1 | Eilikano “Mu shiivifileni oisho yeni aishe”

OMBIIBELI OYA TI: “Shiivifileni [Kalunga] oisho yeni aishe, molwaashi oku na ko nasha nanye.” — 1 PETRUS 5:7.

Osho osha hala okutya ngahelipi?

Jehova Kalunga okwe tu shiiva tu mu lombwele kombinga yomitengi detu odo detu wilila po momadiladilo nosho yo momitima detu. (Epsalme 55:22) Ohatu dulu okwiilikana kombinga youpyakadi keshe, kutya nee ou nini, ile owa kula. Ngeenge osha fimana kufye, osha fimana yo kuJehova. Okwiilikana kuye oshi li onghatu ya fimana, molwaashi ohaku eta ombili yopamadiladilo. — Ovafilippi 4:6, 7.

Nghee osho tashi dulu okukwafela

Ngeenge tu na oupyakadi wopamadiladilo, otashi dulika tu kale tu udite tu li ofye atuke. Ovanhu haalushe hava kala ve udite ko onghalo oyo hatu piti muyo. (Omayeletumbulo 14:10) Ashike ngeenge otwa lombwele Kalunga nghee tu udite, ota ka pwilikina kufye nota ka uda ko onghalo yetu. Jehova oku tu wete noku wete omaupyakadi oo hatu piti muo, nokwa hala tu mu lombwele keshe shimwe osho hatu lipula nasho. — 2 Omafimbo 6:29, 30.

Okupopya naJehova meilikano ohaku pameke elineekelo letu kutya oku na ko nasha nafye. Ohatu dulu okukala tu udite ngaashi omupsalme oo alikana, a ti: “Wa tala oudjuu wange, nowa dimbulukwa omatilifo omwenyo wange.” (Epsalme 31:7) Okukala tu shii kutya Jehova oku wete eenghalo odo hatu piti mudo, otaku dulu oku tu kwafela tu twikile okulididimikila eenghalo didjuu. Iha mono ashike eenghalo odo hatu piti mudo, ndele ohe tu kwafele. Oku udite ko eenghalo odo hatu piti mudo, nohe tu kwafele tu mone ehekeleko nosho yo etwomukumo mOmbiibeli.

Nghee Ombiibeli tai dulu okukwafela Julian

Nghee oshisho sha kuma nge

“Ondi na oshisho nosho yo omukifi wo-obsessive-compulsive. Ohandi kwatwa koshisho pefimbo opo inandi shi teelela. Efimbo limwe ohandi kala ndi li nawa, nopefimbo limwe ohandi kala ndi na oshisho sha pitilila nopehe na etomheno la sha. Oshisho ohashi kwata nge unene ngeenge ndi li mokati kovanhu. Ohandi kala handi lipula kutya otava diladila shike kombinga yange.

“Ookaume kange ovo ve shii kutya ondi na oshisho ohava yambidida nge. Omafimbo amwe ohava popi oinima oyo itai kwafele nge. Ashike ohandi va pandula eshi hava kwafele nge.

“Omafimbo amwe ohandi mono shidjuu okwiilikana omolwoshisho nosho yo omukifi wo-obsessive-compulsive. Ohashi pula eenghendabala, opo ndi yandje elitulemo nokupopya naJehova meilikano. Ohandi diladila oinima ihapu poshikando, naluhapu ohandi kala nda ngwangwana. Ohashi kala shidjuu okulombwela Jehova omaliudo ange, ngeenge nda nyengwa okupangela omadiladilo ange.”

Nghee Ombiibeli ya kwafela nge

“Onde lihonga, eshi nda konakona Ombiibeli, kutya omailikano etu inaa pumbwa okukala male, ile a kitakana, opo a kale a hokiwa kuKalunga. Omafimbo amwe, ngeenge kandi na oitya nomatumbulo, ohandi ilikana ashike handi ti: ‘Jehova alikana kwafele nge.’ Nohandi mono nokuli kutya Jehova okwa uda nge nokwa pange osho nda pumbwa pomhito oyo. Kakele keilikano, onda mona ekwafo lopaunamiti. Onda hafa neenghono, eshi nda mona ekwafo keedjo adishe odo. Onghalo yange oi li xwepo paife. Nonande ohashi pula eenghendabala okupula Tate yange womeulu a kwafele nge, ohandi shi ningi, molwaashi ondi shii kutya oku hole nge nokwa hala okukwafela nge.”