Lineekela “Omutokoli wedu alishe” Omunanghenda!

1. Jehova okwa honga Abraham oshilihongomwa shilipi tashi hekeleke?

JEHOVA okwa li a lombwela Abraham okupitila momweengeli kutya ota ka hanauna po Sodom naGomorra. Eenghundafana odo Abraham kali e di dimbwa. Omulumenhu oo omudiinini okwa li a uda nai. Okwa pula, a ti: “Mbela oto ka hanauna po ovayuki pamwe novakolokoshi? . . . Mbela Omutokoli wedu alishe ita longo osho sha yuka?” Jehova okwa li a honga kaume kaye nelididimiko oshilihongomwa, osho nafye hatu mono mo ouwa notashi tu hekeleke: Kalunga ke na fiku a hanaune po ovayuki. — Gen. 18:23-33.

2. Oshike she tu shilipaleka kutya, ngeenge Jehova ta tokola ovanhu, ohe shi ningi pauyuki nononghenda?

² Ongahelipi hatu dulu okukala noushili kutya, ngeenge Jehova ta tokola ovanhu, ohe shi ningi pauyuki nononghenda? Omolwaashi otu shii kutya ‘Jehova oha tale momitima’ dovanhu. (1 Sam. 16:7) Oku shii nokuli “omutima womunhu keshe.” (1 Eeh. 8:39; 1 Omaf. 28:9) Osho oshikumwifi shili. Omatokolo aJehova itatu dulu oku a uda ko filufilu. Omuyapostoli Paulus okwa popya kombinga yaJehova Kalunga, a ti: “Kape na oo ta dulu okuuda ko omatokolo” aye. — Rom. 11:33.

3-4. Omapulo amwe elipi tashi dulika tu lipule omafimbo amwe, noshike hatu ka kundafana moshitukulwa eshi? (Johannes 5:​28, 29)

³ Ashike nokuli nonande otu shii kutya Jehova oha longo alushe osho sha yuka, otashi dulika tu kale tu na omapulo a faafana naao aAbraham. Otashi dulika tu lipule kutya: ‘Mbela ovanhu ovo va li va hanaunwa po muSodom naGomorra, otava ka kala tuu vali nomwenyo? Mbela vamwe vomuvo, otashi dulika ngoo va ka kwatelwe ‘menyumuko lovalunde?’ — Oil. 24:15.

⁴ Natu ka taleni kutya otu na eudeko lilipi li na sha nenyumuko. Efimbo opo la di ko, otwa li twa mona eudeko la pepalekwa li na sha ‘nokunyumukila omwenyo’ nosho yo ‘okunyumukila etokolo.’a (Lesha Johannes 5:​28, 29.) Eudeko olo ola etifa po omalunduluko a wedwa po, naasho ohatu ke shi kundafana moshitukulwa eshi, naashi tashi shikula ko. Molwaashi Jehova oha tokola pauyuki, tete ohatu ka kundafana osho tuhe shii kombinga yaasho, opo nee ohatu ka kundafana osho tu shii.

OSHO TUHE SHII

5. Oishangomwa yetu oya li ya popya shike monakudiwa, shi na sha novanhu ovo Jehova a hanauna po muSodom naGomorra?

⁵ Monakudiwa, moishangomwa yetu omwa li mwa holoka epulo olo kutya, oshike tashi ka ningilwa ovanhu ovo Jehova a tokola ve li ovalunde? Otwa li twa popya kutya ovanhu ovo va hanaunwa po kuJehova, ngaashi ovo va li muSodom naGomorra, itava ka nyumunwa. Ashike eshi omupiya omudiinini a konakona noukeka oshinima osho, pamwe neilikano, okwa mona kutya ka tu na oushili moshinima osho?

6. Oihopaenenwa imwe ilipi yavamwe ovo va li va tokolwa kuJehova, noshike tuhe shii?

⁶ Natu ka taleni koihopaenenwa imwe yopaMbiibeli. Ope na omahokololo mahapu mOmbiibeli, oo e tu lombwela kombinga yetokolo laJehova lovalunde. Pashihopaenenwa, pefimbo lEyelu, Jehova okwa li a hanauna po ovanhu aveshe, kakele kaNoa noukwaneumbo waye. Natango okwa li a longifa Ovaisrael va hanaune po oiwana iheyali yovanhu ovo va li ve li mEdu lEudaneko. Okwa li yo a longifa omweengeli umwe a dipae ovakwaita vaAsiria 185 000 moufiku umwe. (Gen. 7:23; Deut. 7:​1-3; Jes. 37:​36, 37) Moiningwanima aishe oyo, mbela Ombiibeli oya popya kutya Jehova okwa tokola kutya ovanhu va tya ngaho ite ke va nyumuna nandenande? Ahawe. Omolwashike hatu tile ngaho?

7. Oshike tuhe shii kombinga yovanhu ovo va li va hanaunwa po pEyelu nosho yo ovo va li va hanaunwa po, eshi Ovaisrael va li va kwata ko edu lOvakaanan? (Tala kombada yoshifo.)

⁷ Moihopaenenwa oyo ya tumbulwa metetekelo, katu shii nghee Jehova a tokola ovanhu ovo pauhandimwe. Katu shii yo, ngeenge ovanhu ovo ova li va mona omhito yokulihonga kombinga yaJehova nokulidilulula. Ngeenge Ombiibeli tai popi shi na sha nEyelu, ohai popi kutya Noa okwa li “omuudifi wouyuki.” (2 Pet. 2:5) Ashike inai popya kutya, eshi Noa a li ta tungu ongulu yomomeva, okwa li a kendabala okuudifila keshe umwe kombada yedu. Sha faafana, shi na sha naasho sha li sha ningilwa Ovakaanan, katu shii ngeenge ovakolokoshi aveshe ova li ve na omhito yokulihonga kombinga yaJehova nokulundulula eenghalamwenyo davo.

8. Oshike tuhe shii kombinga yovanhu ovo va hanaunwa po muSodom naGomorra?

⁸ Ongahelipi shi na sha novanhu ovo va li va hanaunwa po muSodom naGomorra? Omulumenhu omuyuki, wedina Lot, okwa li ha di muSodom. Ndele mbela okwa li ngoo a udifila ovanhu aveshe? Ahawe. Ova li shili ovakolokoshi, ndele mbela aveshe ova li ngoo ve shii osho shi li mondjila naasho sha puka? Dimbuluka osho Ombiibeli ya popya kombinga yongudu yovalumenhu vomoshilando, ovo va li va hala okukwata keenghono ovaenda vaLot. Ombiibeli oya ti kutya mongudu omo omwa li “ovanyasha novakulunhu.” (Gen. 19:4; 2 Pet. 2:7) Mbela otu shi shii lela kutya Jehova Kalunga omunanghenda okwa tokolela keshe umwe womuvo efyo nokave na eteelelo loku ka nyumunwa? Jehova okwa li a shilipaleka Abraham kutya moshilando kamwa li nokuli novayuki omulongo. (Gen. 18:32) Omwa li ashike ovalunde, na Jehova okwa li e li mondjila, eshi e va hanauna po, omolweenghatu davo. Ndele mbela ohatu dulu ngoo okupopya kutya, kape na nande oumwe, ta ka nyumunwa ‘menyumuko lovalunde’? Ahawe, katu na oushili waasho!

9. Oshike tu shii kombinga yaSalomo?

⁹ Shikwao vali, mOmbiibeli ohatu lesha mo kombinga yovanhu ovo va li ovayuki, ovo lwanima va ka ninga ovalunde. Ohamba Salomo oumwe womuvo. Okwa li e shii kutya Jehova oye lyelye, na Jehova okwa li e mu nangeka noupuna, ashike lwanima okwa ka hovela okulongela oikalunga. Osho osha li sha nyemateka Jehova neenghono, nOvaisrael ova li va mona oixuna oule womido, omolwomanyono aSalomo. Oshoshili kutya Ombiibeli oya popya kutya Salomo “okwa nangekwa pooxekulululwa,” ngaashi omulumenhu omudiinini, ohamba David. (1 Eeh. 11:​5-9, 43; 2 Eeh. 23:13) Ndele mbela monghedi omo a pakwa, otai ufa kutya Jehova ote ke mu nyumuna? Ombiibeli inai shi popya. Vamwe otashi dulika va diladile kutya Salomo ota ka nyumunwa, molwaashi Ombiibeli oya ti kutya, “ngeenge omunhu okwa fi, okwa manguluka ko koulunde.” (Rom. 6:7) Ashike osho itashi ti kutya aveshe ovo va fya otava ka nyumunwa, nove na oufemba woku ka kala nomwenyo. Enyumuko oli li oshali ya dja kuKalunga omunahole. Ota ka nyumuna ovo a hala va ka mone omhito yoku mu longela fiyo alushe. (Job 14:​13, 14; Joh. 6:44) Mbela Salomo ota ka nyumunwa? Jehova oye e shi shii, fye katu shi shii. Ashike otu shii kutya Jehova ota ka longa osho sha yuka.

OSHO TU SHII

10. Jehova oku uditile ngahelipi okuhanaunwa po kwovanhu? (Hesekiel 33:11) (Tala yo efano.)

¹⁰ Lesha Hesekiel 33:11. Jehova okwe tu lombwela nghee ha kala e udite, ngeenge ta tokola ovanhu. Omuyapostoli Petrus okwa popya eendjovo da faafana naado omuprofeti Hesekiel a li a shanga, okwa ti: “Jehova . . . ina hala nande oumwe a hanaunwe po.” (2 Pet. 3:9) Eendjovo odo otadi tu hekeleke. Otu shii kutya Jehova ita ka hanauna po ovanhu fiyo alushe, okuninga shapo e na etomheno loku shi ninga. Okuyadi onghenda nohe i ulike alushe opo sha pumbiwa.

11. Oolyelye itava ka nyumunwa, notu shi shii ngahelipi?

¹¹ Otu shii shike kombinga yovanhu, ovo itava ka nyumunwa? Ombiibeli oya yandja ashike oihopaenenwa inini.b Jesus okwa ulika kutya Judas Iskariot ita ka nyumunwa. (Mark. 14:21; tala yo Joh. 17:12.c) Judas okwa li e shii kutya osho a ninga oshi li omhinge nehalo laJehova nosho yo Omona, ashike okwe shi ningila owina. (Tala Mark. 3:29 nosho yo oshitukulwa “What Is the Unforgivable Sin? ko-jw.org.”) Sha faafana, Jesus okwa ti kutya ovawiliki vomalongelokalunga vamwe, ovo va li have mu pataneke, otava ka fya noitava ka kala ve na eteelelo lokunyumunwa. (Mat. 23:33; tala Joh. 19:11) Omuyapostoli Paulus okwa ti kutya ovashunimonima, ovo inave livela ombedi, itava ka nyumunwa. — Heb. 6:​4-8; 10:29.

12. Oshike tu shii kombinga yonghenda yaJehova? Yandja oihopaenenwa.

¹² Ngaashi sha popiwa metetekelo, Jehova oku na onghenda, ‘noina hala nande oumwe a hanaunwe po.’ Ongahelipi Jehova a ulikila onghenda ovo va li va nyona sha kwata moiti? Ohamba David oya li ya nyona sha kwata moiti, mwa kwatelwa oluhaelo nedipao. Ashike David okwa li e livela ombedi, na Jehova okwe mu dimina po. (2 Sam. 12:1-13) Ohamba Manasse oya longa oilonga inyanyalifi monghalamwenyo yayo. Ndele nonande oya li ya nyona sha kwata moiti, Jehova okwa li e i fila onghenda nokwe i dimina po, molwaashi oya li ye livela ombedi. (2 Omaf. 33:9-16) Oihopaenenwa oyo otai tu dimbulukifa kutya, Jehova oha ulike onghenda, ngeenge e na etomheno loku shi ninga. Ota ka nyumuna ovanhu va tya ngaho, molwaashi ova li va mona kutya ova nyona sha kwata moiti nove li vela ombedi.

13. (a) Omolwashike Jehova a li a fila onghenda Ovaninive? (b) Lwanima Jesus okwa popya shike kombinga yOvaninive?

¹³ Otu shii yo kutya Jehova okwa li a fila onghenda Ovaninive. Okwa lombwela Jona a ti: “Onda didilika oukolokoshi washo.” Ashike eshi va li ve livela ombedi, Jehova okwa li e va dimina po. Okwa li e va ulikila onghenda shi dulife Jona. Kalunga okwa li e na okudimbulukifa omuprofeti waye, oo a li a handuka, kutya Ovaninive kave “shii osho shi li mondjila naasho sha puka.” (Jona 1:​1, 2; 3:10; 4:​9-11) Lwanima, Jesus okwa longifa oshihopaenenwa osho a honge kombinga youyuki nonghenda yaJehova. Jesus okwa ti kutya Ovaninive, ovo ve livela ombedi “otava ka nyumunwa mEfiku lEtokolo.” — Mat. 12:41.

14. “Enyumuko letokolo” otali ti shike kOvaninive?

¹⁴ Osha hala okutya shike, eshi taku tiwa kutya Ovaninive otava ka ‘nyumuninwa’ “etokolo”? Jesus okwa ti kutya, ovo va longa owii, otava ka “nyumukila etokolo.” (Joh. 5:29) Okwa li ta yukifa kOmido Eyovi dOkupangela kwaye, eshi “ovayuki novalunde” tava ka nyumunwa. (Oil. 24:15) Ovalunde otava ka nyumuninwa “etokolo.” Osho osha hala kutya, konima ngeenge ova nyumunwa, Jehova naJesus otava ka tala ngeenge ovanhu va tya ngaho otava ka dulika nokutula moilonga osho tave lihongo, ile hasho. Ngeenge Omuninive okwa nyumunwa, ndele ina hala okulongela Jehova, Jehova ite ke mu efa a kale nomwenyo. (Jes. 65:20) Ashike aveshe ovo va hoolola okulongela Jehova noudiinini, otava ka kala nomwenyo fiyo alushe. — Dan. 12:2.

15. (a) Omolwashike tu na okuhenuka okupopya kutya, ovo va hanaunwa po muSodom naGomorra, itava ka nyumunwa? (b) Otashi dulika tu udite ko ngahelipi eendjovo odo di Ii muJudas 7? (Tala oshimhungu ““Judas okwa hala okutya shike?”)

¹⁵ Jesus okwa popya kutya “Efiku lEtokolo” otali ka kala lipu kovanhu vomuSodom naGomorra, okuyelekanifa novanhu ovo ihave mu tambula ko nomahongo aye. (Mat. 10:​14, 15; 11:​23, 24; Luk. 10:12) Okwa li a hala okutya shike? Otashi dulika tu diladile kutya Jesus okwa li a popya ta longifa omupopyofano. Jesus ka li a longifa omupopyofano, opo ngeno a ulike kutya ovanhu vopefimbo laye ova li va naipala ve dulife ovanhu vopefimbo laSodom naGomorra. Ndele ponhele yaasho, eshi Jesus a ti kutya Ovaninive otava ka nyumunwa ‘mEfiku lEtokolo,’ osho osho filufilu a li a hala okutya ngaho.d “Efiku lEtokolo,” olo Jesus a popya, ola faafana naalo lOvaninive. Ngaashi Ovaninive, ovanhu vomuSodom naGomorra ova li va longa oilonga ii. Ashike Ovaninive ova li ve na omhito yokulidilulula. Dimbuluka osho Jesus a popya kombinga ‘yenyumuko letokolo.’ Ola kwatela mo, ovo va “longa owii.” (Joh. 5:29) Osha fa shi li ngaha kutya, ovanhu vomuSodom naGomorra, otashi dulika ve na eteelelo li na sha nonakwiiwa. Otashi dulika ovanhu vamwe va ka nyumunwe notava ka kala ve na omhito yokulihonga kombinga yaJehova naJesus Kristus.

16. Oshike tu shii kombinga yanghee Jehova ta tokola ovo tava ka nyumunwa? (Jeremia 17:10)

¹⁶ Lesha Jeremia 17:10. Ovelise oyo oye tu kwafela tu mone osho tu shii: Jehova okwa kala alushe ta “konakona omutima nokuyeleka eefiyo.” Shi na sha nenyumuko olo tali ka ningwa monakwiiwa, ota ka pa “keshe umwe shi fike pokweenda kwaye.” Jehova ota ka fila onghenda ovanhu, apa sha pumbiwa. Onghee, inatu fika pexulifodiladilo kutya omunhu wonhumba ita ka nyumunwa, okuninga shapo tu na oushili kutya Ombiibeli oye shi popya!

“OMUTOKOLI WEDU ALISHE” OTA KA LONGA “OSHO SHA YUKA”

17. Oshike tashi ka ningilwa ovanhu ovo va fya?

¹⁷ Ovanhu omabiliyona ova fya okudja eshi Adam naEva va waimina Satana nova tukululila Jehova Kalunga ounashibofa. “Efyo, olo li li omutondi,” ola mana po eemwenyo dovanhu vahapu. (1 Kor. 15:26) Oshike tashi ka ningilwa ovanhu aveshe ovo? Omuvalu munini, 144 000 wovashikuli vaKristus ovadiinini, otau ka nyumuninwa omwenyo ihau fi meulu. (Eh. 14:1) Omuvalu muhapu wovalumenhu novakainhu ovadiinini, ovo ve hole Jehova, otava ka kwatelwa ‘menyumuko lovayuki,’ notava ka kala nomwenyo fiyo alushe kombada yedu, ngeenge ova twikile okukala ovayuki mOmido Eyovi dOkupangela kwaKristus nosho yo pefimbo leyeleko laxuuninwa. (Dan. 12:13; Heb. 12:1) Natango momukokomoko wOmido Eyovi, “ovalunde,” mwa kwatelwa ovo inava longela nande onale Jehova, ile va li ‘hava longo owii,’ otava ka pewa omhito va lundulule okukalamwenyo kwavo nova kale ovadiinini. (Luk. 23:​42, 43) Ashike ovanhu vamwe ova li ovakolokoshi neenghono, onghee ova li va tokola okuhadulika kuJehova, na Jehova okwa tokola kutya itava ka nyumunwa nandenande. — Luk. 12:​4, 5.

18-19. (a) Omolwashike hatu dulu okukala twe lineekela onghedi omo Jehova ta ka tokola ovo va fya? (Jesaja 55:​8, 9) (b) Oshike hatu ka kundafana moshitukulwa tashi shikula ko?

¹⁸ Mbela otu na oushili kutya, ngeenge Jehova ta tokola ovanhu oha ningi alushe omatokolo e li mondjila? Heeno! Abraham okwa li e na oushili moshinima osho. Okwa li e shii kutya Jehova okwa wanenena, omunaendunge, omunanghenda ‘nomutokoli wedu alishe.’ Jehova okwa pa Omonamati waye oshinakuwanifwa shokutokola. (Joh. 5:22) Xe nOmona ove shii osho shi li momitima dovanhu. (Mat. 9:4) Onghee, ngeenge tava tokola omunhu keshe, ohave shi ningi alushe pauyuki.

¹⁹ Onghee natu kale twa tokola toko okulineekela muJehova nomomatokolo aye aeshe. Otwa mona kutya, fye inatu wana okutokola, oJehova ashike. (Lesha Jesaja 55:​8, 9.) Natu efele etokolo alishe momake aye nosho yo Omona waye, Ohamba, oyo hai hopaenene ouyuki waXe nonghenda yaye. (Jes. 11:​3, 4) Jehova naJesus otava ka tokola ngahelipi ovanhu pefimbo loudjuu munene? Oshike tuhe shii? noshike tu shii? Oshitukulwa tashi shikula ko, otashi ka nyamukula omapulo oo.