuninga eenghendabala tu ‘diinine oshili.’ Itatu ka xwepopaleka ashike onghedi yetu yokukalamwenyo, ndele ohatu ka hafifa yo Jehova novaitaveli vakwetu. (Omayel. 27:11; 3 Joh. 4) Otu na lela omatomheno a denga mbada, oo tae tu linyengifa tu kale tu hole oshili nokukala metwokumwe nayo.