2 | ‘Okuhekelekwa kOmishangwa’

OMBIIBELI OYA TI: “Oinima aishe oyo ya shangwa nale, oya shangwa omolwehongo letu opo tu kale tu na eteelelo hali di melididimiko nomokuhekelekwa kOmishangwa.” — OVAROMA 15:4.

Osho osha hala okutya ngahelipi?

MOmbiibeli omu na omishangwa tadi hekeleke odo tadi tu pameke noku tu kwafela tu lididimike, eshi hatu ungaunga nomadiladilo mai. Ombiibeli oye tu pa yo eteelelo kutya ouyahame wopamaliudo mafiku otau ka xulifwa po.

Nghee osho tashi dulu okukwafela

Atusheni ohatu kondjo nomaliudo ouyahame omafimbo amwe, ashike ovo ve na epolimano, ile oisho otashi dulika va kale ve na ouyahame efimbo keshe. Ombiibeli otai dulu okukwafela ngahelipi?

MOmbiibeli omu na omishangwa diwa odo tadi dulu okupingena po omadiladilo mai. (Ovafilippi 4:8) Otai dulu shili oku tu hekeleka noku tu ngungumaneka, opo tu dule okupangela omaliudo etu. — Epsalme 94:18, 19.
Ombiibeli otai dulu oku tu kwafela tuha kale hatu diladila kutya katu na oshilonga. — Lukas 12:6, 7.
Omishangwa dihapu mOmbiibeli ode tu shilipaleka kutya katu li ofye atuke nosho yo kutya Kalunga, Omushiti wetu, oku udite ko omaliudo etu. — Epsalme 34:18; 1 Johannes 3:19, 20.
Ombiibeli oya udaneka kutya Kalunga ota ka xulifa po ouyahame wetu aushe. (Jesaja 65:17; Ehololo 21:4) Ngeenge hatu kondjo nomadiladilo nosho yo omaliudo mai, ohatu mono kutya eudaneko olo ohali tu pe eenghono, opo tu lididimike.

Nghee Ombiibeli tai dulu okukwafela Jessica

Nghee epolimano la kuma nge

“Eshi nda li ndi na omido 25, onda li nda kwatwa koupyakadi wopamadiladilo nonda monika omukifi wepolimano. Onda li handi diladila oinima iyahameka oyo nda ningilwa monakudiwa. Eendokotola onda kwafela nge ndi ude ko kutya epolimano lange ola etifwa komadiladilo mai oinima oyo nda ningilwa monghalamwenyo. Kakele kouhaku wopaunamiti, onda li vali nda pumbwa okuxungwa omwenyo, opo shi kwafele nge ndi mone nghee handi dulu okweefa po omadiladilo mai.”

Nghee Ombiibeli ya kwafela nge

“Eshi nda li nda polimana neenghono, onda li handi kwatwa koumbada, koshisho sha pitilila nokuhakofa nawa. Luhapu oufiku onda li handi kala ndi udite nda wililwa po komadiladilo oo itadi dulu okupangela. Ngaashi Epsalme 94:19 la popya, Kalunga ota dulu oku tu hekeleka noku tu ngungumaneka, ngeenge twa wililwa po koisho. Onghee onda li handi tula popepi nombete yange Ombiibeli nosho yo okambo ke na omishangwa detwomukumo. Ngeenge nda li ndihe na eemhofi, ohandi lesha eevelishe dimwe mOmbiibeli, kungaho ohandi efa omadiladilo aKalunga a hekeleke nge.

“Ombiibeli oye tu ladipika tu henuke omadiladilo oo e li omhinge naasho tu shi kombinga yaKalunga. Nale onda li nda tomhwa kutya kandi na oshilonga nokape na oo e hole nge. Ashike onde lihonga kutya osho nda li nda itavela oshi li omhinge nOmbiibeli, oyo ya ti kutya Kalunga oku li Tate omunahole nomunalukeno, oo e na ko nasha nafye pauhandimwe. Ponhele yokweefa omaliudo ange a pangele nge, aame handi a pangele. Onde lihonga okukala handi litale ko ngaashi Kalunga ha tale nge ko. Oyo oya li onghatu ya fimana, oyo ya kwafela nge ndi efe po etaleko lii li na sha naame mwene.

“Onda teelela nodjuulufi, eshi omauyahame aeshe nomadiladilo mai itaa ka kala po vali. Molwaashi ondi shi shii kutya oudu wopamadiladilo itau ka kala po vali, ohashi pameke nge ndi lididimikile omangambeko oo ndi na paife nondi na eteelelo litunhula olo kutya monakwiiwa itandi ka kala vali nda polimana.”