Nghee to dulu okukwafela ovo ve na oudu wopamadiladilo

Osho osha hala okutya ngahelipi?

Ohatu tu dulu okuwililwa po, ngeenge kaume ketu ta vele pamadiladilo. Ashike ohatu dulu okuulika kutya otu na ko nasha mokukwafela kaume ketu e lididimikile oupyakadi waye wopamadiladilo. Ngahelipi mbela?

Nghee osho tashi dulu okukwafela

‘Kala ho endelela okupwilikina.’ — JAKOB 1:19.

Onghedi imwe ya denga mbada omo to dulu okukwafela kaume koye omokupwilikina kuye eshi ta popi. Ino pumbwa okukala u udite kutya owa pumbwa okunyamukula keshe osho ta popi. Mu lombwela kutya oto pwilikine kuye nosho yo kutya ou na ko nasha naye. Kendabala okuuda ko omaliudo aye, ndele ino mu tokola. Dimbuluka kutya ota dulu okupopya oinima oyo i na diladila note ke lipa oushima lwanima. — Job 6:2, 3.

‘Mu hekeleka.’ — 1 OVATESSALONIKA 5:14.

Kaume koye ota dulu okukala e na oshisho, ile e udite ehe na oshilonga. Ngeenge owe mu shilipaleka kutya ou na ko nasha naye, otashi ke mu hekeleka noku mu twa omukumo, nonande ku shii naanaa kutya popya shike.

“Kaume oku na ohole alushe.” — OMAYELETUMBULO 17:17.

Yandja ekwafo tali wapalele. Ponhele yokudiladila kutya oto mu kwafele ngahelipi, mu pula kutya ekwafo lilipi a pumbwa. Ngeenge oshidjuu kuye okupopya kutya okwa pumbwa ekwafo lilipi, kendabala okuninga omaetepo oshinima osho tamu dulu okuninga pamwe, ngaashi oku ka enda. Ile u mu kwafele nokulanda oipumbiwa yaye, oku mu wapalekela ko, ile okuninga oshinima shimwe vali. — Ovagalati 6:2.

‘Kala u na onheni.’ — 1 OVATESSALONIKA 5:14.

Kaume koye haalushe ta kala a manguluka okupopya. Mu shilipaleka kutya oto ka pwilikina kuye, ngeenge okwa hala okupopya sha. Omolwouvela waye, otashi dulika a popye sha, ile a ninge oinima oyo tai ku yahameke. Ota dulu okukangheka eemhangela odo mwa ninga, ile a kale e udite nai efiku olo. Kala u na elididimiko nokuuda ko onghalo yaye, eshi to mu yambidida. — Omayeletumbulo 18:24.

Okuyambidida kaume koye, otashi dulu oku mu kwafela

“Ohandi shilipaleke alushe kutya ondi li kaume oo ta dulu okupopya naye efimbo keshe. Nokuli nonande omafimbo amwe ohandi nyengwa oku mu kwafela, ohandi shilipaleke kutya onda pwilikina kuye. Omafimbo amwe oha kala ashike a pumbwa omunhu oo ta pwilikine, naasho ohashi mu ningifa a kale e udite nawa.” — Farrah,a oo e na kaume kaye e na omukifi wokulya, oshisho nosho yo epolimano.

“Kaume kange umwe oku na onghenda nohatu nge omukumo. Okwa shiva nge keumbo lavo, ndele hatu li oikulya iwa. Okwa ulikila nge ohole, naasho osha li shipu oku mu hololela omaliudo ange. Osho osha li lela sha twa nge omukumo!” — Ha-eun, oo e na omukifi wepolimano.

“Elididimiko ola fimana unene. Ngeenge omukulukadi wange a udifa nge nai, ohandi dimbuluka kutya haye mwene, ndele omukifi tau mu ningifa. Osho ohashi kwafele nge ndi henuke okuhanduka nohandi mu kenukile.” — Jacob, oo e na omukulukadi e na omukifi wepolimano.

“Omukulukadi wange okwa kala ha yambidida nge nokuhekeleka kange. Ngeenge nda wililwa po neenghono koisho, iha fininike nge ndi ninge oshinima osho inandi hala okuninga. Omafimbo amwe iha ningi nokuli noinima oyo ha kala a hala okuninga. Ondi mu hole neenghono shaashi oku na omhepo yeliyambo noha yandje.” — Enrico, oo e na omukifi woshisho.