4 | Ombiibeli ohai yandje omayele taa longo

Osho osha hala okutya ngahelipi?

Nonande Ombiibeli kai fi embo lopaunamiti, ohai yandje omayele taa hongo. Omayele oo otaa dulu okukwafela omunhu oo e na oudu wopamadiladilo. Konakona oihopaenenwa tai shikula.

Nghee osho tashi dulu okukwafela

“Ovanhu ovo ve na oukolele inava pumbwa omuhakuli, ndele ovovo ashike tava vele.” — MATEUS 9:12.

Ombiibeli otai tu ladipike kutya otwa pumbwa okukonga ekwafo lopaunamiti. Ovanhu vahapu ovo ve na oudu wopamadiladilo ova kwafelwa, eshi va mona ouyelele u li mondjila u na sha noupyakadi wavo nova ya kundokotola.

‘Edeulo lopalutu oliwa.’ — 1 TIMOTEUS 4:8.

Okuninga oinima oyo tai ku kwafele palutu, otaku dulu oku ku kwafela pamadiladilo. Oinima oyo oya kwatela mo okuninga omadeulo pandjikilile, okulya oikulya i na oukolele nokukofa sha wana.

“Omutima u nehafo tau kwafa mokuveluka, ndelenee omhepo yoluhodi tai kukutike omakipa.” — OMAYELETUMBULO 17:22.

Okulesha omishangwa tadi tu omukumo nokulitulila po omalalakano oo to dulu okuhanga otaku dulu oku ku kwafela u kale wa hafa. Ngeenge owa kala to yandje elitulemo koinima ei iwa monghalamwenyo yoye nokwiitavela kutya oinima otai ka xwepopala monakwiiwa, otashi ke ku kwafela u ungaunge noupyakadi woye wopamadiladilo.

“Ounongo tau kala pwaava ve lininipika.” — OMAYELETUMBULO 11:2.

Otashi dulika u mone kutya ito dulu okuninga oinima aishe oyo wa hala okuninga ove mwene, onghee tambula ko nehalo liwa ekwafo lavamwe. Ookaume nosho yo ovapambele voye otashi dulika va kale va hala oku ku kwafela, ndele otashi dulika vehe shii kutya nava ninge shike. Va lombwela kutya ekwafo lilipi wa pumbwa unene. Ino kala wa teelela ve ku longele shihapu, ashike kala alushe u na olupandu.

Nghee omayele Ombiibeli taa kwafele ovo ve na oudu wopamadiladilo

“Onda li nda mona kutya ope na sha sha puka mwaame, onghee onda ka mona ndokotola. Okwa li a dula okumona oudu oo ndi na. Osho osha kwafela nge ndi tambule ko onghalo yange nonda mona ouhaku oo tau kwafele nge.” —- Nicole,a oo e na omukifi wepolimano bipolar.

“Onda mona kutya okulesha Ombiibeli pandjikilile nomukulukadi wange osha kwafela nge ndi hovele efiku keshe netaleko liwa. Nomafiku amwe ngeenge handi kondjo noudu wange, ohapa kala ovelishe yonhumba oyo tai hekeleke nge.” — Peter, oo e na omukifi wepolimano.

“Osha li shidjuu okulombwela vamwe kombinga yomukifi wange, molwaashi onda li nda fya ohoni. Ashike kaume kange kopofingo okwa li a pwilikina nge nelitulemo nokwa kendabala okuuda ko onghalo yange. Okwa li lela a kwafela nge ndi kale ndi udite xwepo nokukala ndi shii kutya kandi li aame adike.” — Ji-yoo, oo e na oupyakadi womukifi wokulya (eating disorder).

“Ombiibeli oya kwafela nge ndi kale ndi na ondjele noilonga nokufuda po sha wana. Ounongo wayo owa kwafela nge ndi ungaunga noupyakadi wopamaliudo oo ndi na.” — Timothy, oo e na omukifi wo-obsessive-compulsive.